|  الناس  |  المقالات  |  الثقافية  |  ذكريات  |  المكتبة  |  كتّاب الناس  |
		الخميس  17 / 3 / 2016                                 عباس طريم                                   كتابات أخرى للكاتب على موقع الناس
		المعلقة الاطرمية الى كل من سرق اموال شعبي , واوصل الوطن الى حالة الافلاس. والقصيدة .. لا تقصد شخصا بعينه .. بل كل الفاسدين والحرامية الذين احالوا الوطن الى ركام . انته فعلا يا اخي اتحب الرسول؟ عباس طريم (موقع الناس)   انته فعلا يا اخي , اتحب الرسول ؟ وانت من اتباع سيدنه علي؟   صار عندي يا اخي الطيب , فضول وشك , واريده ايزول عني وينجلي   جاوب ابلا ؟ , حته ما نعتب عليك وحيل نعتب , لو كلت : اهواه بلي   جاوب ارجوك؟ , وعلى ضوء الجواب رايدك تسمع اباذنك, ما يلي :   جان ابو القاسم , يسمونه الامين الصادق , اينادوه ابعهد الجاهلي   بالنزاهه انعرف ما بين العباد وصار اسمه امقدس , بكل محفل   خطه واضح , بالعداله وما يميل الدنيه لو مالت , يكللهه اعدلي   وجان من ينطي حقوق المسلمين المستحق فعلا ايكون الاولي   وجان حيدر عدله , من عدل السماء وايده بيضه , والشرف واضح جلي   ومن اخوه , طالبه ابمال امن الخزين وكله اريدك يا علي اتساعد هلي   اعتذر منه وكال : اسف يا عقيل هذه مال المسلمين, اوموش الي   وخاطب الدنيه علي : واياك كال لا تغريني بطرف -ن اكحل   غري غيري , انه طلكت الحياة ولا تظني ارجعلج وتتأملي   هذا حيدر , عاش عمره اعله الكفاف وجان كلبه من الطمع , صافي وخلي   ما ترك بالديره , محتاج وفقير يشكي همه ابليل , للرب العلي   في ضمير الناس عاش , اوخلدوه واكرمه التاريخ بانواع الحلي   كلي عندك صفه اتقارب للرسول؟ لو الحيدر , حته اجاوب سائلي؟   يا صديقي , انته حملت الجمال ابمال شعبك , كلت كل هذه الي   وانملت بره البلد , كل البنوك من حلال اعراكنه الطيب ملي   وهدمت بيدك وطن , اسمه العراق وليكلك : خاف ربك يبتلي   ما كو شي منك خلص , حته العقود كلمن ايوقع , اتكله اكتب شلي؟   تامر وتنهه جنت , مثل الملوك اتهدد النجمه , وتكللهه انزلي   رجعتنه , العهد ما قبل الرسول وشعبك المكرود , كليته كلي   والمواطن يسألك , يبن الاصول الحاير ابعيشة اعياله ومبتلي :   الله يقبل , الك كل خير العراق؟ وانه من هالخير.. كلشي ما الي؟   واهلك باغله قصر , وسط السويد؟ وانه كوخ امن التنك تسكن هلي؟   وين حكي ؟ انه بصراوي العراق وانه ابن تكريت , وانه الموصلي   النجف ارضي وارض جدي , وكربلاء ارضي , ودياله ترابي ومعقلي   وانه انباري وعراقي , وما نسيت بلعماره وبالسماوه اخوان الي   وانه من بغداد , ابن دجله وفرات سني اوشيعي ومسيحي ابمغزلي   جنت اظن , تحميني من غدر الزمان وابد ما ظنيت , تسعه لمقتلي   زاير كريمد , طلب حق اللجوء وباع حته احماره , والبش والطلي   وهام , عاف الديره الكم يا لصوص وما يرد , اله الحقائق تنجلي   الناس تكتل بينه مفرد , عالبطيء وانته يا بو الويو , طكاتك صلي   لا اتسولف .. اعلن افلاسه العراق وعالشعب جذبك , بعد ما ينطلي   شعب خيراته تسد , ارض وفضاء ايعود مفلس؟ , يا جبال اتزلزلي!   لا تصلي , شكال ربك بالكتاب ؟ كل حرامي ابنص جهنم ينصلي   لا اتصلي اوكول : في يوم الحساب يا ترى , بيا درك اسفل منزلي؟   حملت للخارج اموال العباد وكلت طز , والف طز ابعاذلي   البينه سويته .. فلا يرضاه رسول ولا نبي ايقبله , ولا ايقبله ولي   وين خاجيه , تجي وي الزايرات ولج يم ازناد نوحي اولولي   وكولي يمكعد , الوادم عالحصير وكانس ابطانة شعبنه البابلي   بيش نظفت الخزينه , يالعزيز؟ فدوه ليدك , يمه جاليهه جلي   هسه جاوبني , اذا عندك جواب؟ اوفكرت زين , ابسؤالي الاولي؟   انت فعلا مسلم اتحب الرسول؟ وتدّعي , من قوم حيدرنه علي؟
	Since 17/01/05.  web counter