آداب
فِــدوه رِحـتوا للعـراق
قيس السهيلي
فِـدوه رحتوا النهر دجله
شما عِـلَه ويـاه نِعـلَه
هُوَ ماي او هوَ شُعله
زَعـله أبـدَن ما يُـطاق
فِـدوه رِحتوا للعراق
فِـدوه رِحـتوا للعراق و موصِله
شمعنى ضَيـّعـتـوا العِـرِف والبَوصَله
هُــوَ تحـرير القُـدِس لو كربله
موسى والنعمان عاشوا بالوفاق
فِـدوه رِحتوا للعراق
فِـدوه رِحـتوا للفرات
الـدوم ثاير عَالـطغاة
شلون يرضى بهالولاة
هـذا الخالد حضاره
ما أظن تِـنداس داره
ولا أظن باغي يفوت
الجَنه مو بس لليموت
الجَنه للحَبْ ابسكوت
ومن تِحِبْ تِـگـدَر تِـنوش
اتسَقّـط الكل العروش
والرِدي ما هو شهيد
من يموت الدنيه عيد
وإنتوا يل جيتوا حُفاة
تدَنِسوا أرض الفرات
وتاخِـذوا مِنّـا الحياة
والله او رب العِـباد
هـذي محروسه البلاد
بالتـسامح بالحِـياد
تعـيش آلاف السنين
واليحبْ ايـگول آمين
بكل خريف إنتو الأوراق
فِـدوه رِحـتـوا للعراق
شـگد أَسولَف اويَ المخده
هـالعـراق اشـگد أوده
دافي حضنه وردي خده
شَهم ما ينسه الموده
ولليخونه إيصير ضده
يظَل يعابي إدخِيل جده
رادوا يقسمونه مره
بِچتْ هيت و بچَتْ بدره
وسالم وسِلمَتْ الجَـره
يـــا سـلام الله عَـليه
رِحـنه فِـدوه ابين اديه
او لو يهز بينه الفراق
إلَـك يـا بوّنه نـشتاق
فِـدوه رِحنا للعـراق
و إنتو فِـدوه للعراق
للعـراق للعـراق
03.07.2014
| الأرشيف |