الجمعة 29/5/ 2009
تنيتك
سامي عبد المنعم
تنيتك والامل مدفون بالروح
وعلى المامش عشت وياك عمرين
اشلٌن فد جرح تتفتگ اجروح
خلص عمري ابهواك شهور وسنين
مثل طير الرگص عالگاع مذبوح
اكابر چذب واحبس دمعة العين
واخاف اتگول ها شبساع مليت
جبتلك من صبر ايوب صبرين
بعدني امسايسك رغم العذابات
وهذني اجروحك البيه نياشين
نطرتك والگلب مليان زنجار
وضنيتك اتحس اهمومي واتلين
تحملت السهر والاه والويل
لجل عينك گلت تكرم الف عين
اثاريك ابعذاب هواك ترتاح
وتسمع ونتي مثل التلاحين
مجبور انه اودعك واكتم اهموم
ولو دچني الوكت بحشاي رمحين
دخيلك بس اريد اشلون انساك
وتدري ابسولتي سولة مجانين
على فرگاك ممكن اصبر ايام
ولو كل يوم عندي ايعادل سنين
تبقه انته جرح بالروح للدوم
ولجل عينك اداري الزين والشين