الجمعة 16/4/ 2010
زهيريات
(2)سامي عبد المنعم
اصبحت معلول جسمي من هواكم نحل
موال يدوي ابراسي مثل دوي النحل
گلتولي كل مشكله احنه اللي الها نحل
تاليها وحدي الوب ابقصتي ضليت
الناس كلها اوصلت ولدربي انا ضليت
اهل الضلاله نجوا وانه الذي ضليت
نشعل العشره شمع او بگلوبكم ما نحل ؟
ياما نشف نهركم وامنلدمع مليت
كل الكتبته انه انت علي مليت
مهموم محروم من عز نومتك مليت
الگلب خزن قهر من ظيمكم واده
واشگد مراسيل للمايكترث وده
العدو يرگص فرح او بفراگنا وده
مللت حتى الصبر وانه ولا مليت
غنيت من لوعتي مومن كثر راحاي
اجفوف اديه انبرن وانه افرك ابراحاي
كل نوحي عن البقه مو عالذي راحاي
غدران دمعي جره فوگ الارض وانهار
لا صيف عندي او شته ولاليل الي ونهار
اللي بنيته ابعمر ابلحضه انهدم وانهار
صكيت ضرس الندم واتكسرت رحاي
مشيتني ابكل درب ماگلتلك لا وين
واتحملت محنتك وابلا دمع لا ون
ياريتني ما صرت ولا شفتكم لاوين
ضليت ادگ الحزن ويه الصبر والهم
كلما گلتلك من اصحاب الوكت ولهم
گتلي اطمئن لا تخاف امنلزمن والهم
ولايوم اچفوفك لعد چف العدوا لاون