|  الناس  |  المقالات  |  الثقافية  |  ذكريات  |  المكتبة  |  كتّاب الناس  |
 

     
 

الأربعاء  30 /  11 / 2016                                 فرات المحسن                                   كتابات أخرى للكاتب على موقع الناس

 
 

 

كارل ماركس في العراق
(
29)

فرات المحسن
(موقع الناس)

ــ نعم أخويه أستاذ قادر آني يوم الجمعة أفتح من وكت لأن يوم الجمعة يوم مو عادي أولا هو يوم الله والكهوة تنترس بي زباين.
ــ ماذا تعني زباين؟
ــ هاي آني شلون وياك.. صدك جذب أنته فد مرة كلشي ناسي.
ــ كلمة جديدة لم اسمعها سابقًا.
ــ هم ميخالف عمي، الله لا يوفق ألي سوه بيك هاي السالفة.. زباين يعني جمع زبانه.. يعني كطف مال جكاير... لو جمع زبون يعني هدوم مال الزلم.
قال ذلك أبو داوود وأخذ جسده الضامر النحيل يهتز جراء محاولته كتم ضحكته.
ـــ ربي ضحك خير بهذا الصبح بس لا ينكَلب علينا شر؟
ــ ما الذي دهاك في هذا الصباح أبو داوود ،تتكلم بالألغاز؟
ــ عيوني أستاذ قادر حبيت أتلاطف وياك بهذا الصبح.. اليوم جمعة عطلة، والناس أتغبش وتجي من وكت تتسوك حاجاتها من هنا، والبعض عنده حاجه زايده بالبيت هم يجي اليوم يبيعه ويحصل بيه جم فلس لعياله.. واليوم تبدي رحمة الله بعد الظهر تلتم ناس هواية من جماعة خبز حرية دولة مدنية، وبعضهم يجي يمنه بالكهوة ياكلون ويشربون.. اشو دكَوم ساعدني.. حرك نفسك!
رفع ماركس جسده فأحس بالتعب، فالسهر كان يثقل رأسه وجسده ولكنه قاوم ذلك واستدار ليمسك التخت الخشبي من طرفه الآخر ليساعد أبو داوود على نقله جوار مثيله أمام المقهى، ولكن جملة دولة مدنية أدارت رأسه وأيقظت عنده هواجس الفضول الشديد.
ــ أبو داوود الله يحفظكم وشلونكم عيني.. ما الذي تعنيه بجماعة خبز حرية دولة مدنية؟
ــ هسه ما راح أجاوبك... أنته خوب أندليت بيت الشايب أبو سبتي.
ــ من هو أبو سبتي؟
ــ هذا شلون حجي؟ يمعود بيت أبو سبتي إلي جماعة أبو صبري وأبو تركي الأعضب البارحة ودوك لهناك ودزو أبو سبتي عليه وبعدين انتظروني لمن أجي وآخذك..
ــ نعم ..نعم أعرفه عند المنعطف الثاني من الزقاق ما بعد زقاقنا هذا..
ــ يعني ما أتيه لو رحت هناك..
ــ كلا أعرف الطريق جيدا..
ــ عجيب ويكَولون مخبل؟
همس أبو داود ذلك مع نفسه واستدار ليدخل المقهى.
ــ ماذا قلت؟
ــ هيجي ما كو شي ..
ــ لم تخبرني عن جماعة خبز حرية دولة مدنية؟
ــ دخذ هذي السطلة وروح لبيت أبو سبتي أمليه مي وتعال.. اليوم جمعة وبالعادة الماي ينكطع بالنهار فتره طويله.
ــ لماذا يقطع عنكم الماء؟
ــ أسباب هوايه يمكن يسوه قصطني على مود المظاهرات، لو أكو منو يقبض لو يريد يخربط شغلنه لو شغل الحكومة حتى يهيج الناس ضده.. بالعراق أتوقع كلشي يصير، وكلشي أله أسباب ومسببات ما يجي من وحده.. كلشي مخربط ومتعرف راس الشليله من آخره.. مشروع الماي صار ست سنوات وما كملوه.. بالمليارات يكَولون صرفنه عليه.. والبوكَ صاير عدهم مثل شربة الماي.. هسه أنته وين وديتنه دروح لبيت أبو سبتي جيب من عنده ماي وتعال بسرعة.
ــ أعطيها لأبو سبتي؟
ــ لا بويه أنته تمليه بنفسك وترجعه لهنا.

