كتابات أخرى للكاتب على موقع الناس

الأثنين 21/12/ 2009

من قصائد كزار حنتوش (1) سامي عبد المنعم العصافير الغريبه والعشگ مرت اسراب العصافیر الغریبه حبیبه اعله النخل واللیل وگلوب الزغار وعل گصايب والنهار مرت اسراب العصافير الغريبه غيمه من وحشه وعشگ يم عناق الگاع وزراگ السمه رفي بجناح الگطه عيوني واعبري اشطوط وحشتها غريبه اعبري عالمدن كلها وما اتشوفين العله اخدوده الورد يفهه وروحي سولفي الكل الغمايم وهي شرجيه وكلفه غوايا الريح وزهور الغوه الترفه ضواك اليلمض ابهلريح مايطفه ولو غفلة عواصف حاده اتزعل اسراب الفخاتي وتزعل الگمره وتصيح اشگد ضوه الدنيه شحيح ابگلبي چانت الدنيه حلم وعنك بختها ما ايشيح وگلت انا الخطار عالجنه الجديده غافي تحت الرموش العشگت وغافي تحت في الفراشات الجميله وتحت ظيم السواليف الحزينه الشتلها الليل ... بعثوگ النخل واللوم يگلبي من يوم اعشگت لليوم ما سولف عليك النده ... ولا قداح اجه ويه النوم ليل امخطط ابرمش الفخاتي عيونك ... ياعيوني يا ترف بيك العشگ زاهي يغاتي يارمش خذني غمامه تمطر اگصيبه وملامه يا رمش خذني اعله بختك للرموش التسبي حسن الليل للگمره ... التركض ابعشگ النهار اكحيله وي نسيم الماي تتسابگ وتجيني امشابگ امشابگ شبگة الگاع العطش للسيل ابگذلتها ريحة القداح تاخذها النسايم ربيعيه اشما اتشاورها الغمايم اتخليني انشده وگليبي هايم اشگلتلك ... من عبرنه الليل واللايم چنت گبلك ياحبيب ... خيط امن الضوه النعسان بالشارع غريب يا حب وترافه او طيب چنت اعبر سچچ مهمومه مهمومه ... اودي عيوني غفلاوي ابجنح بلبل اتدور بالمدينه اعليك ... واتردلي ابجنح بومه وگلتلك فرگك المايل سچچ بگليبي مالومه چانت ابگلبي غمامه ... وگلت امطري ... هوى وگصيبه وملامه وچانت ابگلبي غمامه ... وگلت امطري رشگة ضوه وامصابيح عالشارع امطري گامة كهرمان مطري النه ابطول فارع مطري من شربة رضابه مطري غابه امن الصحابه وچانت ابگلبي غمامه ... وگلت امطري كزار حنتوش مبعد الى قلعة سكر 1973