|  الناس  |  المقالات  |  الثقافية  |  ذكريات  |  المكتبة  |  كتّاب الناس  |
 

     
 

الخميس  1  / 11 / 2018                       د. مؤيد عبد الستار                            كتابات أخرى للكاتب على موقع الناس

 
 

 

جاسمية تصرخ أيـن حـقـي يا ابو جاسم

د. مؤيد عبد الستار
(موقع الناس)

مشهد تمثيلي ساخر 18

* جيب الليف ودي الليف .. تاليها لاحظت برجيلها ولا خذت سيد علي .
- خير جاسمية .. منهي تزوجت ؟ بس لا مجلوب السلف تزوج بت سيد علي !
* شوف البطران ... !! انت ما عندك غير هالمجلوب !
- اي مو سمعت بيها رَجل ... كَلت منو يتزوج بهاليوم الاكَـشر غير هالملاعين .
* ابو جويسم .. انت ما سامع المثل : ماحظت برجيلها ولا خذت سيد علي !
- ايه .. ذكرتيني بالمرحومة امي ، جانت دوم تجيب هذا المثل .. بس شنو رباط السالفة ؟
* رباط السالفة .. اوراقي اللي رشحت بيها مثل ما راد ابو صحبه ، لكَـيتها مشمورة بالزبالة .
- انا اخو المتصرف .. صدك .. جذب ...عود انا ازامط واكَول جاسمية راح تصير وزيرة ثقافة .
* يا ثقافة ابو جويسم .. الحكومة تريد واحد يبصم ... حتى كلشي ما يتغير .
- ليش هي الثقافة ينرادلها واحد يفتهم .. اشو من قال و بلى لازميها ربع مجلوب السلف وخيّرهم مايفك الخط .
* غير حسبالنه ابو صحبه يدور ناس تفتهم .. وانا هم مثل الصدك قدمت اوراقي .. وفوكَاها دزيت
الــ (C V ) .. عبالي صدك راح يقرون الاوراق والبيانات .
- تردين الصدك .. لو مخليتني اوصي مجلوب السلف ، وادهن زردومة بتشم دولار .. جان سواها راس مال .
* ابو جويسم عبالك هاي السالفة تخلص بتشم دولار ... هاي ينرادلها دفاتر .. شكبان دولارات .. ما سمعت الربع شـكَـد دفعوا .. مو طلعت الريحة بالفضائيات .
- ماطول هيج .. خلينا نجمع دولارات .. وعلى الدورة الجاية قدمي من جديد ، وآنه اوصّي مجلوب السلف .. ماكو غيره يدبرها .
* شوف ابو جويسم .. لو تبقه بس هاي الوزارة بالدينا .. ما انطيهم رشوة ولا اروح لمجلوب السلف وامسح جتافة .. لو تطلع نخله براسهم ... لو آني .. لو همه ... وان غدا لناظره قريب .
- ها ...اشو ترطنين بحجي مال كبار ... شنو لناظره النوبه بويه ... لا يكون ضربت براسج الوزارة مال ابو صحبه .
* لا .. ابو جويسم ... ما ضربت براسي الوزارة .. لا زم ناخذ حقنا من ربع مجلوب السلف .. ولازم نشد حزام ذيب .. لان ما يطلع من ايد ربعك لا وزارة ولا تجارة .. وراح تظل الوادم تعلس بالمصايب والطلايب .
- فال الله ولا فالج جاسمية .. لا تكَلبـين الدنيا فوك روسنا .. باجر يجي مجلوب السلف للمضيف ونفتهم منه شنو مستقبل الوادم .
* انت صدك كَلبك كَلب سمجه .. بعدك تترجه من ربع مجلوب السلف خير ... مو صار سـنيـن يـقـشمرون علينا .
- يعني شـلـون .. ماكو جاره !!
* ابو جـويسـم ما الـنا غير ناخذ الـفـاس ونطلع لهم للجرباء .. ونصيح : اين حقي ..اين حقي !!

رابط الحلقة السابقة 17
http://www.ahewar.org/debat/show.art.asp?aid=615218

 

 

 

 

 

 

          موقع الناس .. موقع لكل العراقيين /  ديمقراطي .. تقدمي .. علماني

             جميع حقـوق الطبع والنشر محفوظة لموقع الناس                                                              Copyright © 2005-2012 al-nnas.com - All rights reserved         

  Since 17/01/05. 
free web counter
web counter