رفع ماركس جردل الماء وسار متهاديًا وسط الزقاق. كان يريد أن يعرف عن هذا المجتمع حتى النتف الصغيرة التي تتفاعل وتعتمل وتتضاد لتخلق عاداته وتقاليده وحراكه وممارساته وأعرافه. تلك التي تختفي ثم تظهر فجأة دون تخطيط أو توجيه، فهذا التخبط والعشوائية في بحث الأمور هو النمط الشائع في المجتمع العراقي حين يراد التصدي للحياة ومشاكلها اليومية. دائمًا ما أراد أن يعيد للفكر النظري وظيفته النقدية وصلته بالواقع، ولذا فهو ينطلق من الواقع وليس غيره، أي البحث في ظاهر الواقعة ثم يقوم بتحليلها وكشف منطقها الداخلي وتعارضها أو تناقضاتها المتلازمة، وميول تطورها وإلى أين مآلها. يوم الجمعة حسب ما عرف عنه، هو يوم عطلة دينية للمسلمين حاله حال يوم السبت لليهود والأحد للمسيحيين، وهذه الأيام في سماتها الأعم ظاهرة اجتماعية سياسية تاريخية، حيث يتحول هذا التقليد إلى مكنون لعلاقة دينية أو مذهبية ومن ثم تأخذ طابعها الحقيقي بالسير والتحول إلى علاقة سياسية تتمحور في انحياز الدولة كليا إلى دين الأكثرية، مما يجعل من باقي الطوائف والديانات غرباء في بلدهم حتى وإن اعترفت الدولة بوجودهم وحقهم في ممارسة طقوسهم، ولكن طابع الدولة ومسماها الديني يرفض مساواتهم مع المسلمين. وهنا يتم بقوة التوظيف السياسي للخطاب الديني، ليكون في الأخير عنوانًا للفرقة والحروب، ويفرض طابع الجشع والنفعية وخيارات المفاضلة عند الترويج لذلك الخطاب، ويكون الوجه الأمثل والدين العملي للمجتمع المدني البرجوازي. ومع هذا فإن ما هو أنساني في الدين قابل للتحقق في الدنيا لو توجه الناس للفضيلة وأبعدوا عن الأقليات الدينية مشاعر الغربة عن المجتمع والدولة والمعاناة من التمييز والاضطهاد وهضم الحقوق، وهذا لن يتحقق إلا في ظل سلطة البروليتاريا وعملها الدءوب لبناء دولة العدالة الاجتماعية وجعل الجميع متساوين في الحقوق والواجبات دون استثناء ودون الرجوع لمقولات الدين وأعرافه.

