| الناس | المقالات | الثقافية | ذكريات | المكتبة | كتّاب الناس |
الأثنين 8 / 2 / 2016 ميسون نعيم الرومي كتابات أخرى للكاتبة على موقع الناس
ام عـَـبـّاس
ميسون نعيم الرّومي
(موقع الناس)
راح اولـيــدچ يــــم عـَـبـّاس (*)
چـَـم شـاب الـراح اوهـالـشـاب
اتـحـَـزْمـَـن كـلـْچـَـن لـلخـَـضراء
جـَـرح اوهـالـيـنـزف مـاطاب
گـَـلـْب الـمـَـصيـوب ابـنـشـّاب
يـتـْـچـَـوَّه اچـمـالـَـه ابـعـطاب ؟
مـا هـَـزيـتي اولا رَبـيـتـي
ويـن ابـنـچ ويـن الأصحاب
عـريـس امـَّـه اتـهـَـلهـل عـرْسـَه
انـبـعـتـوا اشـلـون ابـصَم اتـراب
طـَـفـوا شـَـمـْـعـات الـبـدور
طاحـَـت واتـهـَـدْمـَـت لـبـواب
رَفـْـعـَة راس اونـفـْخـَـر بـيـچ
شـيـلـَـه انـتِ ابـنـصهـَه الـچـلاّب
شـوكـَـه انـتِ ابـعـيـن الحـكاّم
والـيـحـكـم ثـَـعـْـلـَـب واذيـاب
دَولـَـه اوتـخـلـق بـالأزمـات
مـَـعـروفـَـه اولـيـش الأسـبـاب
يـوم اگـرَيـّـب مـامـش راتـب
تـكـفـي الـخـَـزنـَـه اولـلنـواّب
يـم عـَـبـّـاس الـدنـيـه اتـدوهـن
يـــــوم اويـفـتــَـــر الـدولاب
مـا يـحـمي الـخـايـــن دولار
لا أسـواراولا خـلاّن اولا أحـبـاب
راح اولــيـدچ يــــــم عـَـبـّاس
چـَـم شـاب الـراح اوهـالـشـاب
(*) ام عباس : احدى امهات ضحايا سبايكر الذين باعهم المالكي مع الموصل
ومجزرة سبايكر هي مجزرة جرت بعد أسر طلاب القوة الجوية العراقيين من قاعدة سبايكر في يوم 12 يونيو 2014، وذلك بعد سيطرة تنظيم داعش على مدينة تكريت في العراق بعد يوم واحد من سيطرتهم على مدينة الموصل، حيث أسروا 1700 طالب في القوة الجوية العراقية، وقادوهم إلى القصور الرئاسية في تكريت وقاموا بقتلهم هناك، وفي مناطق أخرى، رميا بالرصاص، ودفنوا بعضهم أحياء
شباط / 2016
ســــــــــتوكهولم