الخميس 6/8/ 2009
من هالمال حمل اجمال
سامي عبد المنعم
تناغما مع مقالة الصديق الدكتور صادق اطيمش
من هالمال حمل اجمال
حمل واستنگي اشما اتريد
المحابس ترس الايد
يستحرمون التجديد
ويستخدمون الجوال
من هالمال حمل اجمال
منصب وراتب مضبوط
يلبس قوط او ينزع قوط
كل ليله يسگف شبوط
وكل شغله فتاح فال
من هالمال حمل اجمال
ضبطوا رواتبهم ضبط
ما يستقيل الا ابشرط
النفطات شفطوهن شفط
والتقاعد عال العال
من هالمال حمل اجمال
سوگك امريدي معروف
ياريت عايش واتشوف
جامعة او منغير اصفوف
خرجت چم الف زمال
من هالمال حمل اجمال
عنده شهاده امزوره
او متزوج اكثر من مره
يدري الحكومه طرطره
دكتور صار البگال
من هالمال حمل اجمال
بيت او حمايه او ناطور
والعطله كل ثلاث اشهور
ابكل دوله راتب وقصور
ابلندن مرته والجهال
من هالمال حمل اجمال
نواب عدنه ابلا خجل
لا شغل عدهم لا عمل
با گوا جملنه اشما حمل
بالات نلبس وسمال
من هالمال حمل اجمال
غمان ضحكوا عالشعب
يامن شگه او يا من تعب
هذا الصطه او ذاك النهب
وذاك التربع عالمال
من هالمال حمل اجمال
الماي ابد ما ينشرب
او بالمنطقه الخضره عذب
احنه الگبل نزرع شلب
معقوله صرنه ابهلحال
من هالمال حمل اجمال
الكهرباء اكبر معضله
صار الوطن كلمن اله
للدول صرنه مهزله
تضحك علينه الصومال
من هالمال حمل اجمال