الجمعة 16/10/ 2009
لقاء صحفي مع الحاج زعيبل زعيم قائمة شفط الشفاطة
(1)عودة وهيب
الحاج زعيبل كان حزينا لفشل قائمته ( شفط الشفاطة ) في الحصول على اي صوت في انتخابات المحافظات الماضية ، ويقول عن ذلك:( والعباس ما ظل حمّال ولا عربنجي ولا عطّال بطّال الا صوّت لقائمتي لكن الجماعة كلوا اصواتنه من هلفج لهل الفج ، وكالولي قائمتك ما حصلت ولا صوت .. طلعت حتى انه ما مصوّت لروحي !! ويكولون الأنتخابات نزيهه ).
صار ديدن حاج زعيبل ترديد عبارة ( شيشيلهم .. شيشيلهم ) ليل نهار ولما طلبت منه ان لا يستسلم قال : ( استاد: ماكو فايدة، الشاص شاص، والحمل حمل .. لو يجي (العزير) هم ما يكدر يشلعهم، ذوله صاروا مافيات، فلوس العراق صفت بجيوبهم ، وفوكاهه تساندههم دول قوية، فشلون تريدني انا وامثالي نتقارش وياهم .؟! ).
لقد قرر الحاج زعيبل اعتزال العمل السياسي بسبب يأسه من امكانية انقاذ العراق من المافيات المتحاصصة أو (المتماصصة ) على حد تعبيره ولذا فإنه رفض الادلاء بأي تصريح سياسي .
وحتى عندما قررت ان احتال عليه وقلت له انني اطلب رأيه ليس بأعتباره (قطبا) سياسيا بل بأعتباره (عطبا) عاديا يراقب ما يجري حوله، رفض قائلا :(أستاد ماكو فايدة بالحجي.. الحجي ماكله الثور).
غير ان الحاج زعيبل غيّر رأيه وقرر استئناف نشاطه السياسي لسببين احدهما سبب مباشر وهو تلقيه (ايميل) من النائبة (ميسون الدملوجي) التي يحلو له ان يسميها (الدملوجه) تعاتبه فيه على استغراقه في الحزن واليأس.
اما السبب غير المباشر فهو تدافع الاحزاب والكتل السياسيه على بيته ،ويقول عن هذا التدافع : ( يا أستاد هلأيام صرت كلش عزيز عد قوائم الشفاطة .. يوميه وجايني وفد شكل، يوم لابسين جراويات يوم لابسين عمايم يوم افندية وكلهم يريدوني اتحالف وياهم.. كتلهم عمي جا اذا كل احنه نصير بقائمة وحدة جا ليش انسوي انتخابات؟ كالوا نريد نصير كتله وحده حتى لا تضيع اصوات الناخبين !! كتلهم : خل تضيع اصوات الناخبين (ضيعة عين عودة) ، جا اصوات الناخبين احسن من فلوس النفط اللي شفطتوهه .. عمي ،انتم ما خايفين اتضيع اصوات الناخبين، انتم خايفين انتم نفسكم تضيعون .. تعرفون الناس جرّبتكم وعرفت دماراتكم وما راح تنتخبكم، فتريدون تلبدون بسد حاج زعيبل وغيره )
الهلع الذي تعيشه قوائم الشفاطه وتحفز ابناء الشعب لرميهم في اقرب (حديقة) من(حدايق) التاريخ زرع الامل في نفس حاج زعيبل وقرر ان يعيد تشكيل قائمته السابقة (قائمة شفط الشفاطة) وان ينزل الى الساحة بقوة، ووافق على اعطائي حديثا صحفيا مطولا سننشره على حلقات.
الحلقة الاولى
س: هل ستحتفظ قائمتك بأسمها السابق
ج : بلي نفس الاسم ( شفط الشفاطة ) ومثل ما تعرف الشفاطه: همه الحكومة والاحزاب اللي تشارك بالحكومة .. ذولة شفطوا اموال العراق. واحنه اذا فزنه راح نشفطهم شفط ، ونرجع المليارات اللي باكوهه ..
تتذكر من كالولهم :اكشفوا ذممكم المالية ؟ قسم لي هسه مغلسين وماكشفوا ذممهم ( ايكولون ماعدنه ذمم ) وقسم كشفوا ذممهم بس ما قبلوا احد يعرف شكد عدهم ،وخيّرهم اللي ايكولون عنه خوش ولد وعلى اساس ما بايك شي طلع عنده ربع مليون دولار (فقط) وهو جان حسرة عليه القندرة الأسلامية (المصنوعة من جلد اسلامي حلال)، زين هذا الخيّر( المايبوك )عنده ربع مليون دولار جا أهل الايد الطويله شكد عدهم ..فأحنه اذا فزنه نزينهم (حواف) ونشفط منهم كل اللي شفطوه من اموال العراق .
س : لابد ان الناس قد نسوا برنامجكم فهل تتفضل بشرحه
ج: وداعتك استادي، السياسيين همه اللي ينسون برامجهم وحجيهم وقت الانتخابات، اما الناس فما ينسون شي، ولهل السبب الشفاطة خايفين محد ينتخبهم مرّه ثانية لأن الناس تتذكر وعودهم بأيام الانتخابات وتعرف بلاويهم بعد الانتخابات ولهل السبب لبسوا اقنعة جديدة عبالهم العراقيين ازواج وراح تمر لعبة الاقنعة عليهم ، ما يدرون الناس متحلفه بيهم.
