| الناس | الثقافية |  وثائق |  ذكريات | صحف | مواقع | للاتصال بنا |

موقع الناس .. ملتقى لكل العراقيين /  ديمقراطي .. تقدمي .. علماني

 

 

عودة وهيب
aoda50@hotmail.com

 

 

 

السبت 17/10/ 2009



لقاء صحفي مع الحاج زعيبل زعيم قائمة شفط الشفاطة
(2)

عودة وهيب

الحاج زعيبل كان حزينا لفشل قائمته ( شفط الشفاطة ) في الحصول على اي صوت في انتخابات المحافظات الماضية ، ويقول عن ذلك:( والعباس ما ظل حمّال ولا عربنجي ولا عطّال بطّال الا صوّت لقائمتي لكن الجماعة كلوا اصواتنه من هلفج لهل الفج ، وكالولي قائمتك ما حصلت ولا صوت .. طلعت حتى انه ما مصوّت لروحي !! ويكولون الأنتخابات نزيهه ).

صار ديدن حاج زعيبل ترديد عبارة ( شيشيلهم .. شيشيلهم ) ليل نهار ولما طلبت منه ان لا يستسلم قال : ( استاد: ماكو فايدة، الشاص شاص، والحمل حمل .. لو يجي (العزير) هم ما يكدر يشلعهم، ذوله صاروا مافيات، فلوس العراق صفت بجيوبهم ، وفوكاهه تساندههم دول قوية، فشلون تريدني انا وامثالي نتقارش وياهم .؟! ).
لقد قرر الحاج زعيبل اعتزال العمل السياسي بسبب يأسه من امكانية انقاذ العراق من المافيات المتحاصصة أو (المتماصصة ) على حد تعبيره ولذا فإنه رفض الادلاء بأي تصريح سياسي .

وحتى عندما قررت ان احتال عليه وقلت له انني اطلب رأيه ليس بأعتباره (قطبا) سياسيا بل بأعتباره (عطبا) عاديا يراقب ما يجري حوله، رفض قائلا :(أستاد ماكو فايدة بالحجي.. الحجي ماكله الثور).

غير ان الحاج زعيبل غيّر رأيه وقرر استئناف نشاطه السياسي لسببين احدهما سبب مباشر وهو تلقيه (ايميل) من النائبة (ميسون الدملوجي) التي يحلو له ان يسميها (الدملوجه) تعاتبه فيه على استغراقه في الحزن واليأس.

اما السبب غير المباشر فهو تدافع الاحزاب والكتل السياسيه على بيته ،ويقول عن هذا التدافع : ( يا أستاد هلأيام صرت كلش عزيز عد قوائم الشفاطة .. يوميه وجايني وفد شكل، يوم لابسين جراويات يوم لابسين عمايم يوم افندية وكلهم يريدوني اتحالف وياهم.. كتلهم عمي جا اذا كل احنه نصير بقائمة وحدة جا ليش انسوي انتخابات؟ كالوا نريد نصير كتله وحده حتى لا تضيع اصوات الناخبين !! كتلهم : خل تضيع اصوات الناخبين (ضيعة عين عودة) ، جا اصوات الناخبين احسن من فلوس النفط اللي شفطتوهه .. عمي ،انتم ما خايفين اتضيع اصوات الناخبين، انتم خايفين انتم نفسكم تضيعون .. تعرفون الناس جرّبتكم وعرفت دماراتكم وما راح تنتخبكم، فتريدون تلبدون بسد حاج زعيبل وغيره )

الهلع الذي تعيشه قوائم الشفاطه وتحفز ابناء الشعب لرميهم في اقرب (حديقة) من(حدايق) التاريخ زرع الامل في نفس حاج زعيبل وقرر ان يعيد تشكيل قائمته السابقة (قائمة شفط الشفاطة) وان ينزل الى الساحة بقوة، ووافق على اعطائي حديثا صحفيا مطولا سننشره على حلقات.


