كتابات أخرى للكاتب على موقع الناس

 

الثلاثاء 16/6/ 2009

السيف والمهرٌه سامي عبد المنعم / المانيا قلعة سكر على يا حوبه ... على يا حوبه التفت للشوگ ما خله الوكت حوبه صلاتك .. والذنوب اهواي شتفيده صلاته الكثرن اذنوبه يگلبي .. اشمطول ادروبه يجفني .. الما فرح نوبه يسني .. الما ضحك نوبه يچفي .. الما صفگ نوبه يا موكح زماني الما خجل نوبه يعمري الشابگ اسنينك مثل فاله ابظهر حمريه مصلوبه ساموك ابطمع دنيه باعوك ابفرح دنيه يلمبحر بلايه اشراع عمت عين الگمر لوما ايشوف الگاع يلصارت حسبتي وياك غيم ايعارچ الگمره طبع النخل من يعرگ ايمل صبره ولك والدنيه فارس .. ضيّع اسنينه ابرسن مهره ضنيتك .. فرح ديره .. وزمر تفگه .. ونهد سمره ازامط بيك حد الريح المشرعب يمر بجروحي واحچيله ... سوالف ظيم مكتوبه ابگلب سمچه وشفايف ناسيه الضحچه ايشوگي ... الما شفت راحه ابزمانك .. ايشوگي شوگي ديره .. شوگي دنيه .. شوگي كبر الكون كله شوگي فارس زرعوا الخوف ابخطوته وذبحوا على اجفونه طيف سلبوا سيفه وصلاته ... وضيعوه ابليله ظلمه ابغير سيف راح مهظوم وايحشم بالطوايف بلكت ايدبره سيف ورث ابروحه سؤال اشماله سيفك ما خذه امنسنينه حيف لملم وشال السنين الباقي من عمره وهجر وصار كل عمره سفر امسافر وجرحه متاع امسافر .. وكل الدروب ادروب لكن يا درب يوصل مرامه شال دمه بين چفينه .. ومشه ابدرب الشمس ايشيل كل خطوه ابسنه وعبر شطين العمر ايكابر وجرحه غميج ابغفله لن كضوا مهرته .. وسدوا ابوجه الطريج رادوا ايغيرون دربه لكن اجدامه هوة ذاك الطريج رسموا الموت على چفه وطاح بين الصوت والسكته چتيل صلبوا الچلمه على شفته وحرموا حتى الصهيل رد على اجروحه العتيجه .. شاف كل جرح البروحه ايريد حيف رد على اسنينه العتيجه .. شايل ابروحه تعب سبعين عام ايريد حيف گام يجفل من خياله وحت خياله ايريد حيف حته جفنه ايريد طيف حته چفه ايريد سيف وصرخة ابروحه الحميه اشماله سيفك ما خذه امن اسنينه حيف گام لن ذراعه سيف عادة المضهود چفه ايصير سيف عادة المضهود قلمه ايصير سيف