س : هل تنوون في حالة فوزكم تطبيق شعار من اين لك هذا
ج : هاي ما ينرادلهه سوعال . اول ما نفوز نسحب جوازات كل المسؤولين حتى ما يشردون وبعدين انكظهم واحد واحد : تعال ولك انت: جنت حافي ابن حافي منيلك هاي الفلوس والاملاك؟ زوعهه.
س : بأثناء حملتك الانتخابيه هم راح مثل الجماعة اتكل للناس انا خادمكم الصغير؟
ج : اذا شفتلك مسؤول يكل للناس انا خادمكم الزغير ومن هل الكلاوات، كول هذا اكبر جذاب واكبر كلاوجي.. هو يريد يتحكم بينه ويكعد على الكرسي ويكول انه خادمكم الزغير. هذا غير زمان: الخادم حمايته ست الاف وفلوسه ما تنعد والسيد ( الشعب العراقي ) بحال الظيم وحتى ماي شرب ماعنده.
س : هل تعد الناس بتحسين الخدمات
ج : ابدا .. احنه ما راح نقدم أي خدمات للناس .. احنه برنامجنه معروف. احنه نوزع فلوس النفط على الشعب والشعب هو اللي يتصرف بفلوسه.
س : هل توضح هذه النقطة للقراء
ج : كل مصايب العراق اجت من الحكومات ، لوما الحكومات جا أحنه بخير، وفوكاهه العراق دولة غنية، فبدل ما نتونس بفلوس نفطنه صار النفط نقمة علينه ، حكوماتنه مو بس تنهب فلوس النفط ، لا وتحول قسم من هاي الفلوس الى اسلحة موت واجهزة امنية ارهابية تطارد المواطن . ولكم بكتوا فلوس نفطنه ، عوافي ، اكلوا او وصوصوا، ليش تركضون ورانه وشابعينه ظيم ،جا فوك حكّه دكّه .
وهذا الوضع ( اقصد حرمان العراقيين من خيراتهم ) ما تغير بعد ان تفضلوا ( السادة والموامنه ) مشكورين بتخليصنه من نظام صدام، ظلت معاناتنه هي هي ( نفس الطاس ونفس الحمام) ، وكل الوادم تعرف بان العراق اجته اكثر من 300 الف مليون دولار من السقوط لليوم . وين راحت هاي المليارات ؟ طبعا انباكت . ياهو اللي باكهه ؟ الشعب باكهه ؟ طبعا لا ، اللي باكتهه الحكومة وربعهه ( اهل الخواتم والسبح ) . الارهاب اللي ذبح شعبنه قسم جبير منه يتمول من سرقات نفطنه وبنوكنه،(اتصور حتى البنك الخاتل بزوية ما سلم منهم) ، فاذا الحكومة حرامية واحزابنه شلايتيه فليش نخلي فلوس نفط الشعب بايدهم ؟ ليش ما نوزعهه على اصحابهه اللي همه ابناء العراق . اتصور لو موزعين ال 300 مليار دولار على 30 مليون عراقي جاحصة كل عراقي دفتر(10 الاف دولار) - دولار ينطح دولار- ، يعني اصغر عايله اتطب الهه خمس او ست دفاتر . لكن اللي حصل شنو ؟ فلوس النفط راحت لجيوب اشحيت وبحيت ومغسول الصيت، واحنه حصتنه بس اللطم.
س : طيب في هذه الحالة ، ماذا عن موظفي الدولة ، من اين ندفع لهم رواتبهم
ج : ننطيهم احريشي ، احنه ما ندفع رواتب للموظفين ،الموظفين ياخذون اجرة عملهم من المراجعين ،نخلي اسعار لكل معاملة. مثلا معاملة الجنسية بعشر دولارات معاملة الجواز بمية دولار ، معاملة الطابو بخمسين دولار ، اجرة السنة الدراسية للتلميذ كذا دولار .وكل موظف يخدم الناس ياخذ منهه اجرة معروفة. هسه هم ياخذون رواتب من الدولة وهم ياخذون رشوة من المواطنين.ماكو معاملة تمشي بغير رشوة فليش ننطيهم رواتب وهمه لازم يكمركون المواطن.
اما الوظايف الجبيرة اللي بيهه كشخه مثل الوزير والسفير وشيل ايدك فهاي الشعب ياخذ منهم اجرة يعني نبيعهه بالمزاد العلني ،اللي يدفع اكثر يحصل منصب جبير، والله وكيلك كل وظيفة راح يزاود عليهه الاف الناس لأن مثل ما تعرف هوايه ناس تحب الامارة حتى لو على حجارة، فاللي يريد يصير وزير حتى يكشخ خل يدفع فلوس للشعب ،مو منا هو كاشخ وصاير نجم بروسنه،ومنا احنه نعلف عليه ، الله ما يقبل. اما اللي يريد يقشمرنه ويكول انا اريد اصير وزير او سفير حتى اخدم الشعب انكله شكرا واصل جايك ، روح طوش الفحل احسن لك.
وللحديث بقية في الحلقة القادمة