آداب
عداد نوري المالكي
خريسان الطيب
من اجل إصلاح العملية السياسية في العراق طلب رئيس الوزراء العراقي السيد نوري المالكي مهلة لمدة 100 يوم من اجل إنجاز ذلك الاصلاح لكن ( الشك أكبير والركعة ازغيره )
عداد نوري المالكي يمشي صفح
لا هوْ بعيرة امْعَتْبُرَة
ولا هوْ طلي ينطَحْ نَطِحْ
كالنّه نحسب للمئه
كنّاله بالله إبلا َشقَه ...
مَتْشوف غَير العبقري
بأول درب يشطح شطح
وعداد نوري المالكي يمشي صفح
عداد نوري المالكي لاكفْ طين
كلِّ البراغي امجَيّمَه
إبْلا تشحيم
لا شغل عدْنَه ولا اكل ...
كلولي وين المشكلة ؟
يصرخ وزير التموين
ماكو لحم اكلوا جِمَة !
وهذا المطي شيفهّمه
الحصة ما بيها اطحين !
عداد نوري المالكي لاكف طين
عداد نوري المالكي نص اردان
والحَسْبَه كَسرْ إبلا جَمع والجرذان
اكلت امن الميه ثِلِثْ
واشبقه ابنصْ الجزدان ؟
فَرْهَدْهِنْ إفلان وعلي !
والشعب طالع خسران
وعداد نوري المالكي نص اردان
عداد نوري المالكي لاكُفْ جص
اسم الله لسّه ما بِدَه
طار النص
يا بوبه والله مَزْعَطه
ويوميه طالع هَلْ عطا
حاشا أعله قاسم ما كذب
بس إِيْقصْ !
وعداد نوري المالكي لاكف جص
عداد نوري المالكي هم بوري
الشعب َفّتح باللبن
والدولة من فرفوري
والبوري هم يفشخ تره
لتصير مثل السوري
الناس تشتم بس خره
وانت تِكِلْهُمْ جوري
وعداد نوري المالكي هم بوري
عداد نوري المالكي نص إستاو
مسعود كاكا بالعَجَلْ جيب ( الآو )
بغداد كاعد تحترك
والنار وصلت للفاو
الناس صاحت يا وطن
والصدى جاي من اليمن
صالح وحسني وبن علي
كال الشعب الْهُمْ جاو
وعداد نوري المالكي نص إستاو
عداد
نوري
المالكي
نص
إستاو
31 آذار 2011
| الأرشيف |