الثلاثاء 1/12/ 2009
لقاء صحفي مع الحاج زعيبل زعيم قائمة شفط الشفاطة
(4)عودة وهيب
الحاج زعيبل كان حزينا لفشل قائمته ( شفط الشفاطة ) في الحصول على اي صوت في انتخابات المحافظات الماضية ، ويقول عن ذلك:( والعباس ما ظل حمّال ولا عربنجي ولا عطّال بطّال الا صوّت لقائمتي لكن الجماعة كلوا اصواتنه من هلفج لهل الفج ، وكالولي قائمتك ما حصلت ولا صوت .. طلعت حتى انه ما مصوّت لروحي !! ويكولون الأنتخابات نزيهه ).
صار ديدن حاج زعيبل ترديد عبارة ( شيشيلهم .. شيشيلهم ) ليل نهار ولما طلبت منه ان لا يستسلم قال : ( استاد: ماكو فايدة، الشاص شاص، والحمل حمل .. لو يجي (العزير) هم ما يكدر يشلعهم، ذوله صاروا مافيات، فلوس العراق صفت بجيوبهم ، وفوكاهه تساندههم دول قوية، فشلون تريدني انا وامثالي نتقارش وياهم .؟! ).
لقد قرر الحاج زعيبل اعتزال العمل السياسي بسبب يأسه من امكانية انقاذ العراق من المافيات المتحاصصة أو (المتماصصة ) على حد تعبيره ولذا فإنه رفض الادلاء بأي تصريح سياسي .
وحتى عندما قررت ان احتال عليه وقلت له انني اطلب رأيه ليس بأعتباره (قطبا) سياسيا بل بأعتباره (عطبا) عاديا يراقب ما يجري حوله، رفض قائلا :(أستاد ماكو فايدة بالحجي.. الحجي ماكله الثور).
غير ان الحاج زعيبل غيّر رأيه وقرر استئناف نشاطه السياسي لسببين احدهما سبب مباشر وهو تلقيه (ايميل) من النائبة (ميسون الدملوجي) التي يحلو له ان يسميها (الدملوجه) تعاتبه فيه على استغراقه في الحزن واليأس.
اما السبب غير المباشر فهو تدافع الاحزاب والكتل السياسيه على بيته ،ويقول عن هذا التدافع : ( يا أستاد هلأيام صرت كلش عزيز عد قوائم الشفاطة .. يوميه وجايني وفد شكل، يوم لابسين جراويات يوم لابسين عمايم يوم افندية وكلهم يريدوني اتحالف وياهم.. كتلهم عمي جا اذا كل احنه نصير بقائمة وحدة جا ليش انسوي انتخابات؟ كالوا نريد نصير كتله وحده حتى لا تضيع اصوات الناخبين !! كتلهم : خل تضيع اصوات الناخبين (ضيعة عين عودة) ، جا اصوات الناخبين احسن من فلوس النفط اللي شفطتوهه .. عمي ،انتم ما خايفين اتضيع اصوات الناخبين، انتم خايفين انتم نفسكم تضيعون .. تعرفون الناس جرّبتكم وعرفت دماراتكم وما راح تنتخبكم، فتريدون تلبدون بسد حاج زعيبل وغيره )
الهلع الذي تعيشه قوائم الشفاطه وتحفز ابناء الشعب لرميهم في اقرب (حديقة) من(حدايق) التاريخ زرع الامل في نفس حاج زعيبل وقرر ان يعيد تشكيل قائمته السابقة (قائمة شفط الشفاطة) وان ينزل الى الساحة بقوة، ووافق على اعطائي حديثا صحفيا مطولا سننشره على حلقات.
الحلقة الرابعة
الى عماد العبادي : الحجاية ماكلهه الثور
سألت الحاج زعيبل عن الاصطفافات الجديدة التي انتجت ائتلافات وكتل جديدة وقلت له :
الا تعتقد بان الاحزاب الحاكمة قد اتّعضت من فشلها لذلك تتجه الى تشكيل كتل وائتلافات عابرة للمذهبية والطائفية ..والدليل ان جميع اسماء الائتلافات تنتهي بكلمة (وطني) ، الائتلاف الفلاني (الوطني) ، التجمع الفلاني (الوطني) ...الا يبشر ذلك بالخير.
- ضحك حاج زعيبل قائلا : ادري بيك اتريد تحجّيني
ثم عدّل من ( قعدته ) وقال :
- ذيج السنه اكو رجّال يبيع أكل على الجنود بساحة (ام البروم) بالبصرة، وطبعا كالعادة جان ينادي على بضاعته، فجان يصيّح : ( لفّة بيض بدرهم.. لفّة بيض ابدرهم.... )
اجه جندي يمة وكاله :عمي انطيني لفة بيض
البائع اخذ الدرهم من الجندي وانطاه اللفة
الجندي فتح اللفة لكاهه لفة بتيته ( بطاطة ) وما بيهه ولا شوية بيض
اتقرب من البايع وكالة : عمي اشو ماكو بيض باللفه
البايع كاله : صح ماكو بيض وين المشكله؟!
الجندي كاله : لعد ليش اتكول لفة بيض ، ليش ما تكول لفة بتيته حتى اذا ما تعجبنه ما نشتري ، ليش اتقشمرنه
البائع كاله : عمي، انت ما شايف باكيت جيكاير كريفن ابو البزون
الجندي كالة : أي شايف
البايع كاله : هم مرة شفت اكو بزونه بالباكيت
الجندي كاله : طبعا لا
البائع صاح وهو فرحان : شفت اشلون، ايسمونه كريفن ابو البزون بس هو ما بيه أي بزونه، فلفّاتي هلشكل، اسميهه لفة بيض بس ما بيهه بيض، يعني مجرد اسم...
