الأحد 11/7/ 2010

يا ليل البعيدين : وحيدا ً في هذه المدينه التي تنام سعد الشريفي وحدي أغني وحدي آني وعودي أغني وحدي آني وعودي والليل الطويل شينَّيم حزن فرحان بالدخان شينّيم المهاجر من عذابه ويشتري النسيان شينّيم الجحيم النايم بروحي حنين وشوكَ لآمالي القديمه ..وبهجت المجنون من يحلم ياهوى بلادي عليك الله علينه اتجود واتنسم وحدي أغني مره طور امحمداوي ومره نايل كلَت. بلكي بلبل عاشك وسهران يسمع وجع روحي ويجي يمي بلكي جنح غنيده ..رمش عيونها الحلوات اتفك حزني وتحنلي بلكي مملوحات ..سهرانات ..سكرانات بللهن مطر ليلي ويجنلي وحدي أغني لا فرح دكَ بابي مَره ولا سكت عودي ولا عيوني نسني آني والأسرار..والنسيان..والوحشه وزهد روحي..والليل سهران مهجور بمحبتي والوفه ذبلان ذبلان الوفه ياعيني من اسنين ذبلان بثياب الصبر أتلمس الحيطان ياكلّبي بطل العتب وانجب يكلَبي وعاشر الدخان . *** يا سبب خلاني أغني ؟ يمكّني أهدهد روحي من الحيره من الألم..من السبب...من يزعل علي الصبر من الجاي والمجهول أصلي آني وقميصي للشمس كل يوم بس تفرح حمامه ..ويضحك المهظوم . *** وحدي آني وسَّكتي وغربة الروح أتلملم حزن مابين هذا الكون ..بين الوحشه ومابين الجنون خايف الألوان تصبح فرد لون خايف الحيطان سوده اتصير وتميل المناره والغريب يموت بأشواكَه البعيده مابين الكتب..واتموت أسراره خايف من الوطن من تضعف محبته واتشيع الظنون خايف من اعيوني من تعشكَ تخون *** ياشريج العمر يالمهجور بثيابك نايم ليلك بروحي وعطش روحي غرامك يادرب ياخذني ..يارجلين واتذبني على بابك لذت بالليل الغريب وكل ليالي الغربه مرّه ..وتوحشني بغيابك انت آخر يوم عمري ايحن الك غزاله وغابت من العين وظل كَلبي ربابه يدكَ على البيبان الغزاله وين؟ مدري بللها المطر مدري نامت حدر في شجره وزعل منها الكمَر مدري ليل الوطن شوغهه وغفت حدر الشمس مدري تاهت بين غابات المدينه والفرح بيها انكسر شطوله ليل الوطن عل الغزلان . خايف من الماي مايغسل اجناح الليل عنها خايف من الشمس لو مالت عليها ابكّد عذاب الناس كلّبي يحن عليها آخ ياكلّبي شكثر بي درت وماشفت دمي بديها *** وحدي سارح بين أحلامي وخسارات السنين أغسل أيامي بمحبتي أغسل همومي بمحبتي وأوكَف بدرب المنايا نهر شايل الحريه للناس الفقيره.. وخبز الأسمر وبيانات المحبه والقصايد شايل كل قناديل الولايه ضوه لعيون أهلنا أدري الضوه مبيوكَ من عيون أهلنا ياسماوات الفرح ليش الضوه مبيوكَ من عيون أهلنا؟ منو يسمع صدى روحي ياليل البعيدين المنفيين ....المنسيين ياليل الوطن ...ليل المحبين أدعيلكم.. بالسلام.. وبالمحبه وبالحنين .

 

| الأرشيف |