|  الناس  |  المقالات  |  الثقافية  |  ذكريات  |  المكتبة  |  كتّاب الناس  |
 

     
 

الجمعة  12  / 2  / 2016                                   كامل الركابي                        كتابات أخرى للكاتب على موقع الناس

 
 

 

قصايد گبل راس السنة

كامل الركابي
(موقع الناس)




خيط

الخيط
مو من ثوب
وتشوفه العيون
ولا هو حايز
موهبة ريشه
ويطب ارض الفنون
ولا هو نازف
من وميض الراس
ونشبهه بجنون
ولا هو من الروح
حتى
نگول
سر الحب
دفين
ولا هو طالع
مثل شعره
من العجين
الخيط
من الذات
يتصور معاناة
و كأن
بعيونه جمره
وهو اصلاً
خيط
تشكّل وانهدم
من وهم خمره!


الرغبة

ترتسم بعيونك
الفكره الغريبه
جايه من الرغبة
آخر ليل
مدفونه
بعيده
وچان حاجبها
النهار
المستحيل
الفكره
گطره
تريد توگف
من زغرها
بوجه سيل!


أولوية

گبل ما يرتخي
الراس
وتعترف
للناس بالحب
بالدموع
يضيع حسك
اعترف اول
النفسك !


تعارف

صبح
والغابة الصديقة
استغربت
من شافت عيوني
يشط بيها الخيال
والثلج يلبس رداء
من الخريف
ويغدي مثل
العشب
اخضر
هي گالتلي : ثلج
شتسوي جاي؟
الفطر
لا
جذر الفطر
حدر الثلج
نب وتبسّم :
عرّفتني بأصدقائك
مرحبا!


السهرة

بالسنه التعبرنه
مثل الطير
مِسرَع
يا حبيبي
وين ما تسهر
اجيك السهرتك
وارفع الكاس
الكريستال
النبيذ
بصحتك
واكتفي من الگعده
كلها
بنظره
معجونه
بحلاوة ضحكتك
انت بس لا
تنسه
وجه الصبح
دايخ
وتشرب
من ايدين غيري
گهوتك !


تناصي

الزمن ع الشجر
مر
اخضر
بلون الربيع
ابيض بلون
الشته
اصفر
بلون الخريف
سايح
ورايح بعيد
ع البحر
بألوان
صيف
ومر علينه
انت وانه
احنه ماشفنه
سمعنه الصوت
وتحسسنه
مر بينه
مثل طلقة
رصاصي!


الكلمات

الكلمات
موجه
من بحر الحلم
اخضر
تعافت من
جزرها
وعاشت
ابمد
وبسهرها
تعود تشتاق
الجزرها
وللشحوب

الكلمات
خيوط
بيها تحوك أُم
ثوب الابنها
مسافر
بحزنه
وحيد

الكلمات
من وجه ثاني
خيوط
منها
قمصان المكاين
واجهات
للمحلات
الرخيصة
تنتخم بيها
الشوارع

الكلمات
الوان يتداخل
نبضها
وترتحل
لابعد مسافة
والعليك
تكتشف
لونك الضايع
وبشغف منه
تظل ترسم
على اللوحه - القصيده
الكلمات!


مكاشفة

لا تگول :
آنه اشتهيك
وأحلم
بكل لحظه
بيك
شفتك من بْعيد
بالبار القديم
منزوي
وتهمس بأذن
الساخنه
السمره
الامازيغية
وتئن بخفوت
راح اموت
من كثر
ما اشتهيك
وأحلم
بكل لحظه
بيك !


هامة

هاگد
تشتمل
منك صفاتي
ارتّل اسمك
بمعبد حياتي
لاتختزل
روحك بروحي
ولا تستدل
عني
بجروحي
الماي
وجهك
ماخطف لون
طعمك عذب
بارد
بالعيون
تغتسل
بيك الروح
من
قيح الخطايا
وتنفعل
من تتطلع
بوجه المرايا
وتشتعل هيّ
بثوب من طين
وتنشتل
رايه
على
الحياطين
مكتوب بيها
شگد عذابات
ما تنحني
لو وطت
هامات!

 

 


 

 

 

 Since 17/01/05. 
free web counter
web counter