الحلقة الثانية

س : في الحلقة السابقة حمّلت الحكومة والاحزاب العراقية (المتحاصصة) مسؤلية نهب اموال العراق ونسيت ياحاج زعيبل ان الوضع الامني المتدهور هو السبب .
ج : اكو شيخ عشيرة، عشيرته صابهه القحط ، فالشيخ سد مضيفه وهام على وجهه ،تعرّف على ابن ملك الجان وراح وياه لمملكة الجان ، هناك اكتشف بان كل عشيرة من عشاير الجان عايشه على عشيرة من عشاير البشر،وهناك تعرف على عشيرة الجان اللي عايشه على عشيرته وناهبه خيراتهه ، كل واحد من هاي العشيرة (الجنية) صماخه اصماخ مومن وايده دسمة جنهه ايد روزخوني . بعد مدة الضيافة ساله صاحبه الجني وكالة : هسه آمر، بيش نخدمك ؟ كاله خويه يجني ، كل خدمة مااريد منك ، كل الاريدة منك زيح عمامك عن عمامي ، خل ينزاحون عمامك واحنه نصير بخير.
فياستادي بس خلي عمام الحكومة ينزاحون عن عمامنه احنه نصير بخير ويرجع الامان للديرة ، همه سبب كل البلاوي ولايغرك بجيهم على الامن والاستقرار
اذكرك بحقيقة وحدة لكنهه كلش مرة وماالهه أي تفسير غير الاستهتار بامن المواطن:
الاف الضباط والجنود اللي طردهم صدام من الخدمة لمعارضتهم للنظام ذوله محد رجع منهم للخدمة الفعلية،و ذولة معروفين ناس شرفاء وطنيين وعدهم غيره على العراق واغلبهم مستقلين وماعدهم أي ولاء غير ولائهم للعراق ، لو اكو حرص حقيقي على الامن جارجعّوا ذولة الضباط وسلموهم مسؤوليات قيادية .
بدل هلشي راحوا جابوا ناس ماالهم علاقه بالجيش وانطوهم مناصب بحجة دمج الميليشيات وصار الخضار عقيد، وابو اللبلبي لواء،والرادود قايد شرطة ، وفوكاهه ذوله ولائهم الاول لاحزابهم وميليشياتهم اللي جابتهم وبركستهم بروسنه .
وازيدك من البيت شعر اكو ضباط انطردوا بايام صدام لان اقاربهم بحزب الدعوة او همه يصلون ويصومون او عوائلهم متدينه ذوله هم مارجعوا للقوات المسلحة لانهم هسه ماينتمون لاحزاب المماصصة .
بروح ابوك هل معقول نجيب جنود تاسروا بالحرب ضد ايران وصاروا( توابين) وانضموا لقوات بدر، نجيبهم وننطيهم رتب عاليه ونسويهم قادة لقوات الشرطة والجيش وهمه ولاطكه بالعسكرية وولائهم للميليشيات موللوطن ،وهمه اللي يسهلون الاعمال الارهابية اللي تسويهه ميليشياتهم.
من اكلك بشي ماراح اتصدك :جابوا واحد اخرس اطرش وعينوه برتبة نقيب شرطة لانه (بدري - ياكل مايدري)!! هل هاي سوالف مال واحد يهمه امن الشعب ؟ لا عمي، هاي سوالف واحد كل همه مصالح حزبه وبس.
اتصور الكارثة ام محّين : رجّعواقسم من الضباط البعثيين للجيش والشرطة ومارجعوا الضباط المعارضين لصدام، وحتى اللي عنده واسطة ورجعوه هم خلوه كاعد عد اهله كأنه متقاعد.ليش ترجع هذا الضابط (اللي جان معارض لصدام) للخدمة وتخليه كاعد ابيته ،؟ ماكو غير معنى واحد: حتى يظل البيت لمطيره وتطير بيه فرد طيره .
لو الحكومة تريد فعلا تقضي على الاختراقات اللي تصير بالاجهزة الامنية جارجعت الضباط اللي جانوا معارضين لصدام وانطردوا وتهجولت عوايلهم.
امس زارني ضابط جان بدرجة عقيد حقوقي. تدري شيكول ؟ يكول انا متندم لاني ماصرت بعثي، لوصاير بعثي جاهسه يتوسلون بيه حتى ارجع للجيش !!احنه موضد ارجاع بعض البعثيين للجيش اذا همه خوش ولد ، لكن امن الناس يستوجب اولا وقبل أي شي اخر ارجاع الناس الوطنيين المجربين اللي ناضلوا ضد الديكتاتورية ، ذوله اولى من البعثيين والتوابين .
ليش نحرم العراق من ذوله الضباط المخلصين؟ لصالح من نحرم العراق من ضباط وطنيين ولائهم محسوم للوطن ؟ ليش ماننصف الضابط اللي انطرد بسبب غيرته على العراق؟ يعني الا توّاب يله يصير خوش ولد
عندي صديق اخر برتبة فريق وفصله النظام بسبب معارضته ومعارضة عائلته للنظام الصدامي ، وابوه الله يرحمه جان من اقطاب المعارضة، هذا الضابط المعروف بوطنيته واشترك بانتفاضة اذار (الشعبانية حتى لايزعل علينه التوابين ) هذا مرتين يصدّر رئيس الوزراء السيد( المالكي) امر بتعينه كمستشار لشؤون الجنوب لكن مكتب السيد المالكي يلغي الامر، وهذا الضابط نشر قصته ونشر الكتب الرسميه اللي المالكي موقع بيهه .ليش ؟ هل هذا تصرف ناس تحرص على امن العراقيين. هاي حقايق معروفه والناس مو غافله عنهه ، فلاتكلي ذوله الشفاطة حريصين على امن العراقيين.

