|  الناس  |  المقالات  |  الثقافية  |  ذكريات  |  المكتبة  |  كتّاب الناس  |
 

     
 

الجمعة  15  / 6 / 2018                       د. مؤيد عبد الستار                            كتابات أخرى للكاتب على موقع الناس

 
 

 

جاسمية تحرك گلب ابو جاسم .. تخسر ما تخسر بالجير

د. مؤيد عبد الستار
(موقع الناس)

مشهد تمثيلي

انتشرت فوضى الانتخابات العراقية منذ اليوم الاول الذي بدأت فيه مفوضية الانتخابات ( المستقلة ) اخذ زمام المبادرة لتوزيع المراكز الانتخابية وتعيين الموظفين واستخدام الاجهزة المستوردة لانجاز الانتخابات بالطرق الحديثة التي تعتمد على التكنلوجيا والاجهزة الكومبيوترية والانترنيت بدلا عن الطريقة القديمة التي تعتمد على البصمة والطمغة وعلى حـد قول المصريـين ( الدمغة ) وهي فعلا تؤدي معناها في اللهجة العراقية لان الدمغة في العراق تعني ضربة على الرأس وكان الله في عون المطموغـين والمدموغـين .

ما ان حطت صناديق الانتخابات في المراكز الانتخابية حتى راح اعوان المرشحين الى المجلس النيابي شحذ سكاكينهم واستعدوا لنحر الخراف والاغنام والابل احتفالا بنجاح ابناء عمومتهم ممن ضمنوا دخول صناديق الاقتراع بحجة شرعية ومصادقة المفوضية سواء اراد قاضي الشرع او لم يرد قاضي الغرام ، وحجة كل فريق من اصحاب النواب ان في التاريخ سند شرعي لما يقومون به ، اذن فليهب شعيط ومعيط وجرار الخيط لتلاقف المقعد الانتخابي ليقعد عليه اصحاب اليمين ماشاء الله من السنين ، وليذهب المواطن العراقي الغلبان الى الجحيم ، جحيم الصيف وجحيم الكهرباء قبل جحيم الاخرة فتلك جهنم التي اعدها الله سبحانه وتعالي لاولي السلطان من الظلمة والطغاة وان غدا لناظره قريب.

جاسمية تحرك كلب ابو جاسم : تخسر ما تخسر بالجـيـر

- يبين اليوم جاسمية ما عاجبج الوضع!
* يا وضع ... اشو الدنيا مكلوبة !
- هم كلبتيها .. شنو ..شصاير .. قابل مراكبج غركانة !
* مراكبي .. ها .. ليش مو صوتك الانتخابي ... اشو مغلس ؟
- كافي بسامير جاسمية .. عليمن مغلس .. هي شجم صندوك وشجم جهاز احتركن .
* لا بالله .. شجم صندوك .. اي .. هنيالها لامك .. مخازن المفوضية كلها احتركت.
- لا .. خبرني ( مجلوب السلف ) كال شجم صندوك واجهزة احتركن و مو مشكلة .
* هم اجينه على مجلوب السلف صويحبك .. مو خسر بالانتخابات بعد شنو لازك بالمفوضية .
- شمالج... يا جاسمية .. مجلوب يكول راح يصير الحساب من جديد وعلى الاكثر اله نصيب .
* يعني نعالك التسكام راح يصير مال وتستلمه راس الشهر .
- الله واكبر عليج .. ما تجوزين من النعال التسكام .. عمي بطلت ما اريد لا نعال ولا بشت .
* اذا ما تريد النعال ..جا ليش جايب لي بشارة مجلوب وتكول راح يصير له نصيب بالحسابات الجديدة .
- هسه انت اصبري علـيّه ....انطيني فـنـتـك .. تشوفين شلون راح اصير حماية لمجلوب من يصير نايب .
* ها .. هسة بينت النية الكشره .. مو بلاش .. رايح ويه مجلوب وجاي ويه مجلوب .
- يعني .. انت ما تفرحين من يصير النا ضلع بالحكومة .. اشتريلج عبايه وجرغد بريسم ..واخليج تمشين عالمودة .
* ليش يابه شفتني .. اني ابيع صوتي علمود جرغد بريسم .. والله لو ميت جرغد .. وحتى لو يصير الحساب
من جده وجديد للانتخابات صويحبك ما يطلع له سهم .
- فال الله ولا فالج .. انتي ليش عريضي بكل شي .. مجلوب هم صديجنا وهم من عشيرتنا .
* ما يفيدك هذا الحجي .. ماطوله ما يمشي عدل .. ويفرهد مال الله وعباده .. ما ينجح لا بالانتخابات ولا بالدنيا ولا بالاخرة .
- جاسمية .. بالدنيا افتهمنا .. لاجن بالاخرة شلون تحكمين على الرجال .. قابل انتي جايبه خبر من رب العالمين.
* لا .. لا خبر لا جفيه لا شربت .. صويحبك ما يربح لو تطلع نخله براسه .
- لا .. هضيمة يخسر ، واذا خسر احنا هم راح نخسر وياه .
* ابو جاسم .. لا تكول احنا .. كول انا اخسر نعال التسكام .
- هاي شلون طلابه .. ابتليت على عمري وخليتج تعرفين سري . آخ مني .. ما اجوز .. اعمه كلب .
* اكلك ابو جاسم سالفة صويحبك والخسارة مثل سالفة عبود الكرخي ومحمد الكبنجي .
- هاي السالفة شنو النوب .. اشوف كمتي تشمرين بعيد .. شجابج على عبود الكرخي ... صاير حجيج تكرزل .
* اي مو عبود الكرخي اتشارك ويه محمد الكنجي بتجارة الشعير ، اشتروا شعير وباعوه بخسارة .
- هاي شجابها على سالفة مجلوب والانتخابات .
* اي الها رباط لان عبود الكرخي كتب شعر وغناه الكبنجي ، يكول :
من كايلك تشري شعير / تخسر ما تخسر بالجير
شعيرك يخسر يا مصخم / قيمة نصه ما تلزم
انصحتك اترك لا تندم / لو مطرب لو تاجر صير
تخسر ما تخسر بالجير


 

 

 

 

 

 

          موقع الناس .. موقع لكل العراقيين /  ديمقراطي .. تقدمي .. علماني

             جميع حقـوق الطبع والنشر محفوظة لموقع الناس                                                              Copyright © 2005-2012 al-nnas.com - All rights reserved         

  Since 17/01/05. 
free web counter
web counter