كان أبو سبتي يجلس القرفصاء أمام باب الدار بثوبه الكالح، يتلفع بغطاء رأس أبيض مرقط بمربعات سود، كان ساهمًا يطالع السماء ويداعب بيده سيجارة يبدو من شكلها أنها صناعة يدوية، بين لحظة وأخرى يرتشف منها نفسًا طويلاً ثم يخرج دخانها الكثيف من منخريه وفمه ويروح يراقب كتلة الدخان البيضاء ويتعقبها ليطردها بنفخة من فمه، يلعب لعبته هذه كلما سحب رشفة قوية ثم يعقبها بزفير قوي، كان يراقب الدخان وهو يبتعد فيبتسم بنشوة رضا ظاهرة.
ــ السلام عليكم أبو سبتي.
لم يلتفت أبو سبتي نحو ماركس وراح ينظر إلى أعلى هازًا رأسه بحركات خفيفة وكأنه يبحث عن شيء علق عند سطوح وجدران البنايات التي أمامه.
ــ أبو سبتي...السلام عليكم..
لثلاث مرات كرر ماركس ذلك دون أن يسمع جوابًا. وفجأة نطق أبو سبتي دون أن يلتفت نحو ماركس.
ــ ها شتريد جاي.. ما تخاف يبسطوك..
قال ذلك أبو سبتي وهو يسحب الكلمة الأخيرة عنوة وكأنه يخرجها من منخريه
ــ أرسلني أبو داوود لجلب جردل ماء من عندكم..
ــ ولك أنته تبقه مخبل؟ أي دحجي عدل مثل الأوادم.. كَول بالصحيح شتريد... مو جاي من الصبح حتى تصطرني وأتخربط عليه الجو.
ــ حجي رحمه الوالديكم... ألم تفهم ما أقوله؟
ــ سليمه وصخونه لكل المخابيل.. هو أبو داوود ما لكه غيرك؟ كَول شتريد؟
ــ ماء لأبو داوود.
ــ فوت جوه وعلى أيدك أليمنه الحنفية.
من خلال حركة اليد فهم ماركس ما قاله أبو سبتي فدخل البيت وذهب حيث حنفية المياه ليضع الجردل تحتها ويملأه بالماء ثم خرج ونظر إلى أبو سبتي وشكره. كان أبو سبتي غائم العينين يطالع السماء المغبرة، يرتشف سيجارته بتلذذ وقوة ويمارس لعبته مع دخانها، وكان يبدو وكأنه في عالم آخر، ساهيًا عما يحيط به ولم يكن ليعنيه دخول وخروج ماركس أو حتى وجوده بالقرب منه.
ــ في أمان الله حجي أبو سبتي.
كرر ماركس ذلك لعدة مرات بعدها عاد أدراجه إلى مقهى أبو داوود دون انتظار جواب أبو سبتي. وجد هناك أبو رجب وكذلك أبو عفيفة وعربته يقفان قرب المقهى.
ــ هاي شنو أبو داوود شغلته لأستاذ قادر عندك؟
ــ أحسن ما كَاعد بطال عطال.
ــ عاد تنطي شي لو بلوشي؟
ــ بسم الله الرحمن، هو ليش أسوه، قابل كَام كسر السده.. الشغلة كله سطل ماي جابه من يم أبو سبتي، وهو يوميه يلطله تلث استكانات جاي بلوشي.. وبالشقه يكول أبو عفيفة سجلهن على الحساب، وفوكاهه فندق بلاش..
ــ دنشاقه، هاي أشبيك صايره روحك زغيره تطفر بالعجل. عمي أستاذ قادر أغسل أيدك وتعال أكعد يمي خل نتريك .جبت صحن كاهي بالكَيمر والله على مودك رحت من الصبح يم القشلة حتى أجيبه.
ــ أشكرك إن شاء الله.. أبو رجب أغاتي.

