الأحد 20/2/ 2011

امغلِّسين‏ معين الخياط النجفي - كندا abosalam_42@hotmail.com   ليش عن هاي الرواتب هالجماعه امغلــّسين عجبه من سبع العجايب صارت ابهذا البلد اشچـم وزاره الأسسوهـا احسب ايضيـع العدد اتلاگـفوهـا اووزّعوهــا اتملكوهـا للأبــد همـّه تيجـان اوقصـور واحنـه صرنـه امفلــّسين ليش عن هاي الرواتب هالجماعه امغلسـين مثل نار البلهشــيم انتشر بالسرعه الخبر قسم غصّــّت بالنعيم وكثره كـاتلها القهـر لو نقارن بالتقاعـد بينــّه راس الشـــهر الوزيـر اتلث دفاتــر وبس ورقتين لمعيـن ليش عن هاي الرواتب هالجماعه امغلسـين صحنـه يمعودين كافي خلـّوا حصــه للفقير ذكروا اللـه يا جماعه وخـلْ يصح عدكم ضمير احسابكم كلش چـبير اوويلي من نار السـعير وهيـّه نگـطه واذا طاحت ما أظن ينـده الجبين ليش عن هاي الرواتب هالجماعه امغلـّسين عمـّي يلنصـكم عمـايم هالفعل واللـه حرام تلغفـون ابهالرواتب وتظنون احنه نيـام ربـع من هـاي الخزينه صار الـكم بالتمام وغيركم صابر ابحسـره ينتظر كيلو الطحين ليش عن هاي الرواتب هالجماعه امغلسـين سـَلـّسوا اوذبـّوا الگـشور الخاليه لهذا الشعب شـو عله غفله الخزينـه اشما ورد ليهــا انـّهب ردنه بس السله عمي النه وانتو اخذوا العنب مو عداله كلهــا الــكم واحنه نبقـه امتلـّزين ليش عن هاي الرواتب هالجماعه امغلســين امن انتخبناكم درينه نعض ببهـام الندامه هاي مو ميزة رجــال ولا علامات الشــهامه تاكلـون ابكل اديكـم اوخلها جوعانه اليتامه انتو علـّيتوا اوركسـنه ابخوش برچـه وخوش طين ليش عن هاي الرواتب هالجماعه امغلسين نزولاً عند رغبة الكثير من الأخوة القــّراء والأصدقاء والأيميلات الكثيرة التي وصلتني ومطالبتي بأكمال القصيدة ، البّي الطلبات مع جزيل الشكر للمحبين : خـلـّوا بالآذان گــطنه وعن شعبكم غمـّضوا مجلس النواب اكثــر من ثلثميــّة عضــو وعلـي دَز سلمان حاكم.. حصير وابريك الوضو اشعجب ما خذتوها عبره من أمير المؤمنيــن ليش عن هاي الرواتب هالجمـاعه امغلـّسين باچــر اتنادي جهنـم وينهم هل من مزيــد ذولـه كتـّالة شـعبهم يطلب ابثاره الشهيد امعمر وحسني مبارك نيــّموهم يـَم يزيـــد والحـَكَم تونس گـبلهم علي زين الهاربيــن ليش عن هاي الرواتب هالجماعه امغلــّسـين من جـوار اللي حولكــم أخـذوا يلنيام عبره واللي يتباهـه ابقدرته للشعب والباري قدره اوشوفوا موجات الشعوب الجأيـّه ليكم محـدره وننظـر أصحاب الحواسـم امن الرگاب امگـيدين ليش عن هاي الرواتب هالجمـاعه امغلـّسين يلــّي ما تنظـر لشعبك أرد اوجهلك عتـــاب تمشي بدروب المهـالك لعد ربـّك ما تهــاب وتدري دنيــاك الحقيره دار مگـضيـّه وخـراب امن الجواعه اتبـوگ تنهب اشوكت باللـه تستعين ليش عن هاي الرواتب هالجمـاعه امغـلسين اويلـّذي تدري أعله شخصك صار بالشارع لغــط ما يهمـّك كل حچـيهم ملتهـي بس بالشـــــفط خَلني گـاعد عله الكرسي وبارك اللـه بالنفط احنه من حچـي الشـوارع جثث ميتـه امحنـّطين ليش عن هاي الرواتب هالجمــاعه امغلســين احچـينه .. دخنـه اعله الرواتب بس عجب إلمن تنادي اوهـوّه ليگـول آنه جثـه اشــما صحت يكثر اعنـادي ابقـه يا شـعبي ابمزاجـك انته وادي اوآنــه وادي أصرخ اوكثـرْ التظــاهر نبقــه دوم امغلـّسيـــــن

 

| الأرشيف |