| الناس | الثقافية |  وثائق |  ذكريات | صحف | مواقع | للاتصال بنا |

موقع الناس .. ملتقى لكل العراقيين /  ديمقراطي .. تقدمي .. علماني

 

 

مناضل الفياض

 

 

 

                                                                                 الجمعة 15/7/ 2011



وطن بالمزاد

مناضل الفياض

الاسباب الموجبة : ابناءه الكبار لم يتفقوا على الارث كل منهم يريد ان يستقطع قطعة منه , ولذلك وضعوه في ازالة الشيوع , لعدم اخلاص الابناء الكبار لارضهم وناسهم , ولعدم تفرغهم اذ لديهم النية للسفر خارج الوطن ( يعني يردون يكلبون بالدخل ).

مواصفات الوطن واهله :
مساحته
437072 كم مربع المجموع الكلي
432162 كم مربع اليابسة
4910 كم مربع المياه

له جيران لا يتدخلون بأموره الداخلية , جوارين وردة واحدهم ينحط على الجرح يطيب .
فيه نهران يمتدان من الشمال الى الجنوب , يعني النسوان يستطيعون غسل الملابس براحة تامة على الشاطئ , لان الماء لا يصل للبيوت.
الكهرباء مقطوعة اربعة وعشرين ساعه, صيف شتا , والتجربة اكبر برهان.
فيه الكثير الكثير من النفط الاسود مثل حظ اهل هذا الوطن اسود , وهم ليسوا بحاجة اليه والنفط باقي على حاله , ولذلك المشتري يستطيع ان يستثمر في هذا المجال , بس خلي يشتري عداد لبايبات النفط حتى لا يسرقوه السراق.

اهله طيبين جدا ( يعني كمش ) بسرعة يصدكون وبسرعة يصفكون لحاكمهم , وبسرعة ينسون , كلبهم طيب ، طيب بشكل , وخصوصا الشباب ماعدهم شغل وعمل , من طيبتهم وضياعهم يلقبونهم بالحدايق, يعني ماعندك مشكلة مع اهل الوطن.

فيه حواجز كونكريتيه تفصل منطقة عن منطقة تلافيا للمشاكل,
الطرق منظمة جدا والمرور فيه دليل ثقافة, وخصوصا سواق الكيات احلى اخلاق فهم ليسوا بحاجة لشرطة مرور لتنظيم السير وهذا يوفر المال الكثير لمن يريد ان يشتري هذا الوطن .

فيه المذاهب والطوائف كلب على كلب يعني ماكو اي مشكلة.
العواصف الرملية تكاد تكون معدومة .
ليس فيه حواسم ولا صكاكه ولا علاسه ابد ابد بس اكو اثنين ما يكعدون راحه هما المالكي وعلاوي بس المشتري يكدر يقنعهم يخلي لكل واحد كرسي كبير, ويخلي واحد للسياسة الخارجية لانه علاوي يحب هذا المنصب كلش كلش , وخلي المالكي للسياسة الداخلية لانه كلش يحب وزارة الداخلية , بس يخلي بيناتهم مسافة كبيرة لانهم ما يكعدون راحة , واحد يتحرش بالاخر يعني هوايتهم المشاكل , او لكل واحد ينطيهم بير نفط ، الامور كلش تصير زينه .

بس اكو ملاحظة صغيرة , الشعب اذا شاف المشتري ما يشتغل عدل ستكون ساحة التحرير شعلة من حماس الشباب والقوى الوطنية وستسقطه لا محاله

(مانبيعك يا وطن مهما تشتد المحن)

 

free web counter