الأربعاء 5/8/ 2009
حياك يا وطني
سامي عبد المنعم
لا تنهظم يا وطن للنايبات استعد
لتگول راحوا هلك لا تظن عنك نصد
المحب من يعتني لا ما ايهمه البعد
دگ جرحك ويه الصبر وعض سنك اعله الچبد
انت مسيح العصر شايل صليب المجد
لو صادروا منجلك او منعوا عليك اتحصد
وعافوك يا وطني وحدك الجرحك تشد
انخه الشمس يا وطن وياك اهي تتحد
اللي اتحزمه الشمس ما يرجف امن البرد
حياك يا بو المحن بالضيم من تنفرد
ما ينثني امن العزم السيف من ينجرد
مدري شجاها الخلگ سولتها بس النشد
ايسئلون .. بعدك گوي .. بعدك شديد او صلد
يتباشرون ابفرح والمؤتمر منعقد
كلهم عگارب صفر والعگربه ما تود
يردوك بس تنتهي مو همهم تنسعد
اتحاوشوك ابنهم .. كلمن ابسيفه يحد
حرگوا اعروگ النخل ليوين شوف الحقد
عفيه صبر يا شعب ها كثر گلبك جلد..؟
اتشوف الوطن يحتضر ونيرانهم ترتعد
من ينكسر ساعدك بعد اشيفيد الزند
اشظل ابصلاتك بعد لمن نسيت الحمد
عالشوك لازم ايدوس اللي ايحوش الورد
ولو عسرت دنيتك اخرها لازم تلد