|  الناس  |  المقالات  |  الثقافية  |  ذكريات  |  المكتبة  |  كتّاب الناس  |

 
 

                                الأحد  16 / 8 / 2015                                            آداب                                                                       الأرشيف

 
 

 

شيخلصهم منك آب

قيس السهيلي


عِشنه ابغاب ... منحوره الشجره .. ابكل باب
حارسها .. من أولاد الـ إيّه ... دوني و سرّاق وكذّاب
حارسها .. امحزّم للشين ... يكتل يذبح بالأطياب
سَدّوا .. بيبان المفتوحه ... او خِنگوا أحلام الأحباب
و باگوا إسمك يا تموز ... او صار اليسوه .. ابسعر اتراب
واليسأل .. فَنّه بهاليوم ... يطلع كافر بالله و ساب
جلده .. ايودوا للدباغ ... لن البايگ سيد الغاب
غابه .. او نسكنها من ازمان ... من الهور إلحد الزاب
ما عاشت بيها الغزلان ... بس الواوي او حفنه اذياب
كتبوا چذبات الچذبوها ... او خلّوها ابدفتر و اكتاب
او حكمونه بـ إسمك ي مهَلّس ... دستور او لَبسوه اثياب
اشحده .. اليتظاهَر عالدوله ... محضّريله قانون ارهاب
و اشحَده .. الينطق بالعَدلَه ... متآمر وي الأجناب
سبعه ابـ آب .. الثوره اتفَجرتْ ... و إلها هوايه أسباب
الشعب اتحزّم بحزامه ... او شال الفاله والمگوار
أنور حمداني الفَجّرها !!! ... لو دمك هادي وعمّار
لو شوّرت آثار الموصل ... لو دمعاتچ يا سنجار
لو بختك يا شعبي الصابر ... لو ربك فارجها ابـ عار
هذا الأُمي الباگ اشويّه ... ما بايگ بس چم مليار
او ذاك الناهب لگمة شعبه ... ويتمنطّق بـ إسم الابرار
او صارت خري او صارت مري ... و تغيرت بس الأدوار
يبصم ما يكتب متعوّد ... ايدير الدوله بالموبايل والأسفار
و الموصل صارت حظ داعش ... و بالدم إتوضّت لَـ نبار
و النايب بيده النرگيله ... ويتحلّف و يريد ابـ ثار
شِلكم بالحصه وبالراتب ... تريدون إنماشي الكفّار
وشِلكم بالماي وبالصحه ... ما ينفع وي حَرّنه التيار
لو مشتاقين إلـ نجم وصايح ... وللبغداديه بكل دار
إخرس يل نايب وتهَيّب ... دوله او صارت للثوّار
گول اموافج .. يا بو اموافج ... و إرفع إيدك لا تحتار
لا ريس كتله .. الينفعكم ... او لا أوباما او لَـلتتار
يا شعبي بالك .. تتقشمر ... واتضيّع دم الأحرار
لوإحنه اناضل .. عل مامش ... او نخسر كلشي ابلايَ احساب
أنذال او مابيهم طاهر ... سِجنونه او سدّوا كل باب
ظنّوا تموز امعاشرهم ... او ناسي الثوره البيها انهاب
او لو صادق تموز اوياهم ... شيخلّصهم منك آب
هيهات او تموز انعرفه ... ما عاشر حكّام الغاب
ما عاشر حكّام الغاب


 

13. آب .2015
 

 

 

 

 Since 17/01/05. 
free web counter
web counter