عاد هسه يا استاد لا تغرّك الاسماء ،هاي مجرد اسماء لجلب الزبائن بموسم الانتخابات، واحنه علينه كبل ما ننتخب ان نفتح ( اللفه ) ونشوف شنو بيهه ، بتيته لو بيض لو بزونه
انا حاج زعيبل عن نفسي فتحت هوايه ( لفات )، وداعتك لكيتهه نفس البتيته الخايسه اللي اشتريناهه بالانتخابات الاولية ، نفسهه بالضبط ، بس راشّين عليهه شوية كركم علماني وشوية بهارات ديمقراطية حارّه.. فلا يغرك الاسم..
قاطعته قائلا : بالمختصر المفيد ماهو الفرق بين الائتلاف القديم والائتلاف الجديد الذي ...
قاطعني الحاج زعيبل بغضب يشوبه بعض الخوف قائلا :
- ابروح ابوك لا تجيبلي طاري (المختصر) لانه يذكرني بعماد العبادي..
عماد طلع ابرنامج (المختصر) وحجاله جلمتين مال الله ..كال ياجماعة، اشو منا اتكولون احنه ديمقراطيين، ومنا تودّون قواتكم وتخلوهم ايدمّمون الصحفيين بالشوارع ، وياهو ينتقدكم اتكلوله انت بعثي ابن بعثي ، جاهي هاي الديمقراطية؟! ..
هلحجايتين الجماعة ما تحملوهن، وطكوه بالدهن وكالوا(الفاعل مجهول) ..فخليني عايش على برودة الكاع ترى الجماعة ما يتشاقون...
قلت له : خليك من المختصر وانطيني الزبدة
- قال حاج زعيبل : الزبده :
جان اكو حمار يدّعي بان الحمير افهم من البقر...
كالوله : هسه انت، شنو فرقك عن البقرة
الحمار كال الهم : اكو فرق شاسع بيني وبين البقرة : انا الحمار من اشوف الاشارة حمره اوكف وما اعبر الشارع الى ان تصير الاشارة خضرة..
بينما البقرة من تشوف الاشارة حمرة تعبر وما تفكر باي شي ، مثل الحمار .
فيا استاد الفرق واسع وشاسع بين الائتلافين .
قلت له : بما انك تطرقت الى محاولة كتم صوت العبادي ، برأيك من هو القاتل؟
اصفر وجه حاج زعيبل وتلمس ( جحفته ) وقال :
- عمي الجتّاله هواية ، وهوايه الهم مصلحة بخنك كل صوت يحجي الصدك.. لكن الشغله موهاي .. الشغله: هل نبقى دوم حايرين وما نعرف ياهو جتالنه..
كل ما ينكتل واحد كالت الحكومة سوينه تحقيق.
واحنه نظل نسأل : هايجماعه... وين صار التحقيق ...؟
والجواب دائما سكته .
الى ان ينكتل واحد جديد، ويصير تحقيق جديد وننسه التحقيق الاولي،
وعلى هل الرنه وحمّامج دافي ..
اللي مخوفني شي واحد : بس لا الحكومة تعرف المجرمين وساكته ..
ايكولون اكو مريّه جانت تسبح بالشط ومخليه ثوبهه على الشاطي ،
بالصدفه مر رجّال من غير عشيرة واستمر بطريقه ..
البنت خلّصت سبح فطلعت وراحت تريد تلبس ثوبهه ، مالكت الثوب فصارت اتصيّح، واتهمت الرجّال اللي من عشيرة ثانية بسرقة ثوبهه ...
جيب الليف دني الليف، ركب الحق العشائري على عشيرة الرجّال ، فصارت عشيرته مجبروه ان تدفع فصل لاهل البنت ..
كالوا باجر اتصير كعدة الفصل ..
وكالعادة، عشيرة البنيه لازم يسوون غدا للكعده، فذبحوا ثور...
من ذبحوا الثور وكصبوه لكوا ثوب البنية ابطن الثور ... طلع الثور ماكل ثوب البنيه..
فلما اهل البنيه عرفوا الحقيقة خافوا ان يصير الحق العشائري عليهم باعتبارهم شوهوا سمعة العشيرة الثانية، فقرروا ان ( يطمطمون السالفة )..
فوصّوا للعشيرة الثانية وكالولهم : يا اخوان لا تجون ، ماكو داعي للفصل ، احنه متنازلين عن حقنه، واحنه اخوه، ومن هلسوالف.
فصار مثل : (خلوهه سكته ترى الحجاية ماكلهه الثور ..)
فانا اكول : يمكن الحكومة تعرف كلشي،
تعرف المجرمين بالاسماء وبالعناوين ،
بس ما تكدر تحجي ،
وما تكدر تعلن عن نتايج التحقيقات..
لان الحجاية ... ماكلهه الثور...
ولو انا من الحكومة جاوديت عماد ( لمايو كلنك ) بامريكا لان ابو المثل يكول :
(الكاسرهه ايحش عليهه)
وللحديث بقية
¤ لقاء صحفي مع الحاج زعيبل زعيم قائمة شفط الشفاطة (3)
¤ لقاء صحفي مع الحاج زعيبل زعيم قائمة شفط الشفاطة (2)
¤ لقاء صحفي مع الحاج زعيبل زعيم قائمة شفط الشفاطة (1)