موقع الناس     http://al-nnas.com/

( شعر شعبي عراقي )
 

شباچ الأمام

عبدالكريم هداد

الجمعة 24 /2/ 2006

شِفِتْ دمعاتْ أمي
فضة
عْلَه شباچْ الضريحْ..
اتْطيحْ..
وبيَّه اتْصيحْ..
إجَتْنَا الريح.. غَبرَة .. حَمْرَه..
ومِنْهو إلْهَا ..؟ وما يِطيحْ ..
عَلىَ ظهور الحوافرْ
سْيوفْ طِغيانْ
تفزْ بينَا النوايِبْ
وتوگعْ أصْنامْ
وراياتْ العِلَتْ ليفوُگْ
تِرفرِفْ وتِصعَدْ العالي
ثورة بقوة الطوفانْ
..............................
..............................
..............................
شِفتْ إمي واگْـفَة
تِبيچي حِزِنْنَا الما يِنامْ
وچانَتْ تِشِدْ العِلَگْ
اخْيوطْ خَضرَه
بْشباچْ الأمامْ
تِدْعي وتِبْچي وتِتْمَنَه
وتِبوسْ الكراماتْ العظيمَة
وْجَلّ الكلامْ
ياشباچْ الذهب ،
ياعِطرْ النبوّة
والحضرَة ساحَة للحمامْ
الذهبْ گبَة
والوهَجْ نور السلامْ
بين ضِوياتْ المناير
عالية
بْخد السِمَا تْصيحْ الأذانْ
" الله واكبر
الله واكبر
حيَّ على خير العملْ "
وخير العمل عدلْ وسلامْ
هذا طَبعْ الناسْ الفقيرَة من
طبعْ الأنبياءْ
والأولياءْ
والرسلْ
يِتْنومَسْ بْحِلوْ الأملْ
ووذاكْ إبويْ المازَعَلْ
من التعبْ ..
مثل خبزَةْ چفوفَه ،
البِسِتْ بيهَا العسلْ ،
ما مِسَكْ مالْ الحرامْ
وعيونَه مليانَه تنامْ
فوك سجادة صلاتَه نيّتَه صافية
وحلوَةْ غرامْ
ماقرَا بَسْ عَلَّمْنَا نِقْرَا
وشَبَّعْنَا وعَوَدْنَا عْلَى خير الحَلالْ
هيَ شمسْ الناسْ غابَة من الضوَة ..
ما تِنْطفي
ويَه المناير عاليَة ليفوگْ..
والوهَجْ گبةْ ذهبْ
وفضة شباچْ الأمامْ .
 

السويد 22-2-2006