| الناس | الثقافية |  وثائق |  ذكريات | صحف | مواقع | للاتصال بنا |

موقع الناس .. ملتقى لكل العراقيين /  ديمقراطي .. تقدمي .. علماني

 

 

ميسون نعيم الرومي

 

 

 

 

                                                                   الأحد  13 / 7 / 2014

 

دارميات

ميسون نعـيم الـرومي


اتوچه مابياش .. ضيمك كتلني
اسنيني انگضت وياك .. رايد تذلني؟

´***
مولح صبي العين .. بسچن يالعيون
ما افرزن اليمشون .. ضنوني مجنون

***
هاك اخذ هاك العين .. واشلع اصبيهَه
عين الماتشوف اهواي .. ماريده ضيهَه

***
تكسر اضلوعي احا .. تردس على اچلاي
عيني وساده ليك .. وارموشي لفياي

***
بسك تعذب الروح .. واتغمگ الجروح
چبدي انزرف واچلاي .. والگلب مذبوح

***
أچوي الگلب عطاب .. بارماد ارشه
يبچي اويدگ كل يوم ..سواي وشه

***
تكسر اجناحي آخ .. تگطع وريدي
تمشي اوتصد ليغاد .. وانت عضيدي؟

***
ما تطلع الدمعات .. بيهن أغصَّنْ
صارن جمر بالروح .. لحشاي إيگصَّنْ

***
تجرح بالجرح .. والجرح هم مجروح
شريان اووريد اتريد .. من گلب مذبوح؟

***
بين السمه والگاع .. هايم واحومي
ما ظل عگل بالراس .. ضيعني نومي
 

تموز/ 2014
ســــــــتوكهولم
 

free web counter