س : ما رأيك بانفجارات الاربعاء الاسود ؟
ج:
اول شي انه ارفض تسمية يوم الاربعاء بالأسود، لان هاي التسميه تعني اكو ايام بيضه ، في حين ايامنه بسبب احزاب ( المماصصة ) كلهه ايام سودة مصخمة.
الثانية وبعد : ياخوية احنه طحنه بوسط عيايرة ، عيّار اعير من عيّار ،تفلت من عيّار اتطيح بأيد سختجي ومانعرف وين الصدك ،ماندري بياعيّار انصدك وعلى ياسختجي نعتمد؟

قلت له : الحكومة اعلنت عن اجراء تحقيق وعلينا انتظار نتيجة التحقيق.
هز الحاج يديه قائلا : استاد خليك من سالفة التحقيق ، هاي القوانه ملينه منهه ، كلما اتصير عمله سودة كالوا سوينه تحقيق، وتالي ماتالي ماشفنه أي شي.( نسمع رن استكاين وما شفنه الجاي)
وين صار تحقيق مصرف الزوية؟ اتلفلف بزويه وطواه النسيان ببطانية الاربعاء الاسود
وين صار تحقيق المرحوم كامل شياع؟ هم اتلفلف وراح بسابع نومه
وين صار تحقيق وزير التجارة ؟ انبلع وطار الهدهد للاردن ومناك لاهله بلندن
استاد ذوله جربزه، واحد لازم لزمه على الثاني، وشعارهم ( اسكت وانه اسكت .. )
ماكو واحد بيهم( كما يبدو ) ذمته نظيفة حتى يكدر يفضح المجرمين ومايخاف يفضحونه.
وازيدك من الشعر بيت ابو اذيه : ذوله حكامنه ( المصّاصة ) كل واحد منهم عنده ملف اسود بدولة من الدول
هذا جان يهرب سيارات من لبنان لسوريا وعنده ملف بالمخابرات السورية ويخاف من سوريا خوفة الحيّه
وذاك جان يبيع فيز بالسيدة زينب وكل فيزا بثلمية دولار، والفايل ماله عد المخابرات السورية مصخم وملطم
وذاك ( المايتسمه ) ليهسه هو وجماعته يستلمون رواتب من ايران وعنده فايل (حمل بعير) عد المخابرات الايرانية
وذاك وذاك وذاك..
يعني كلهم عيونهم مكسورة (ماخوذ وجهّم) ولهل السبب يجرّون ناعم وي ايران وسوريا وباقي الدول الداعمه للارهاب وحتى وي البعثيين هم مايندكون لان مراسيل البعث موجودين بكل مفاصل دولة المماصصة فياتحقيق ترتجي منهم ؟ خلينه ساكتين

س :ماافتهمنه، هسه انت تتهم من في تفجيرات الاربعاء الاسود ؟
ج : كلي ياهو اللي ابرّيه مو ياهو اللي اتهمه !!
كلهم متهمين ... ياهو اللي تلزمة تلاكي اصابع الاتهام اتبصبصله
اذا تكلي البعثيين سووهه اكلك ( وكفو ، سيف المجرب )،ذوله عدهم كتل العراقيين اسهل من شرب الماي،أصلا ونستهم هي كتل العراقيين وتعذيبهم، وكلش معقوله ان نتهمهم .
واذا كتلي فيلق القدس هو اللي سواهه هم اكلك( وكفو من ابو مهيدي)، والجماعة الهم سوابق لأن قبل فتره لزموا عصابة بالبصرة مرتبطه بفيلق القدس.
واذا كتلي جماعة (السيد) سووهه حتى يسقطون المالكي ويطلعونه عاجز، هم اكلك وكفو ، وكل احنه شفنه راشديات السادة( الله يطول عمرهم ) من سنة 2003 وليهسه.
اكو واحد طكله واحد راشدي كلش قوي
المضروب صاح : ( اخ سيد )
الضارب كاله : ( ولك شلون عرفتني سيد وانه لا اعرفك ولا تعرفني )
المضروب كاله ( أنا عرفتك سيد من راشديك مولانه )
فالشاهد يااستاد كلهم ماشاء الله عدهم استعداد ( للأنحراف )، واللي يوجهونهم (هم ماشاء الله) هواية، ومثل ماصار عدنه اربعاء اسود راح يصير عدنه بسلامتهم:
( الخميس الدامي)
و(الجمعة الكئيبة)
و(السبت الجريح)
و(الاحد المنكوب)
و(الاثنين الرهيبة)
و(الثلاثاء الملتهب)
واذا لاسامح الله ظلت هاي الاحزاب المتماصصة بالحكم بكد البعثيين راح كل يوم يصيرله خمسين اسم،
مثلا صديقك ايكلك: انا سافرت بيوم الاحد للنجف
انت راح تساله: يااحد قصدك ؟ الاحد المنكوب لو الاحد المنتوف لو الاحد المهلوس ..
استاد : بس الله يدري ذوله السختجيه شضامّينه من ضمّة

س : ماهو الحل برأيك
ج : الحل الوحيد: انزيح عمامهم عن عمامنه. نحرمهم من اصواتنه حته نزلغهم من الديرة ( زلغة نجاسة بكرك )
ثم ردح الحاج زعيبل هازجا :
ولوزحنه اعمامه.. الخير يعم الديرة

وللحديث بقية


¤ لقاء صحفي مع الحاج زعيبل زعيم قائمة شفط الشفاطة (1)

 

free web counter