آداب

 

| الناس | الثقافية |  وثائق |  ذكريات | صحف | مواقع | للاتصال بنا |

موقع الناس .. ملتقى لكل العراقيين /  ديمقراطي .. تقدمي .. علماني

 

 

 

 

 

الخميس 26/8/ 2010

 

يا صاري اليلاوي الروج

لفته مطير الباني

بعدني أبليل حزنك صوت ...
من دمع الربابة أيفصل الموال
وبعدني أبثكل صبرك آه ..
ما ونيت بيهه ولاكشفت الحال
وبعدني اجدام ...
من تغتاظ ...
تحلف بالتعب وتزامط الخيال
وبس انته ...
اشكبر خلكي أعله ليلك يا طويل البال
يا شوك السنين الحملتني أجروح ..
ويا لوم العواذل والكلت والكال
ضميتك دمع والنايبات إرداف ...
ما يوم التعده أعله الجفون وسال
وضميتك سوالف ليل ...
من جان الحجي ابطاري العشك ممنوع ما ينكال
ضميتك حلم بالعين ...
من جان الحلم ممنوع فوك الجفن من ينشال
من أول شراره الجدحت ابتموز ...
من صرخه قطار الموت ...
من ثكل الصليب وهوس المهوال
يا كلي الشبك كلك
ويا خل الوفي الما فاركت خلك
كبل عدوه وتخاف الناس ...
بس صدري الحنين اتخاوه وي سلك
كبل جانت العين اتبوك غفله الشوف ...
ما خليت ابد كل عين تندلك
كبل جان الحمل يتعب أمتون الناس ...
ما همني الثكل وتعذرت حملك
شد مشدود بالشريان ...
ما كدرت اجفوف الوادم أتحلك
ولو ...
ولو متعوب كلبي امناصف الدكات ...
نص منهن إلي ...
ونص منهن ايدكلك
وهالذهه ابصفنتي الجلمة من أطريك ...
يلشادهني بس انته
وهالذه الوجع بجروحي من أيبات ...
يثكل مستحاي ...
أو ونتي ابسكته
وظل سكته
الحزن سكته
الدمع سكته
الحلم سكته
يمنجل بالنحر من تعب وشرته
يا طبعي ...
يا طبعي وعلى أطباعك صبر من جزع عودته
اخذ عمري أعله عمرك ...
واطبك العمرين ...
يا بخت الجبير الما ضعف بخته
سوالفنه أبمضيفك زود ...
يا صاري اليلاوي الروج كل وكته
تمد روحك جسر للناس ...
يا هو الخاف غمك الماي عبرته
ويهل عيدك علينه أيواسي المتعوب ...
يزرع بسمته أبشفته
إذا يكبر جرحنه أيدوخ بينه الليل ...
كلما دمه ينزف ينسه سالفته
يبه ينته .... يبه ينته
يظل اسمك علم مرفوع ....
ما دام الزنود السمر شايلته ...


ناصرية ...


 

 

free web counter