السبت 16/5/ 2009
حلم
سامي عبد المنعم
شفت الوطن بالحلم..
شايل جنطته وجاي
واسألته ها يا وطن .. ؟
جاوبني صوت الناي
ويلاه ويلاه
ويلاه ويلاه ويلاه
گال اندرچنه ولك
خشبه وخذاها الماي
باعوني بابخس ثمن
واليشترون اعداي
سووني عبرة وكت
وفرجه صرت للناس
شعب الي عندي گضه
شجره او ولاها الفاس
امنين ما تلتفت تلگه الخطف والذبح
حته صديق الامس
داس الخبز والملح
ما همني كل الجره
ولا همني كبر الجرح
بس الذي همني بيدين ناسي انذبح
گتله النتيجه شنو .. ؟
وشاگدر اقدم الك
صبت دمعته ذهب
وخنگته العبره ونحب
وعاتبني بس ابغضب
چا وين فعل الشعب
مو يبسن اشفافي
وليوين ابقه انتظر
وحملي على اچتافي
جاوبته ياوطني
بعده الشعب غافي