الأثنين 15/2/ 2010

عركة واوية لو......؟ عباس العكيلي اثار قرار المساءلة والعدالة ردود فعل واسعة في الشارع العراقي والأقليمي وحتى الدولي. ومعروف ان العراقيين يتابعون القضايا السياسية الساخنة ويعطونها حيزا كبيرا من اهتمامهم ، خاصة في هذه الأيام التي بدأت فيها الحملات الأنتخابية البرلمانية،وما تشكله من محطة هامة في مسار بناء الدولة العراقية الجديدة التي يجري حولها صراع بين الكتل والأحزاب السياسية المختلفة.حيث كانت ردود الأفعال هذه متباينة في اهدافها وتوجهاتها. فمنها ما يؤيد القرارات ومنها ماهو معارض لها وقسما آخر يطالب بالتمييز فيما بين المنتمين لحزب البعث المنحل. فقررت ان ازور صديقي العزيز ابو سعدون واورطه بهذه القضية ونسمع ماهو تحليله لها. - ها .. اشعندك اليوم امغبش عليه وبدون تلفون مثل كل مرة ؟ اكيد عندك سالفة اتريد اتورطني بيها ويه الجماعة؟؟ كان هذا ما استقبلني به العزيز ابو سعدون عندما وصلت الى منزله وهو منشغل بسقي الخضروات التي يزرعها (فجل، رشاد ، كرفس وغيرها) ثم قال : - زين وجيت ابوكتك حتى تأخذ شوية خضرة . جلسنا في الديونية (غرفة استقبال) وامر لنا بالشاي واشعل سيجارته وقال : - ها شنهي سالفتك اليوم؟ - سالفتي يابو سعدون حول الضجة في البلد هذه الأيام وهي قضية العفالقة والبعث حيث اخذت حيزا كبيرا من اهتمامات الرأي العام في البلد وخارجه . انت ما هو رأيك بالموضوع ؟ - والله يا عزيزي ان الموضوع فعلا اخذ حيز كبير من اهتمام الشارع لكن القضية اتحولت من قضية قانونية الى دعاية انتخابية واصبحت مادة للدعاية الأنتخابية وكل طرف من هذه الأطراف يحاول دفع الأمور الى الأتجاه الذي يريده ، دون التفكير بحقوق الشعب الذي ظلم وعانى ما عاناه من حكم العفالقة. وتحولت الى صراع على السلطة والكعكة، البعث يريد العودة والجماعة اللي اخترقهم البعث يردون دولة امفصلة الهم واحنه تاهت علينه السالفة او هاي السالفة تشبه عركة واوية آل مطر وآل خليفة. - رحمه لبوك شنهي هاي سالفة عركة الواوية ؟ - آل مطر وآل خليفة ناس اصحاب حلال (غنامة) كدروا ايطبعون الواوية ويه الجلايب (الكلاب) حتى يحمون اغنامهم من الذيابه (الذئاب) او كل فترة عندما تصير وحدة من اناث الجلاب (مجعل) او كبت الهوسة او متعرف عوية (عواء) الواوي من نبح الجلاب. وتفزع الناس متصورة ان الذياب هجمت على الغنم، وبعد ان تشتغل التواثي لفض النزاع وتنجلي الغبرة واذا تبين ان كل هذه الهوسة على مود جلبه مجعل. ومن ذاك الوكت وصار الناس ايضربون بيها المثل. فيا عزيزي هاي السالفة تشبه سالفة واوية آل مطر وآل خليفة. لأنها صراع على السلطة والكعكة الله وكيلك. لأن تعال اوشوف اوماريد اكلك بالأسماء اشو اغلب اللي جانوا امدمرينه همه هسه بالدوائر الحكومية وبيدهم الوظيف العالية والا شنهو هذا تاب اوهذاك من كرايب السيد لو من انسابة المعمم الجديد واغلبهم دخلوا للأحزاب الدينية وسموهم التوابين على طريقة تعامل الأيرانيين ويه الأسرى العراقيين ايام الحرب الملعونة.؟ نعم لابد وان القانون يأخذ مجراه بحك كل من اجرم بس مو بهذه الطريقة اللي افتعلوهه من شان لا تنتبه الناس الى فشلهم بتنفيذ وعودهم للي انتخبوهم لأن ما قدموا اي شيء . اوهذا ينطبق على كل احزاب الأسلام السياسي لأنهم ما حققوا اي من وعودهم للناس اوبالعكس الناس اصبحت بوضع سيء. اما عن المطلك والعاني وكل عفلقي يستاهلون جان المفروض من زمان او اصلا المفروض ما يوصلون الى البرلمان. بس غير هاي المحاصصة السخيفة اللي ورطونه بيها. - طيب ابو سعدون هاي الواوية امنين جابوهه واشلون اطبعت ويه الجلاب ؟ - ها.. آنه اكلك اشلون.. منطقة بدرة اوجصان هاي مشهورة بالواوية والجماعة تعرف يتنقلون ابغنمهم وره العشب فكدروا ان ياخذوا جراوي الواوية وعمرهم اقل من يوم ورضعوهم من اناث الجلاب وطبعوهم واتكيفوا ويه الجلاب او صار ما تعرف الجلب من الواوي. - طيب ما رأيك بان نسمي السالفة عركة واوية لو عركة جلاب؟ - عمي سميها مثل مانت تريد هم هاي اتريد اتورطني بيهه ؟ يالله كوم اخذلك رشادات وفجلات وكرفس والله وياك.