|  الناس  |  المقالات  |  الثقافية  |  ذكريات  |  المكتبة  |  كتّاب الناس  |
 

     
 

الثلاثاء  28  / 2 / 2017                                   كامل الركابي                        كتابات أخرى للكاتب على موقع الناس

 
 

 

الانصار القدامى

كامل الركابي
(موقع الناس)


وانت تتذكر
اباب الوادي
من مطرت علينه
وصرنه نركض للمغاره
نريد بس نحتمي بيها
وانت چنت اتدخن
وبيدك جگاره
وصحنه بيك: شبيك طفيها
الكهف ما يحتمل دخان
وانت معاند بيومك
رحت جوه المطر تصرخ:
حرية ومطر
واتبلل واغرگ
ولا تسمع كلام
يعارض الحريه
ويكبحك
واحنه من المغاره
عليك بس نضحك
ونضحك

وانت تتذكر الورده ؟
وردة النرجس
على الصخره
بنداوة روح تنبت
ويظل كل وادي مراني
كل نهار وليل
يتنفس عطرها
و
شجرة الجوز القديمه
ام جذع ما ينشبگ
بيدين سته
بالشته وبالصيف
حدر اغصانها
اتوج منقلتنه
وبعده
ما خادر الچاي
انت مدري شلون
تشتم ريحته من بعيد
وتگول وكتي
حتى سمينه الوكت
وكت ابوطالب
وصار كل واحد
يجينه يريد يشرب چاي
يسأل
هذا مو وكت ابوطالب؟

وانت تتذكر
حبيبتنا الجميله
ام عصام ؟
شكفته غرفتها
حدر جنح الصخور
هي تطلع
من يجي البياع
من قرية بعيده
هي توگف بالسرة
واحنه وراها
امفلسين
هي من تشتري احنه
نگول للبيّاع :عمي حط بعد
آنه قوطية لحم
وآنه باكيت جگاير
وآنه جبنه امعلّبه
وهي تسمع
ضحكه
وبطيبة خواطر
عنّه
تدفع
مو بدينه امفلسين

وانت تذكر مام احمد
نريد ع القمه نروح
هناك يتحقق حلم
احنه خذنه حماره سلفه
ورحنه
فوگ
اهناك
تلفزيون ع الطاقه
وگعدنه
وهو باللاسلكي يسأل
الف مره
شلونه مو تعبان ؟
لا والله تعشه
وشرب چاي
وگاعد ويانه
يتفرج عل الفلم !

وانت تتذكر ابو سامان
من يصعد يغني
يظل يغني
يظل يغني
حتى كلها اتضوج
ويگولون انزل كافي عاد
هو ما يسمع
تروح الناس عنه
وهو وحده
يظل على روحه
يغني
الانصار القدامى
بالفرح
من يلتقون
بالوطن
لو بالشتات
عايشين بروحهم
ع الذكريات !

 

 

 

 

 Since 17/01/05. 
free web counter
web counter