| الناس | المقالات | الثقافية | ذكريات | المكتبة | كتّاب الناس |
الثلاثاء 15 / 12 / 2015 عباس طريم كتابات أخرى للكاتب على موقع الناس
حجي اعناد , والتظاهر , وعصابات الحرامية ..عباس طريم
(موقع الناس)
حجي اعناد جيراني التعرفونه... طكوه اعله فجه وطاحت اسنونه
طلع وي الربع يتظاهر امن ابعيد ... عباله الجماعه ما ايشوفونه
شافوه من رجع كالوله حجي اعناد ... خويه اتظاهرت ؟ فز وصفر لونه
وكال وروح خاجيه وسند وصحين... التظاهر ما كربته وروح حنونه
وذوله الطلعو ايدورون حريات ... ابصراحه احجيهه يا اخوان خزونه
احب اليرتشي واليختلس ويبوك ... واحب اللي يجينه وحاد اسنونه
وكال الهم وروح امي مريض وجيت... للدكتور والحراس منعونه
الحقيقه البارحه اتعشيت بيتنجان ... وباجه ونظفتلك كل الصحونه
وسمعت اطلاق نار ابطني كل الليل ... وريحه اتكول جنهه ازواع بزونه
وحرارة صاعده من الجدم حد الراس ... مصحوبه بدوار الراس وصخونه
وكالولي دواك ابساحة التحرير ... يم دكتور اسمه اسحاق كمونه
الوحيد اليكدر ايوكف اطلاق النار ... كبل مرتي وجهالي لا ايسمعونه
فحصني وكال اضغط نمره واحد بس ... وكلي لا اتفجر بس يشمونه
اقل شي الفين للمستشفه ينتقلون ... لان تفجير ذري وما يحملونه
ما عندي علاقه وكاعد ابهالبيت ... والناس التهوس كلهه مجنونه
ما احب السياسه واكره الاحزاب . .. والعب دومنه وي اولاد مسحونه
عمي يا هله ابفسادنه الطيبين ... عله ابساط الفكر والعوز خلونه
احب اليسرق ويشلع ابنص الليل ... بامريكه مثل عبعوب يلكونه
ساكن بالملاهي ايدور الحلوات ... وما يتعشه اله اوياه مادونه
لو مثل الوزير الشال مليارات ... وكال اله اشتري نادي سكنتونه
بلد تايه اشحده اليعترض وايكول ... بويه يا تظاهر ما اتخلونه
كالو مو صحيح وانته جنت اهناك ... وجابوله الفلم شوفوه بعيونه
وهو ايصيح كل لص وحرامي اليوم ... علكوه من ركبته ولا اترحمونه
ما انريد الحرامي الما يحس بالناس ... والله لا يوفقهم الباكونه
وكلوله علينه انوب حجي اعناد ... نعرف الجذب كله ونعرف افنونه
والله من نشوفك غاد بالتحرير ... راح اتشوف كتل احزابنه اشلونه