الأحد 4/10/ 2009
ما أگلچ
سامي عبد المنعم
چنت أحبچ وانتي طفله
ومن كبرتي صرتي أحله
دوم چنت آنه أكتب اسمچ
على الرحله
إشگ گلتلچ .. أريد أكلمچ
گلتي باچر
اوگالبيت الليل كله بامل باچر
ونتظرتچ بعد باچر
أتخيلچ ورده عله كل كرسي ابغرفتي
وين ما أخليچ أگول إهناك أحسن ..
وصلحت حته جرصنه ..
الچان عاطل من زمان
وما إجيتي ...
وكرهت چلمة الباچر
وگمت أكره حته كتبي والدفاتر
بس كتاب الفيزيا الى چان عندچ
چنت أحبه..
كل دقيقه أتصفح أوراقه وأگلبه
بلكي صوره .. بلكي ورقه
بلكي فد موعد قريب
بلكي من عندچ إشاره
إتگلي .. جيتك يلحبيب
إشكثر چنت إمحضر الجيتچ سوالف
أومن إجيتي ...
ضيعت كل الحچي وضليت خايف
خاف أگلچ .. آنه أحبچ
تجفل الفرحه إبوجنتچ
ولو أضل ساكت ...
تكتليني إبسكتتچ
بس الاحسن ما أ گلچ ..
انه أحبچ
لان أدري گلبي معگود ويه گلبچ
1970 قلعة سكر