كتابات اخرى للكاتب على موقع الناس

 

الخميس 18/8/ 2011

ديمقراطيتنا عرجاء نوري جاسم المياحي مسكين شعبنا ...شعب العراق ...ابتله بلوة من وره غزو الامريكان ...وراح اكلكم فد سر ..سمعته من امريكي .. واصل عندهم ... ويعرف الاكو والماكو ...بعد ما عاتبته ..كلتله وسألته ...انتو عندكم عداوة ويانة (اقصد الشعب العراقي )؟؟؟؟ ليش هيجي سويتوا بينه ؟؟؟ لميتوا وين ماكو مريض نفسيا ومن كل انحاء العالم وخليتوهوم علينا رؤساء وزعماء وقادة وسياسين ؟؟؟ مو ذولة طلعوا كلاوجية وحرامية ونشالة ...وقسم منهم ما يخاف الله ...يذبح بالكطنة ؟؟؟ ليش هيجي سويته بينه ؟؟؟ احنه شمسوين الكم ؟؟؟حتى تنتقمون منا هالانتقام المبين ؟؟؟ صدكوني اخوتي .. صاحبي الامريكي ..ضحك بمرارة ..وصار وجهه اصفر على احمر على اسود ..والدموع تطافرت من عينه ..وكال ليش هذوله ..بس عليكم ضحكوا ؟؟؟ مو علينا هم ضحكوا وصخموا وجهنه كدام اصقاءنا من العراقيين .. احنا امنه بيهم وانطيناهم جنسية امريكية وبريطانية وفرنسية ..وحلفانهم على القرآن والتوراة والانجيل ..ان يكونوا اناس شرفاء ووطنين ومخلصين مو بس للامريكان والاتراك والايرانيين وعرب الخليج ولكن للعراق واهله ...اشو ذوله طلعوا كذابين وحرامية ونشالة ... وخجلونه كدام كل الشعوب اللي احنا نريد نسويه شعوب ديمقراطية مثلنا ؟؟؟ واقسم الرجل اعظم الايمان وكال ..احنا الامريكان والانكليز متورطين ونريد نخلص منهم ونبدلهم ..بس ذوله طلعوا كيرة ولزكت بزبون ابيض ..ومع هذا انتظر ...احنا ضامين الهم فد دالغة ..راح يعضون اصابعهم عليهه ..وهنا توسلت بيه وكلتله ...اخوية ترة روحنا طلعت وما بينا حيل نتحمل ..كللهم خلي يخفون ايدهم ويستعجلون خلي يخلصونا بسرعة ...والا شنو فائدة التغيير بعد ما نموت حر ومرض وفكر وجوع ... ولكن يا اخوان الظاهر حجيي ما فاد ولا سمعوه الامريكان ...والبارحة اني جنت اتفرج على التلفزيون وشفت مقتطفات من فيلم وقائع جلسة مجلس النواب اللي ناقشت قانون تخفيض رواتب الرئاسات الثلاث ... واكول الكم رأيي ...ما جانت جلسة وانما مهزلة مع احترامي لبعض المشاركين بالجلسة ممن رفضوا التصويت ...وبعد ان انبح صوت المواطن ويطالب ويستنكر المبالغ الهائلة من الميزانية وهي تروح هدر وظلما وعدوان وبلا حساب لجيوب حفنة محظوظة قليلة ممن يسمونهم بولاة الامور ..ثبت بالوجه الشرعي (كما يحلو لاصحاب العمائم تسميته) لا الراح جاني ولا الجاني رد الخبر؟؟؟ وجماله والغريب والمدهش !!! منو اللي اعترض على التخفيض ؟؟؟؟..بعض الكتل اللي تصيح ليل نهار تطالب بتخفيظ الرواتب وطلعوا جذابة ..وبس حجي بالاعلام ..واكيد انتو عرفتوهم !!! ومو هاي المرجية منهم !!!! ومو بس هاي ..اللي جلب انتباهي .. جان البعض وباسلوب ممجوج ويلعب النفس ..بكل فقرة يريدون يصوتون عليهه ..ينبصون واكفين مثل (شمعة الفكر) ويلتفتون على جماعتهم الخرنكعية ..معناها هه صوتوا ...هاي شلون ديمقراطية يا ناس ؟؟؟ وين صايرة ؟؟؟ بس بالعراق صايرة .. تدرون منوا الجان ينبص وية تصويت كل فقرة .. انصحكم شوفوا الفلم وانتو تعرفوهم ..وباسلوب فكاهي يصاحبه الضحك والابتسامات والاشارات بالايدي التي تمثل اوامر رؤساء الكتل وهكذا صادروا ارادة النواب الروبوتية ... هيه هاي الديمقراطية يا ناس ؟؟؟ مو مصختوهه ؟؟؟ والمصيبة الامر والادهى .. رئيس المجلس ..من يشوفه الواحد ..يكول هذا دكتاتور وما يختلف عن غيره من الدكتاتورية .. هو بكيفه اللي يعجبه يمشيه والما يعجبه يدغلص عليه .. نايب من النواب ..محروك كلبه على ضحاي التفجيرات الاخيرة راد يناقش جرائم التفجيرات ..رئيس المجلس سكته .. اثنين من النواب اعترضوا اعتراض معقول .. بالقانون ذكروا ان التقاعد شمل من له خدمة ستة اشهر الى السنة ومن السنة فاكثر ... وسؤالهم جان وواللي عنده خدمة سنة ويامن محسوب ؟؟؟ رئيس المجلس وباوامره الصارمة ..اجابهم ... هاي مو مشكلة ... مشوهه .. يابة يا استاذ ؟؟ هذا قانون مو لعب جهال ..ولا هو اتفاقية مع شركات كهرباء وهمية ..؟؟؟ وملاحظة اخرى ..