| الناس | الثقافية |  وثائق |  ذكريات | صحف | مواقع | للاتصال بنا |

موقع الناس .. ملتقى لكل العراقيين /  ديمقراطي .. تقدمي .. علماني

 

 

زكي رضــا
rezazaki@hotmail.com

 

 

 

الجمعة 19/9/ 2008

 

حچايات من طرفنا
(2)

زكي رضا

سالفة العلم
على الرغم من ان المروحة كانت تعمل بانتظام , وتوفر الماء المثلج , في تلك الظهيرة التموزية الحارة حد اللعنة . فأن الوضع في المقهى , لم يكن على ما يرام , او على الاقل هذا ما احس به ابو سامي , وهو ينظر الى سالم خنجي . وقد ارتسمت سمات الجد على ملامحه - محتلا مكانه , الذي لاينافسه فيه احد , على الكرويته . لانه من الزبائن الدائميين , على الرغم من انه لا يتذكر , متى كانت اخر مرة , كان قد دفع فيها شيئا لابو سامي - ويحاور كريم خاور بهدوء عجيب .

وتبرع ابو سامي وعلى خلاف العادة باستكانين من الشاي لهما .
..... ياجماعة تفضلوا ها جايين على حسابي .
..... تسلم ابو سامي الورد .
..... بالعافيه , بس اكول هاي شبيكم اليوم اشو تحجون سنطاوي .
فرد سالم خنجي ... والله ابو سامي خو انت تعرف بعاوي ؟
..... اي شلون ما اعرفه , شبي .
..... تدري البارحة جان الطبك وبالتشابيه بعاوي ماخذ دور الشمر .
..... اي وشنو يعني .
فاجاب كريم خاور : لا ما كو شي بس جماعة من العوينه ضربوه وهانوه .
..... اي هسه انتو شتردون اتسوون , تردون تتعاركون ؟
فردا سوية
..... لا ,شنو قابل احنا زعاطيط , حتى نتعارك علمود موكب. لكن كلنا نتفاهم وياهم حتى بعد ليتعدون عليه . لان بعاوي هم ابن منطقتنا وهم كل سنه ياخذ دور الشمر اللي محد يقبل ياخذه بالتشابيه .
..... اي ليش لا , بس المن تردون ادزون .
..... والله راح اندز ابو مالك اللي يبيع فشافيش او وياه محمد بكم .
..... اي وشوكت انشاء الله التساهيل ( قالها ضاحكا ) .
فقال سالم خنجي ، من انهم ينتظرون صلاة المغرب , لكي يأخذ الفريق المفاوض لافتة الموكب .
..... واللافتة شتسوون بيها؟ .
..... والله ابو سامي , محمد بكم يكول عيب ومو اصول , يعني شلون احنه نكعد نحجي وياهم بالموكب مالتهم , ولافتتهم معلكه واحنا ما عدنا لافته .
..... تدرون يا جماعة (رد ابو سامي ) محمد بكم لو يصير مسؤول بالدولة يرفع راسنا .
..... مو هالثخن ابو سامي هذا شمفهمه .
..... لا اغاتي , يفتهم اكثر من هوايه مسؤولين بالحكومة , والظاهر انه واحد غيرتلي .
..... شلون ؟
..... على الاقل ايريد يرفع لافتة الموكب, يعني هو احسن من نائب رئيس الجمهورية .
فرد كريم خاور : منو عادل عبد المهدي ؟
...... هاي شنو ابو حاتم صاير سياسي .. رد سالم .
فقال ابو سامي : اي نعم عادل عبد المهدي . لان عادل عبد المهدي شفتو بالصور , من جان بايران كبل جم يوم . عبالك طالب بالمدرسة من جان كاعد يم متقي ونجاد والجماعة جان وراهم علم بلدهم .
..... زين وهو ماكو علم وراه .
لا خطيه يمكن جان يستحي , لو الجماعة بقم مقابلين يرفعون , علم الجمهورية اللي هو نايب رئيسها .


12/9/2008
الدنمارك


 

free web counter