ضحك الجميع وجلس ماركس وأبو رجب عند تخت داخل المقهى يتناولان الفطور، وقد بدأت حركة الناس تزداد مع مرور الوقت ودبّ النشاط في محلات السوق وامتلأ الزقاق بضجيج وصراخ الباعة. جلب أبو داوود قدحين من الشاي ووضعهما أمامهما فوق المنضدة. في ذلك الوقت شعر ماركس بأن ما يلح داخل رأسه من سؤال ما زال طريًا وقد كبر بشكل لا يحتمل التأجيل، لذا عليه أن يسأل أبو داوود عن معنى جملته، خبز حرية دولة مدنية، قبل أن تزدحم المقهى بالرواد ويبدأ يوم العمل الثقيل المتعب ولا يبقى لدى أبو داوود فسحة من الوقت لتفسير ما قاله.
ــ أغاتي أنشاء الله.. رحمه لوالديكم، حجينا أبو داوود.. لم تخبرني عن قولك بأن هؤلاء جماعة خبز حرية دولة مدنية.
ــ شلك بدوخة الرأس؟
ــ بودي معرفة ذلك، الباب اليجيك منه ريح، لا أدري ماذا بعدها.
ــ هاي شلك بيه .. شجاب هذا المثل بهذا الوكَت؟
ــ سمعتهم يتحدثون به.
ــ أي خوب مو كلشي تسمعه تكَوله.
ــ نعم .أوكي ..فقط أريد أن أسمع عن هؤلاء .

ــ شوف أستاذ قادر هاي صار جم سنه قبل وبعد المظاهرات يجون شباب حلوين يكَعدون هنا بهاي الكهوة.. يسولفون ويرطنون أريد أفتهم منهم شي ما أكَدر، أريد أوكَع على مايهم.. كلشي ما كو.. شنو حريه حرية.. افتهمناها بعد ما أجوي الأمريكان للعراق، وبعد ما أبو شعبنا انسلك بهذي الحرية ألي إجتنه وأحنه بعدنه ما نعرف راسنا من رجلينا.. جان قبل هذا الوكت، واحد لاعب بالشعب طنب، وأحنه طكَت بلاعيمنا من العطش والجوع، ومن الخوف جنه نشتم بي ويه أرواحنا، وهسه بهذي الأيام حتى التلفزيون والإذاعة تصيح حرية حرية ديمقراطية.. بس والذي رفع السمه دون عمد، هذي الأيام مثل وكت صدام، إذا ما عدك حامي يحميك لو ما عدك واسطة، ولو بس تفك حلكَك وتكَول هذوله الجماعة مو خوش، ثاني يوم تلكيك الناس مشمور بالزباله.. لو تجيك ورقة تكَول أنجب أحسلك، هاي الحرية بالعراق من جنه ويه ابن صبحة، لحد ما أجو الأمريكان وجابو وياهم ولدنه الحبابين.. دخلينه استاذ قادر من هذي السوالف الفاينات، شراح تستفاد لو عرفت شنو حرية حريه دولة مدنية. إي مو هيه يمكن نفس السالفة السوت بيك ما سوت وخلتك بهذا الوضع.
ــ على أية حال ولو أني لم أفهم من قولك الكثير، ولكن ما الذي عنيته بدولة مدنية ؟.

