| الناس | المقالات | الثقافية | ذكريات | المكتبة | كتّاب الناس |
الثلاثاء 26 / 5 / 2015 عباس طريم كتابات أخرى للكاتب على موقع الناس
برلماني جميلعباس طريم - اريزونا
حجاي واجانه ابقاط وبربطه
يراوينه الذهب ويبيعنه الحنطه
حديثه امبين امنقيه ومضبطه
جميل وشاعري وما بيه كل غلطه
وراه ازلام كل واحد جهاز اوياه
ونظارات سودة امظلله وجنطه
وقاط اسود ابوسطه احزام من احزام
والورور امبين لازك ابوسطه
يتلفتت وعينه ادور بين الناس
وكلمن يوصل العد صاحبه ايلكطه
ما جنهم حرس جنهم اذيابة ليل
متحضرة السفك كل جدم يتخطه
سولف عن الود والدين والاخلاق
وعن رب العباد ورحمته وسخطه
وكال اني رقيق وعندي بالبستان
عصفور وغزال وبلبل وقطه
افرح من اشوف الفارة والبزون
وارتاح امن اشوف البشه والبطه
انساني وحقوق البشر والحيوان
اتحلم انام ابظله واتغطه
احنه اهل النفط والمال والمفروض
نتريك زبادي وقيمر وقشطه
والعرموط والتفاح والرمان
كله انجيبه حد البيت وانصفطه
وكال احنه العراقيين كلنه اخوان
نعدل اللي يزل ونسامح اليخطه
يشهد ربي بابي وكلبي مفتوحين
الكم بالاخص اليوكع ابورطه
بلا موعد تجوني وانتو اهل البيت
وانه اللي يقدم الزاد ويفرطه
والعنده سجين وحار وين ايروح
لا يحتار احنه انطلعه اله ابشخطه
اعاهدكم من اذنه انجيبه الستقرار
وانجر الامن من زيجه وانضبطه
والماخذ قرض ويشوفه حيل هواي
لا مانع لدينا سادتي انقسطه
والشارع البي طسات من هالعين
واجب نفرش السبيس وانبلطه
اني اترشحت للبرلمان اليوم
عونتكم اريد الواضحة النشطه
واللي ينتخبني ابشرط من هاليوم
اوقعله واكول اموافق ابشرطه
واللي ينتخبني اولاده ينقسمون
نص عالجيش اعينه ونص عله الشرطه
واليرشحني وايخط اسمي ما انساه
احفظ موقفه واتشرف ابخطه
ذكر كل النقاط التعجب الجمهور
ما ظلت عليه تعتب ولا نقطه
اخيرا حمل روحه وصاروسط الناس
اشر للمصور كال اخذ لقطه
ورشحناه وصار ودارت الايام
وخلصهه المرشح سنطه في سنطه
راح حسين زاره ودك عليه الباب
واخذ وياه الفايل حطه جوه ابطه
وكلما يسال يكلوله ما موجود
زار القاهرة ومجتمع في طنطه
وبعد مدة رجع وحسين يترجاه
محمل فايلات من الربع صفطه
حسين امتاني ما يتحرك امن الباب
ما دام الفلافل يمه والشطه
طبوله الحرس كالوله حجي حسين
لازك سيدي شتامر شني الخطه
شتامر سيدي ندعوه يشرب جاي
ونشيله اعله راسه بحوضنه انغطه
لو نطيه درس كل عمره ما ينساه
وانحطه اعله راك الباب ونربطه
شتامر سيدي انعنع اضلوعه اتريد
لو دفره اوعجل ونعيدله الخلطه
لو كلما يجي ويسال اندفعه انكول
باليابان لو بالصين ونفحطه
هذا امسودن وصدك ابحجيك ذاك
يوم السولفت عالقطه والبطه
غضب جدا النائب صار مثل النار
ظل يرعد رعيد وصاح من سخطه
اطردو كل بعوضه ايصير يم الباب
وياويله اليكول اشوزع وشنطه
صارت عندي جلطه من التعب وحسين
وامثاله سبب في هذه الجلطه
يوميه ابلد من اجل الستثمار
والاخ كاعد ابلا شغل يتمطه
وزعنه الشغل عالاهل والخلان
ما ظل عدنه شي ما يفهم الاسطه
قابل عدنه مكتب خاص بالتشغيل
كولو ابروح ابوكم وين دنحطه
بعد لحد يجيني انقلعو من الباب
والعباس كلمن يوصل انبسطه
وشرد مثل الغزال احسين لمن شاف
مجموعة اجته ورايده اتشحطه
وعاد الشهم حافي وصاح عالوصوه
عرايضكم اخذوهه ..اوصار بالوسطه
وصاح اباعله صوته اعله الجمع يا ناس
شحتوني ابتواثي اصحاب ابو القشطه
والعرموط والتفاح والرمان
شو صارن تواثي وراشدي وسقطه
والما يصدك ابعينه يريد ايشوف
خلي ايروحله ودين النبي ايسكطه
واليجرب .. ادكن رهن انه اوياه
اذا مو كتله ياكل تاخذه الشرطه