كتابات أخرى للكاتب على موقع الناس

السبت 18/7/ 2009

ضل البيت لمطيره سامي عبد المنعم ضل البيت هيته امشرعه البيبان ياهو اليجي ايفوت وصار خان چغان لا قانون اله ولا عدل لا ميزان والوادم اتلوب وضاله ابحيره ضل البيت لمطيره حيران الشعب مايدري شنهو الراي لا عنده امن لا كهربا لاماي وصاير مضحكه للرايح وللجاي لان ما حسم امره وعرف تدبيره ضل البيت لمطيره تدبير الوطن صاير ابعهدة بوش اشما يفرض علينه انگله كلش خوش هاي شلون ورطه وي رعات الهوش صاروا همه اهل الشرف والغيره ضل البيت لمطيره اهل الغيره همه واحنه كلنه ارعاع مثل الغنم صرنه وگبل چنه اسباع چنه انگول فنه اليطب هاي الگاع اشو طبوا ولزگوا لزگة الجيره ضل البيت لمطيره لزگة جونسن لزگو وما يرحون عدهم چم عميل وچم نذل ملعون بس اتاشر ابدولار ينبطحون الينبطح بالك تنتظر خيره ضل البيت لمطيره بالك تعتمد على الي ايبيع اهله رخيص وكل اهانه ايشوفها سهله طماع وذليل وغارگ ابجهله هاذه اشترجه منه وشنهو تفكيره ضل البيت لمطيره كل تفكيره بس ايريد جمع افلوس ولا يهتم اذا گتله نذل جاسوس لان ابداخله هرش الحقد مغروس ايبيع امه وابوه باقل من ليره ضل البيت لمطيره عدنه اشچم عميل وخاين ودجال كل واحد ايدور ابراسه فد موال يحتاج من ابو تحسين چم نعال بلكي ايفز ضميره وترجع الغيره ضل البيت لمطيره ايبيعون الوطن بيع الغنم بالسوگ كل واحد ايگول التاج اليه ايلوگ صارت سالفتنه انطارة العگروگ عگب ذاك السهر صار ابحلگ غيره ضل البيت لمطيره علچ صرنه ايدور ابحلگ كل الناس فقدنه العاطفه والغيره والاحساس ياهو اللي اتلزمه ايگول انه الراس مثل ذاك الحنطته تاكل اشعيره ضل البيت لمطيره سووا بوش مؤمن خير وحباب انساني وشريف ايحارب الارهاب ولك شو هالدجل لعنه على الجذاب ايخوط ابلا خجل ابكل جدر چفچيره ضل البيت لمطيره اخر مهزله بوش الفته بيها اعتبر صدام قائد حرب تاليها حرب سموا نگرته اللي لبد بيها ساحة حرب بس امچكنمه ازغيره ضل البيت لمطيره ما اعتب على بوش وعلى الامريكان ولا هيئة اممها وكوفي ابن عنان اعتب على النشامه الصبحوا طليان وضل الوطن بيد ابريمر ايديره ضل البيت لمطيره طارت بي فرد طيره هذه القصيده كتبت ايام مجلس الحكم ونزولا عند رغبة الكثيرمن الاصدقاء نعيد نشرها ثانية