عندها صاح أبو عفيفة بصوت عال وهو يقوم بترتيب مواد مطعمه فوق سطح عربته، مكملاً ما أبتدئه أبو داوود.
ــ بابه يا دولة مدنية هاي أنته شبيك.. هذوله الشيوعيين خابصين الدنيا بيه.. هيه شلون واحد يكَول.. كلمن بكيفه ومعليه بالآخرين، والدين الإسلامي ما لازم الناس يصير عدهم مهم ويجلبون بيه، لو يحللهم مشاكلهم.. يعني لتكَلي ولا أكَلك كفر بكفر. يردونه نصير مثل الغرب الكافر.. بالمناسبة فد يوم من جانو الأمريكان يفترون براحتهم بشوارع بغداد، سألت جندي منهم طبعا بالانكليزي.. جان يصيح ويشتم علينه بدون سبب.. كتله أنته تؤمن بالسيد المسيح جان أيجاوبني.. كَالي وهو هذا منو..وين بيتهم .. هذولة الشيوعيه يردونه نصير مثل هذا الجندي.
ــ هاي شلك بيه أبو عفيفة تره السالفة مو هيج.. وبعدين تره المتظاهرين أكثرهم مو شيوعيه.
ــ هيج مو هيج.. أبو رجب تره هذوله ثخنوهه كل جمعة كَاطعين أرزاق العالم.
ــ غير همه يردون مصلحة الشعب.
ــ هذا يا شعب... ليش هذا الشعب يا يوم عرف مصلحته، أشو كتلنه الملك وسحلنه الوصي ونوري السعيد وكتلنه عبد الكريم ويه جماعته وصار يوميه انقلاب عسكري وأجو البعثيين مرتين وحكمو الناس بالنار والحديد والشعب مجتف وخايف وما يعرف راسه من رجليه، بس يدردم وبدون نفع، وهسه أجو ذوله وشغل البوكَ ما لتهم للضالين، وأحنه وغيرنا نصرخ ونعيط وننبطح على ظهرنه والجماعة مطنشين، لا وجماله ديضحكون على الناس.
ــ نعم وهذوله يتظاهرون حتى يوعون الناس ويدلوهم على باب رزقهم.
ــ أهو هاي هيه ما كو غيرهم يدلي الناس على رزقه.. إي مو الناس ما عده خبز وذوله يردون يجيبون الخبز.. المثل يكَول لو الرزق على كَد العقول جان البهايم ماتت من الجوع. الله ورسله وكتبه موجودين وكلشي ماشي بالعدل والناس عال العال، ورزقكم في السماء وما توعدون.
ــ وهذوله أصحاب عقل وضمير وإخلاص للوطن.
ــ خوش خوش.. البارحة سمعتها من إذاعة موزمبيق باللغة الصينية.. خوب انته اليوم ما نسيت العلم مالتك همين راح ترفعه وتقره نشيد الجمعة المباركة.. بسم الدين باكَونه الحرامية؟
قال ذلك أبو عفيفة هازئًا وطلب من أبو داوود أن يجلب له قدح شاي ثخين فجاء له بما طلبه.
في الوقت ذاته كان أبو داوود يتكلم بصوت مرتفع وكأنه يوجه حديثه لجميع من كان جالسًا في المقهى.
ــ هاي الشغلة أمدوختني ومدا أفتهم منها شنو وليش وشلون. بس الخال أبو رجب كل جمعة يروح للمظاهرات ويشيل علم العراق وهمين يصرخ وياهم خبز حرية حرية دولة مدنية... وهسه بعد ما سمط الريوك المعدل ودهن زردومه بالكَيمر، راح يكَدر يشرحلنا شنو وليش وعليمن.. خوش أستاذ قادر أسمع زين بلجي تحصل بيه على ثواب ويصيبك أجر.
ــ خوش ورحمه الوالديكم، أغاتي ممنون.
قالها ماركس ضاحكًا.
ــ يله أبو رجب أسطره لحجي عبد القادر.. هذا فد واحد لجه يريد يعرف كلشي.

 

كارل ماركس في العراق (28)
كارل ماركس في العراق (27)
كارل ماركس في العراق (26)
كارل ماركس في العراق (25)
كارل ماركس في العراق (24)
كارل ماركس في العراق (23)
كارل ماركس في العراق (22)
كارل ماركس في العراق (21)
كارل ماركس في العراق (20)
كارل ماركس في العراق (19)
كارل ماركس في العراق (18)
كارل ماركس في العراق (17)
كارل ماركس في العراق (16)
كارل ماركس في العراق (15)
كارل ماركس في العراق (14)
كارل ماركس في العراق (13)
كارل ماركس في العراق (12)
كارل ماركس في العراق (11)
كارل ماركس في العراق (10)
كارل ماركس في العراق (9)

كارل ماركس في العراق (8)
كارل ماركس في العراق (7)
كارل ماركس في العراق (6)
كارل ماركس في العراق (5)
كارل ماركس في العراق (4)
كارل ماركس في العراق (3)
كارل ماركس في العراق (2)
كارل ماركس في العراق (1)

 

 

 

 

 Since 17/01/05. 
free web counter
web counter