|  الناس  |  المقالات  |  الثقافية  |  ذكريات  |  المكتبة  |  كتّاب الناس  |
 

     
 

الأربعاء  27  / 3 / 2019                                   كامل الركابي                        كتابات أخرى للكاتب على موقع الناس

 
 

 

قصايد جديدة

كامل الركابي
(موقع الناس)



الثلج

الثلج ذاب
وذابت الروح، المعاني، والصروح
اللي بناها الثلج من نسج الخيال
گبل مايترك المعطف على الارض ويروح
وذابت من اطرافها
وسخنت
حميميه ابعلاقتها وصدقها
الكلمات البارده الچانت تغلِّف بالثلج صفحة الروح
وطلعت الأعشاب، خضره
ولوِّنت عتبة الباب
والعصافير الصبح عدها يقين الثلج ذاب
الورد بس الورد يهمس: بعدنا
لا بعدنا
مو وكت ملگه الاحباب
ماطلعنه
من يگول الثلج ذاب ؟

حوار

الثلج هذا اليوم
فجأة
نزل ع الشجره
تجاور
نبته ع الشباچ، مايفصل رصيف
وبين غصنين
وحوار الخايفين
اثنين عصفورين
واحد :
حيل مصدوم: الثلج ينزل اليوم
البارحه
الجو مشمس وصافي ونظيف
وصاحبه
ايطمّنه
بود، وكل محبه :
لاتخاف
اشبيك خايف
تره هذا ثلج صيف !

سؤال

هو من فيض
الاحساس
روح
يغمرها النعاس
تلتحف
بالدمع
دمعه
وترتشف
حكمة الأفعى
وماتنام
بغير كاس؟

تعويذة

حتى لايصعد بعد اكثر ضغط دمه
الكلام :
الملح يصعد نخله لآخر سعفه بيها
يفترش فيها وينام
العش فقير بلاحبوب
يقفل الباب اعلى نفسه
ويدعو للهجره
الحمام
وخاف ينسى
على جناحه
بخيط اخضر
يربط
ابصرّه
تعاويذ
الإمام !

أرق

آخر الليل
الثلج
يرسم بياضه
من بحيرات
وصدَف
ويرسم بلونه
الوحيد
لوحة الروح
الغريبه
موّقعه بأسم : الأسف
ورحت انام
ومن خَزف
عالي السرير
وماغفيت :
مو سريرك
ذاكَ ناصي
وچان
من خوص وسعف !
 

 

 

 

 Since 17/01/05. 
free web counter
web counter