كتابات أخرى للكاتب على موقع الناس

الأثنين 19/10/ 2009

لقاء صحفي مع الحاج زعيبل زعيم قائمة شفط الشفاطة (3) عودة وهيب الحاج زعيبل كان حزينا لفشل قائمته ( شفط الشفاطة ) في الحصول على اي صوت في انتخابات المحافظات الماضية ، ويقول عن ذلك:( والعباس ما ظل حمّال ولا عربنجي ولا عطّال بطّال الا صوّت لقائمتي لكن الجماعة كلوا اصواتنه من هلفج لهل الفج ، وكالولي قائمتك ما حصلت ولا صوت .. طلعت حتى انه ما مصوّت لروحي !! ويكولون الأنتخابات نزيهه ). صار ديدن حاج زعيبل ترديد عبارة ( شيشيلهم .. شيشيلهم ) ليل نهار ولما طلبت منه ان لا يستسلم قال : ( استاد: ماكو فايدة، الشاص شاص، والحمل حمل .. لو يجي (العزير) هم ما يكدر يشلعهم، ذوله صاروا مافيات، فلوس العراق صفت بجيوبهم ، وفوكاهه تساندههم دول قوية، فشلون تريدني انا وامثالي نتقارش وياهم .؟! ). لقد قرر الحاج زعيبل اعتزال العمل السياسي بسبب يأسه من امكانية انقاذ العراق من المافيات المتحاصصة أو (المتماصصة ) على حد تعبيره ولذا فإنه رفض الادلاء بأي تصريح سياسي . وحتى عندما قررت ان احتال عليه وقلت له انني اطلب رأيه ليس بأعتباره (قطبا) سياسيا بل بأعتباره (عطبا) عاديا يراقب ما يجري حوله، رفض قائلا :(أستاد ماكو فايدة بالحجي.. الحجي ماكله الثور). غير ان الحاج زعيبل غيّر رأيه وقرر استئناف نشاطه السياسي لسببين احدهما سبب مباشر وهو تلقيه (ايميل) من النائبة (ميسون الدملوجي) التي يحلو له ان يسميها (الدملوجه) تعاتبه فيه على استغراقه في الحزن واليأس. اما السبب غير المباشر فهو تدافع الاحزاب والكتل السياسيه على بيته ،ويقول عن هذا التدافع : ( يا أستاد هلأيام صرت كلش عزيز عد قوائم الشفاطة .. يوميه وجايني وفد شكل، يوم لابسين جراويات يوم لابسين عمايم يوم افندية وكلهم يريدوني اتحالف وياهم.. كتلهم عمي جا اذا كل احنه نصير بقائمة وحدة جا ليش انسوي انتخابات؟ كالوا نريد نصير كتله وحده حتى لا تضيع اصوات الناخبين !! كتلهم : خل تضيع اصوات الناخبين (ضيعة عين عودة) ، جا اصوات الناخبين احسن من فلوس النفط اللي شفطتوهه .. عمي ،انتم ما خايفين اتضيع اصوات الناخبين، انتم خايفين انتم نفسكم تضيعون .. تعرفون الناس جرّبتكم وعرفت دماراتكم وما راح تنتخبكم، فتريدون تلبدون بسد حاج زعيبل وغيره ) الهلع الذي تعيشه قوائم الشفاطه وتحفز ابناء الشعب لرميهم في اقرب (حديقة) من(حدايق) التاريخ زرع الامل في نفس حاج زعيبل وقرر ان يعيد تشكيل قائمته السابقة (قائمة شفط الشفاطة) وان ينزل الى الساحة بقوة، ووافق على اعطائي حديثا صحفيا مطولا سننشره على حلقات. الحلقة الثالثة س: في حديثك عن يوم الاربعاء الاسود، انت ياحاج زعيبل، اتهمت الجميع، في حين أن التحقيقات الحكومية اتهمت البعث والقاعدة ومن ورائهم سوريا. الا تثق بقول الحكومة ؟ - ياحكومة هاي ؟ بس لاعبالك عدنه حكومة من صدك ؟ هاي موحكومة هاي موكب تطبير ولطم، ويقودونهه رواديد وروزخونية. انتظر خل يجي عاشور، راح اتشوف كل الوزراء لازميلهم مجالس حسينيه ومتيهين وزاراتهم ، ثلث ترباع دواير الدولة اتعزّل بعاشور لان مدراء هاي الدوائر لو روزخونية ولزموا( مجالس تعزية حسينية ) لو رواديد وشافولهم مواكب لطم وتطبير والباقين يروحون( مشّاية) . ذوله (اللي تسميهم حكومة ) كاعد يقودون الدولة بعقلية ادارة الجامع والحسينية مو بعقلية حكومة ووطن ومواطنين. سالفة هاي الحكومة ذكرتني بشردتي لسوريا بايام صديم . بسوريه كتلني الهبري والجوع . ذاك اليوم جنت اتمشه انه وصديج ( جوعي مثلي ) يم مقر واحد من الاحزاب( اللي هسه بوش نفخ بصورتهه) فشفنه لافته اتكول اكو عشاء وعزاء بالحسينيه الفلانية ، ففرحنه وكلنه الليله دبر العشه. ما اطولهه عليك رحنه للحسينيه قبل الصلاه حتى لايكولون ذوله جايين بس على العشه . كام المومن المعمم وصلى بينه، لكن سواهه مو صلاه ،سواهه ختمة قران : بمجان( قل هو الله احد) كام يقرا سورة( البقرة ) ، ومن يسجد يقرا( دعاء الندبه ودعاء كميل ) ، صاحبي كام ينام بكل سجده وكوّه اكعده : ( ولك اكعد لاالموامنه يشبعونك رفس ) كول ورا ساعتين خلصت الصلاه،كلنه خلصت وراح يجي العشه الدسم ، لكن استلمنه روزخوني (جنه عتوي فواتح) وكام يقرا على الحسين ،هذا الروزخوني لزم صورة يوسف وكام يفسر بيهه ، وجلّب بآية ( وهمت به وهم بها )الى ان سواهه فلم سكسي . صاحبي كالي : ( ولك آنه اتهيجت وين اروح وانه مستفلس ؟) كتله اصبر، كلهه تهون من اجل( العشاء الرباني). المهم ( كمّل) الروزخون ونزل ، فرحنه وعبالنه راح يجي العشه ، ومانشوف الا و كام واحد رادود طحش ( ياكل بيه السبع يومين)، سلتله ورقه من عبّه وكام يرد لطميات. صاح واحد شلايتي : ( يله شباب انزعوا..بينوا حبكم لاهل البيت ) كول نزعت الوادم وكامت تلطم، صاحبي كال: ( انه ماانزع لان فانيلتي وصخه ولباسي مشكك ظال بس تجه)، كتله ولك انزع لايطلعونه بالمدس وتروح صلاتنه وبجينه على يوسف تيسي فيسي . كول نزعنه وكمنه نلطم . هسه يخلص اللطم ، هسه يتعب اللطامه ، هسه يتعب الرادود ، هسه الله ينتقم من عدنه ، ماكو ، صار نص الليل واحنه نلطم ، صاحبي طكت روحه ، لبس ثوبه وركض يم الباب وكام يصيح : ( انعل ابوكم لاابو عشاكم لاابو اللي يتعشه وياكم ) وشرد. من سقط النظام، المومن والروزخوني والرادود كلهم صاروا وزراء وسفراء ومدراء عامين ، وظلينه انا وصاحبي وكل المستضعفين حسرة علينه العشه وماي الشراب . قاطعت الحاج زعيبل وقلت له : ماذا تعني بعقلية ادارة الحسينيه والجامع؟ - فقال : بالجامع والحسينيه ماكو شي غير الحجي والمبالغات. من يسولفون عن الجنه يسونهه كلش سهله، ابسط شغله اتطببك الجنه ، ومن يسولفون عن النار يسونهه شدّه ، ابسط عمل يدخلك النار، لان هدفهم ترهيب وترغيب الناس ، حتى يبقون تحت تأثيرهم، وتشوفهم يسولفون عن الزهد، وان الدنيا زائله ، لكن همه يموتون علفلس ، ماكو واحد اكثر طمع وجشع منهم ، مايبولون على ايد المجروح ، كل شغلهم ( هات .. جيب بارك اله بيك ) ولامره كالوا هاك. هم شفت بعمرك مومن ايوزع فلوس بالجامع ؟ ابدا ، كله هات. فذولة الجماعة ( المصّاصة ) من صاروا بالحكم اتبعوا نفس الاسلوب اللي جانوا يتبعونه بالحسينيات والجوامع، كظوهه ويانه بس وعود وحجي وكل قبض ماكو، وماشفنه منهم أي تقوى او خوف حقيقي من الله لانهم ماخلوا شي مامصّوه ونهبوه ، وتقاسموا الدولة همه وعوايلهم واقرباؤهم ، وكأن هاي الدولة هي ورثهم - على اساس - (سيرثها عبادي الصالحون) وهمه عباده الصالحين واحنه طلعنه الطالحين اللي حصتنه بس اللطم والقهر والجوع . س : وما علاقة ذلك باتهام سوريا - شلون ماكو علاقة ؟استخدموا نفس اسلوب الحسينيه والجامع بدل استخدام الاسلوب الحكومي قبل يومين من ( الاربعاء الاسود ) عقدوا معاهدة ستراتيجيه وي سوريا ، في حين سوريا معروف دعمها للارهاب، وامريكا ضربت مقر للارهابيين بالاراضي السوريه، وكلهه تعرف بان الارهابيين كاعدين بسوريا ومنهه يتسللون للعراق ومع هذا سووهه حليف ستراتيجي ، لكن ورا يومين سووهه الد اعداء العراق!! هذا اسلوب ملائي مو اسلوب رجال الدولة . وياريت القضيه وكفت عد هلحد ، صاروا واحد يجر والثاني يعر . رئاسة الجمهورية تجر بصفحه ورئاسة الوزراء تجر بصفحة ثانية والبرلمان صار جنه عرس كاوليه ماتعرف ياهو العريس وياهو المعزوم . والله يا ستاد فشّلونه كدام العالم،انه صرت استحي اكول انه عوراقي . حرام العراق هيجي يصيربيه ، حرام ذوله يحكمون العراق . ليش ؟ العراق مابيه رجال ؟ مابيه كفاءات ؟ مابيه حسينيات وجوامع انحط بيهن الجماعة ونتخلص منهم؟!! مرة واحد كلاوجي طب لولايه وادعه بانه (ابن اخت الله)، حتى يستغل البسطاء . الناس البسطاء فعلا صدكوا وتحضروا لاستقباله واكرامة ، هذا حضر ذبيحة، هذا باع ذهبات مرته حتى ينطيهن لابن اخت الله ، لكن اكو واحد علماني شاطر كال للناس : اهلا وسهلا بابن اخت الله ،يامرحبه ، جثير الهله بابن اخت الله ،ياجماعة احسن مكان يليق بيه هو بيت خاله ، ودوه للجامع يم خاله خل يشبع صلاه ... عاد يستادي: ذوله ( ولد اخت الله واياته ) مال نلمهم من كل دواير الدولة ونوديهم للجوامع وانكلهم :هذا مجانكم الطبيعي ، اشبعوا صلاه وخلونه ابحالنه. وللحديث بقية ¤ لقاء صحفي مع الحاج زعيبل زعيم قائمة شفط الشفاطة (2) ¤ لقاء صحفي مع الحاج زعيبل زعيم قائمة شفط الشفاطة (1)