| الناس | المقالات | الثقافية | ذكريات | المكتبة | كتّاب الناس |
الخميس 3 / 3 / 2016 عباس طريم كتابات أخرى للكاتب على موقع الناس
يلجنتوا مثلنه ، اسنين متغربينعباس طريم
(موقع الناس)
يلجنتوا مثلنه , اسنين متغربين
تعبانيين , جوعانيين
ومفلسين
ركاظ امن الصبح , لمن يصير الليل
واترجعون من كثر التعب
خاوين
نار الظيم , خلتكم تركتوا الدار
والكل احتظنكم , لان
مظلومين
وصار الكم شعار , العدل بين الناس
وجنتوا بهالشعار , وغيره
متحزمين
وعاهدتوا الشعب , بعد التعب يرتاح
وكلتوله انتظر , اهل العدل
اتين
جنتوا اضعاف حال , المشتكى ل اللهّ!
ايمان ورجوله وغيره
مليانين
رويتبكم فقط , للبيض والخبزات
وتأمين الشكر , والجاي بي
وطحين
والاكل المفضل جان , بيض وجاي
والمحروك اصبعه الصبح
لو ناسين؟
محيسن , بيسكل عده , بلايه ابريك
وكل ساعه اوكع بالجيحه
وسط الطين
وارويضي مشي , امخلصهه رايح جاي
وايغني , البخت يا ناس اجيبه
امنين
ومزيعل , ايجيبه الباص , ويرد بيه
حافي , ويشتري الجاي وشكر
بالدين
جنتوا من الظلم ! تشكون , ومن العوز
وابحال العيال وامره
محتارين
هسه الله ! فتحهه , وصرتوا الحكام
جا وين العدل , وين الشرع
والدين؟
فرغتوا الخزينه , وشلتوا كل المال
وديتوه , الندن والمجر
والصين
وصار اريوكم , تكه ولحم تشريب
واكلكم صار , بالمعلقه
وبالسجين
عوايلكم ارتاحت , تصرف ابهالمال
وصرتوا ابخير هذا البلد
متنعمين
العراق اصبح فقير, وانتو اغنه الناس
واصبح كل عراقي ابهالبلد
مسكين
دمرتوا الوطن , من كل نواحي البيه
وخليتونه بس نشتم هوه
وعدلين
وازداد الفقر , والباطل ابسيفين
عالحك صال صوله , وقسمه
النصين
والرشوه اصبحت بالبلد , واقع حال
واتشتت شمل كل
العراقيين
ايتام وارامل , للسماء اتصيح
تدعي ,ابحركه واليسمع ايكول
امين
متخافون ربكم ! بكتوا هاي الناس
وخليتوا الوطن محصور, بين
البين
من يكتب , شراح ايسطر التاريخ؟
وانتم كل فعلكم للشعب
موزين
وين اوعودكم , وين الحجي المعسول؟
وين اعهودكم؟ , والعهد للحر
دين
وين الدين , وين العدل والانصاف؟
هذه الوطن مطعون ابالف
سجين
هج الشعب , وابلاد الكفر حظنوه
ولان عدهم عدل , صاروله
خد وعين
من يا طينه انتم , ايها السادات؟
ما شفنه مثلكم هيجي
لغافين
ما يسلم الظالم ! والله ! بالمرصاد
واحنه اشهود ضدكم , للابد
باقين
حليم الله ! , وانطاكم مجال اهواي
وعقاب الله ممكن , ما يكون
الحين
احنه اسلام نؤمن بالله ! والقران
والقران كال : الحكم
عين ابعين