| الناس | المقالات | الثقافية | ذكريات | المكتبة | كتّاب الناس |
الجمعة 10 / 10 / 2008 زكي رضا كتابات أخرى للكاتب على موقع الناس
حچايات من طرفنا
(5)زكي رضا
(موقع الناس)
الاطفال أعداء الله
كان كريم خاور, يتحدث بهدوء الى ابو سامي , معربا عن قلقه , على صديق عمره سالم خنجي. لانه ولليوم السادس على التوالي , كان يبدو عليه التعب , وبدا منعزلا وغير ميالا للحديث, الى الاخرين كعادته . على الرغم من مناسبة العيد , والتي اصبحت بفعل الله , الذي على كل شيء قدير , ستة ايام بدل من ثلاثة ايام , وتقسيم الشعب العراقي , الى ثلاثة اقسام بدلا من توحيده. على اساس , ان اهم اسباب قوة الشعوب , هو فرقتها وخصوصا الى ثلاثة اقسام ( شيعة - سنة - كرد ) . وبعد مشاورات لم تدم الا بمقدار الوقت , الذي صرفه كريم خاور في شرب الشاي مجانا ( طبعا ), قررا التوجه اليه سوية , وسؤاله عن سبب انعزاله , وحالة الحزن البادية عليه , على خلاف العادة.
..... الله بالخير سالم .
..... الله بالخير اغاتي , رد سالم دون ان يرفع رأسه .
..... هاي شبيك , صارلك جم يوم دائما متكتر وقهران .
فنظر سالم اليهما بعينين دامعتين , ورد عليهما بصوت يشبه الانين
..... جهال اخويه , اللي استشهد بتفجير الصدريه , وايتامه وارملته ليهسه كلشي ممحصلين . واني ما اكدرت بهذا العيد , اوديهم الى فد بكان يتونسون بيه ( واجهش بالبكاء ) .
..... هاي شنو منك ( رد كريم ), اشو صار لك ست ايام العيد , يوميه تاخذهم لمدينة الالعاب .
..... كريم ابشرفك اسكت , تره واصله لخشمي , وبس اعطس اموت . يا مدينة العاب يا بطيخ .
..... ليش ؟ .. تساءل ابو سامي .
..... والله يابو سامي شغله متخش بالعقل , منا يكلون الميزانيه حوالي 75 ميليارد دولار, او منا يكولون راح نسوي مشاريع ترفه الناس , او يومية تقره بالجرايد على فلان وزاره خصصت هيجي مبلغ , وعلان وزاره خصصت هيجي مبلغ , لفلان مشروع . او بالنهايه متشوف ولا مشروع من صدك , اي بس شاطرين بصبغ الارصفه , ويسوون حدايق زغار, والشغله حتى الغشيم يعرفه ليش , كلهه علمود البوك والحرمنه .
والا بشرفكم , شايفين حكومه تحرم جهال ايتام , ابائهم شهداء مال تفجيرات سيارات مفخخه , من دخول مدينة العاب .
..... هاي شنو, ليش انت صار لك ست ايام تروح وتجي , وتريد تكول انه ما دخلتو مدينة الالعاب.
..... اي والله يا جماعه, لو جنتو هناك جان اتزوعون دم من القهر . الاف الاطفال يومية من الصبح للعصر, واكفين ابباب مدينة الالعاب او ما يكدرون ايطبون جوه .
..... ليش ؟ ... تساءل كريم خاور .
..... والله ما ادري , يكلون اكو خلاف مالي بين امين العاصمه وصولاغ من صفحه , وبين مالك مدينة الالعاب من صفحه . منو ايريد ايبوك من منو .. متدري ؟ , بس ندري الفاس وكع براس اطفال العراق .
لا او فوك القهر , جايين اطفال ما ادري امنين , مسيحيين ويزيديين وصبه او ما ادري منو , يردون ايدخلون لمدينة الالعاب .
..... او دخلوهم رد كريم .
..... انت بطران , اني دا اكول اطفال العراق مدخلوهم , اتريد ايدخلون ذوله .
..... ليش يابه ذوله مو من اطفال العراق .
..... لا اجاب ابو سامي , ذوله مو من اطفال العراق , مشفتو اشلون ثلاثي السلطه , لغو الماده 50 . لانهم يردون العراق شيعي سني كردي وبس . او بعدين انت ليش ضايج , السنه الجايه العيد انشاء الله ايصير 12 يوم , ودزني لاند هم انشاء الله تكون خلصانه , وينطون لعائلة المرحوم تعويضات , مثل ما كالو السنه الفاتت , وتكدر تاخذهم لدزني لاند.
..... هاي شنو ابو سامي دتصنف .
..... اي معلوم دا اصنف , همه مو ذوله اللي كلبت الدنيا علمودهم بالانتخابات , وجنت تفتر بيت بيت حتى الناس تنتخبهم . اتفضل حتى الاطفال اللي همه بدول الكفار , مثل ما همه يكلون احباب الله . جماعتك داسوهم وصارو اطفال العراق من وراهم اعداء الله . فتشوف الطفل العراقي, لو مكدي , لو حمال , لو عنده جمبر , لو من طيور الجنه , لو يضرب زنجيل بموكب من هاي المواكب اللي ماليه البلد .
..... طيور الجنه شنو .
..... ذوله الاطفال اللي يقشمروهم الارهابيين , على انتو اذا فجرتو نفسكم بين الناس , ترحون للجنه , عبالهم الجنه خان جغان .
10 / 10 / 2008
الدنمارك
Since 17/01/05.
web counter