النائب اللي يريد يعتبرها نقطة نظام وتعب نفسه وحجه ..رئيس المجلس ...واللي ما تعجبه نقطة النظام المطروحة .. راسا يعلق وبحدة وصوت جهوري وحازم..هاي مو نقطة نظام .. ويصدر الامر لقاريء القانون ..استمر بالقراءة ..يله مشي .. استمر بالقراءة.. ويبدو لي .. اذا موهيج ديمقراطية ..العراقيين ماتفيد وياهم ؟؟؟ ديمقراطية فلة والنبي مثل ما يعجبني شخصيا وصفهها ... اني اعتب على مولانا السفير الامريكي جيمس جيفري ..ونائب ريسنا المستر بايدن .. وعلى السناتور الجمهوري ماكين وعلى السنيورة المحبوبة .. السناتورة الديمقراطية مدام بيلوسي .. تقبلون بهاي المسخرة والنموذج المخجل من الديمقراطية .. والله اقولها بصراحة ابو كاطع حتى ديمقراطيتكم اللي وعدتونه بيهه ...كرهناهه .. الله يخلي ألكم جهالكم .. ما تسوون النه جارهه ؟؟؟ وخلصونا من هاي الديمقراطية ... مثل ما ورطتونا ؟؟؟ لعد هي صايرة دايرة ...أني كضيت من عمري 30 سنه ضابط اسهر الليالي واركض النهار كله (من 1959 -1989 ) ومتزوج نسوان اثنين وعندي عشيرة من الاولاد والبنات .. وايتام وارامل .. وراتبي التقاعدي 750 الف دينار وبس الكهرباء يكلفني نص مليون بالشهر ... وما اكدر اشتري ركية بعشرة الاف دينار..حتى ابلل حلكي وحلك الاطفال ... ومحد يصدك ..اني جنت اشتري بيكب ركي من علوة الشعلة بخمسة دنانير واوزعها على الاهل والجيران ببلاش .. و اليوم ركية وحدة ما اكدر اشتريهه .. ويجي فد واحد شلايتي دجال نصاب زايعته الكاع ..لا عنده شهادة ولا خدمة ولا خبرة ولا فاد الوطن بفد شي ..بس الشفط واللفط ..ويكولون البعض منهم اميون ..لا يعرفون يقرون ولا يكتبون .. والافندي .. يخدم 6 شهور ثلاثة اربعاها كضاهه بالخارج يتونس وي عائلته ويستلم راتب تقاعد بالملايين ..هاي وين صايرة يا مستر جيفري ويا مستر بايدن ومسز بيلوسي ومستر ماكين ؟؟؟ وانت ايضا يا مستر كاميرون الانكليزي ؟؟ شلون ترضاها ضمايركم ان جان عندكم باقي شوية ضمير ؟؟؟ يا غربيون ..ويا ديمقراطيون ... اعلموا جيدا ما يلي :- العراقيون ليسوا اغبياء ولاحمقى ولا جبناء .. ويميزون بين الديمقراطية الحقيقية والمزيفة . العراقيون يحترمون الانظمة الديمقراطية في العالم التي تحترم حق الانسان في العدل والمساواة وفي الحياة الكريمة العراقيون يرفضون تبديل حكم دكتاتور واحد بعشرات الدكتاتورين كما هو حاصل في العراق اليوم ...وانتم من سواها .. العراقيون ... يعترفون بعدم قدرتهم على تغيير ما فرضه الاحتلال..دستور مشوه ونظام فاسد وقيادت لاتحترم ارادة الشعب .. والمواطن حاير يركض وره الخبزة لاطفاله .. العراقيون يستنجدون بكل قوى الخير والديمقراطية في العالم لمساعدتهم في تغيير النظام الطائفي المحاصصي التوافقي الفيدرالي الفاسد .. ولي طلب صغير وبسيط ورخيص اطلبه من سيادة السفير الامريكي .. ان يتبرع بمنظومة الكترونية لتصويت النواب . لتغيير طريقة واسلوب التصويت في مجلس النواب بدلا من رفع الايدي المتخلفة والرجعية ووقوف شمعات (الفكر) المعروفين ..الى طريقة التصويت الالكتروني والسري ..واظهار نتائج التصويت للشعب على الشاشة فورا وبدون تدخل خارجي واحترام ارادة بعض النواب ممن يريدون الاصطفاف الى مصلحة الشعب بدل تنفيذ اوامر رؤساء الكتل ومساعدتهم على تمزيق حاجز الخوف والمصلحة الانانية عندهم ...ومثل ماموجود في الكونكرس الامريكي ومجلس العموم البريطاني ..هل هذا صعب ؟؟؟ لا أعتقد ذلك .. حتى لو أعترض قادة الكتل على ذلك ؟؟؟والله عيب على النواب السكوت و ان يسمحوا لمن يسرق حقهم وحريتهم في التصويت لصالح من انتخبهم !!!! العراقيون صحيح انهم يائسون ومحبطون من مجمل العملية السياسية .. وهم يرددون دائما بيناتهم وبصوت عالي .. يالله تنكضي .. لاتديرون بال ...لابد يفرجهه رب العباد .. مادامت لاحد .. جان دامت لغيرهم حتى تدوم الهم .. العبارة الشائعة على لسان كل عراقي مظلوم منكود كتب عليه ان يعيش تحت ظل ديمقراطية عرجاء بلهاء شوهاء كديمقراطيتنا ... اللهم احفظ العراق واهله ..اينما حلوا او ارتحلوا