آداب
سالفه للعشاگ
هاشم صياح الحجامي - الناصرية
للعشاگ اسولف لليحبون *** عن ولفي الهويته وبيه مفتون
حبيبي اسمه العراق وانه أحبه
وشحم گلبي ابغرامه والله اذوبه
هيجي الحب حلاته يالتحبون *** حبيبي اسمه العراق وبيه مفتون
****
من زغري هويته وابگه للدوم *** احبه انه أحبه وموش مندوم
وحگ الله ابدليلي اسمه مرسوم *** وبزينة حبيبي ماكو مزيون
حبيبي اسمه العراق وبيه مفتون
*****
حبيبي انه بجماله امحير الناس *** حبيبي أيفوح منه الهيل والياس
احبه انه احب وگلبي حساس *** واسم اوليف گلبي لو تنشدون
حبيبي اسمه العراق وبيه مفتون
****
مثل ما احب حبيبي هو حبني *** اهو بيتي العزيز وبيت ابني
يا مركب غرامي ارجوك ذبني *** على ضفاف الفرات وكحل العيون
حبيبي اسمه العراق وبيه مفتون
******
دارمي للعراق :
لمريكا تمشي الناس وترد للعراگ
الوطن ام شلون يتجازه بفراگ
| الأرشيف |