| الناس | المقالات | الثقافية | ذكريات | المكتبة | كتّاب الناس |
الأحد 29 / 5 / 2016 عباس طريم كتابات أخرى للكاتب على موقع الناس
الى مدرسة الشعر , الشاعر الكبير , عريان السيد خلف
يا هو الكال ابن سيد خلف ,عريان
عباس طريم
(موقع الناس)
يا هو الكال ابن سيد خلف , عريان؟
وهوه امن الفخر, لابس اثياب
الوان
+
سيد, من تشوفه , اتشوف بيه انسان
من ساده, الشرف لبيوتهم
عنوان
+
حاضر للجويده , وتحجي بيه الناس
لا يغدر بخوته ولا هو
بالخوان
+
وشاعر , يعجن الجلمات بالمعجان
ومن ايلين شعره, ايقدمه
للفران
+
رمز , والرمز من حكنه نفاخر بيه
ونعتب , لو كعدنه ابكعدة
الديوان
+
صوره , وللثقافة وللادب مفتاح
لدروب المعارف , بي انفك
بيبان
+
واتظل صورته ابخارج بلدنه اعلام
ناجح من صدك , ويشرف
الاوطان
+
اي عريان ..
عفنه الوطن , من جان الظلم منشار
شردنه ابخوفنه , لاقرب بلد
عمان
+
تقاسمنه الهموم , ونمنه ويه الضيم
وشفنه امن القهر , ومن المذله
الوان
+
شفنه الانكسار , الجنه نسمع بيه
شفناه بالعيون , وبالوجه
ما بان
+
حافظنه اعله اسمنه, ونمنه وسط العوز
ولا دكينه باب , وصحنه
عالجيران
+
واللي ايعيل بينه , ما نرد اعليه
جنه انعيش وياهم بلايه
السان
+
شفنه الوليه شوف العين من الناس
وحسينه ابوكتهه , ابعازت
الخوان
+
تجاوزنه الصعب , بالصبر والدمعات
وبجلمه , التطيب خاطر
التعبان
+
وربك سهل انه , وعادت انه الروح
وبلحظه , الصعب والجان يتعب
هان
+
وسافرنه , اوصلنه لديرة العم سام
وتلكونه الكفر, بالخوخ
والرمان
+
نسوان وزلم , ومحملين اشكال
حمران الاجونه , وشكر
مو ملحان
+
وشفنه الطيب عدهم , والعطف واللين
والحب والعدل والرقه
والايمان
+
وتذكرنه الجماعه , لجانوا ايكولون
ذوله اليوصل الحد مايهم
غركان
+
وظلينه نلوم الكال , بيهم شين
وعجيبه, اشلون وصفهم كفر
خشان
+
عشنه ابوسط عالم , جنه نحلم بيه
يقدر كل اديب وشاعر
وفنان
+
مصداقيه بيه , ويفتح الابواب
للي يجتهد, وايصير عالي
الشان
+
وانته خو اجيت , وشفت عز البيه
وكل احنه درينه, ابجيتك
لمشكان
+
بلد مامون , وليلعب ابذيله اهناك
حتمية مصيره, ابداخل
القضبان
+
والمسؤول بيه , اليرتشي ويبوك
يعتبرونه بالدستور , عدهم
خان
+
يشهرونه شهيره , ابمجمع الاعلام
ويوميه ابجنل , مدكوك بيه
اعلان
+
وما عدهم وزير , ايظل عشر دورات
وكل دوره ابوزواره , اتكول
سوبرمان
+
أي عريان ..
نرجع للوطن , والصار بيه اليوم
ولياحد يظل هذه الشعب
جوعان؟
+
من اغنه البلاد , امواله تكفي الكون
افلس, ينتظر من الدول
احسان
+
واموال البلد , حملهه هذه وذاك
امام الناس , تتحمل عله
البعران
+
وتاريخ العراق , الينحنيله الكون
باعوه النشامه , ابأبخس
الاثمان
+
واظن كل الخلايك سمعت التصريح
واللي اطلقه لكل البشر
مشعان
+
وكال اني حرامي , وحالي حال الكوم
ابوك وارتشي , مثل الربع
في ان
+
وين الدوله , وين الدين والاخلاق
وين اللي يطبق سنة
القران؟
+
يا عريان , يا صوت الامس واليوم
يلتحله ابكصيدك , نغمة
الالحان
+
موش انته عكيد الشعر , ينشد بيك
ظهر الشعب بالشدات
لو غلطان؟
+
موش انته, الصلت صولات عالغمان
الغدروا بالسفينه وعافوا
السفان؟
+
موش انته الجلمتك , ساعة الشدات
يوم الوطن يحتاج الزلم
بركان؟
+
موش انته لسان الشعب,وكت الضيج
والسان الشعب وكت الصعاب
ايبان؟
+
لياحد السكوت , اعله اليبوك الناس
يتحاشون اسمه , ويذكرونه
افلان؟
+
لياحد الشعب يسكت عله الباعوه
واظن ذكر الحقايق ,هذه يومه
وحان؟
+
أي عريان ..
هم للشعر موقف , من تشب النار
ويوصل للبيوت , ويدخل
الدخان؟
+
هم للشعر موقف , من تضج الناس
اتصيح الله واكبر , من ظلم
علوان؟
+
اذا الميزان طاح , وعدل ما ظل بيه
شيسوي الشعر , ويعدل
الميزان؟
+
سألتك وانته بيرغ , للشعر فنان
وشاعر صدك شاعر , موش
جان الجان
+
شني موقف الشاعر من يشوف الناس
من هذه الوطن , حصتهه بس
ادنان؟
+
لياحد السكوت ؟ الشعب شاف الضيم
ومن الموت , شاف الوان
يابو الوان
+
عزرائيل حول , سمع صوت الغوث
برجليهم اجوه .. من كثرة
الحرمان
+
نصب عدة الصيد , اوفرش درب الموت
اوطاح انه خنك , يا خويه
يا عريان
+
نشرد وين كلي : لياجهه ليا صوب؟
شرد للصين منه , وما سلم
حسان
+
انملت ارض العراق , اكبور فوك اكبور
وصار اغنه رجل بالعالم
الدفان
+
ما ظل بيت خالي , من البجي والنوح
والهم والتعب والقلق
والاحزان
+
كل ساعه ودوت , وانخبط دم ونار
جن الشعب , عايشله ابوسط
بركان
+
من كثر الكتل , حال العراقيين
اشبهه , بالسوفيت الواجه
الالمان
+
اي عريان ..
الشعر, جلمة شرف تنكال وكت الضيج
وصاحبهه يظل تاريخ
للاوطان
+
وانته الجودك , امن الحكم , والاشعار
التعزز هممنه , ابكل وكت
مليان
+
والشاعر , قصيدة اتفجر الجلمود
وصرخه , ايظل دويهه ايحرك
الوجدان
+
لا تكطع نهر , عودنه صبح وليل
يروينه , وابد ما خله كل
عطشان.
+
اي عريان .. اي عريان