كتابات أخرى للكاتب على موقع الناس

الجمعة 7 / 6 / 2013

سلسلة "سوالف الشعب" (9) د. مزاحم مبارك مال الله • أبو مظلوم ،يابو مظلوم، شنهي شجاك ،دحجيلي ،خليني أضحك وياك • يا ... تسودن الرجال! ،يع ،أبو مظلوم دبسك ضحك، جا اريد اضحك وياك - (بعد برهة من الضحك المتواصل وقهقهة)، ولج شحجيلج ،سالفة أتموت من الضحك ،و حتى أذا حجيتلج ،جا أنت شتفتهمين؟ • ليش عود، شنهي ماعندي عقل؟! - لوعندج عقل جا ما أخذتي واحد مثلي عطال بطال وما يخلّف وعودين أنت الثانية، • أبو مظلوم هسة آنة سعيدة وياك ،ما أريد خلفة ،المهم أنت عندي بالدنية كلها ،بروح أبوك أحجيلي ليش جنت تضحك؟ - (رجع لنوبة الضحك لكن اقل)، سمعت بالرايدون: وزارة الاعمار العراقية كاعد تبني بالصومال مؤسسات بخمستعش مليون دولار،(ورجع للضحك مرة أخرى) • أي وشكو بيها خلي يبنون، جا البنيان أحسن من التفليش - موش أكلج أنت ما تفتهمين! ولج جا همّ عايفين مدارس الطين راح توكع على روس الطفال، وعايفين الشوارع المليانة خيسة ،وعايفين الوادم عايشة حواسم ورايحين للصومال؟! أنهجم بيت أبوهم ع هل الشغل، ترة ياجماعة عود صكد هاي السالفة أتموت من الضحك. • أكلك أبو مظلوم جا هي الصومال بعيدة؟ - شوفي أنتي يرادلج كلب ما مدشن،(وبأستهزاء منها، قال) الصومال هنا يم بيت أبو العدالة ،خليني أروحله أشوف هاي المصيبة أنوب شنهي. (دخل بيت أبو العدالة ووجد مجموعة من أهل المحلة يتجاذبون أطراف الحديث) - سلامن عليكم = وعليكم السلام - ياجماعة سمعتوا بسالفة الخمستعش مليون دولار راحوا يبنون بيها بالصومال = هسة جنا أنسولف بيها، تفضل أبو مظلوم، تفضل ، أكعد - وشتكولون؟ (قال أبو فاطمة)/ يابة ترة هي ما تخله من اللغف ،سوولهم فد لعبة علمود تنحط الفلوس بالجيب ،جا منهو اليقرة ،منهو اليكتب، وشويديها لجنة النزاهة لهناك، بوية أشبع أفلام ، (قال أبو العدالة)/ حسبة اللغف الله الليعلم بيها ،ليش هي بس هاي ، كلش هواي شغلات أتوكف العقل، أربعة من المدراء العامين جانوا وية أستاذ سنان الشبيبي بالبنك المركزي ،نايمة عليهم طابوكة صارلهم ست أشهر محد مكلبهم ،وهمّة نزيهين وشرفاء ،هاي وحدة والثانية سالفة جهاز الفحص مال السيطرات وما ظل واحد ما ضحك عليه ،يابة حتى اللي سوّة الصفقة وية العراقيين حكموا عليه بالسجن جماعته هناك بلندن، والسيطرات نفسها حدييدة عن الطنطل ،وعدكم سالفة صفقة الاسلحة الروسية ،وعدكم الحَجي الجاي ينكال على مفتش عام وزارة الصحة ،وعدكم رواتب قطعان صدام، وعدكم رواتب أعضاء البرلمان والنوب رواتب التقاعد مال أعضاء مجالس المحافظات ،والشهادات المزورة والايفادات الكلاوات وتهريب المجرمين والكهرباء اللي معاندة ما تتصلح والماي الخابط بدل ما ينطوه للحدايق كاموا ينطوه للوادم اتشربه والأمراض الجثيرة و، و...(قاطعه أبو مظلوم) - بوية أبو العدالة، لا ،أنة أجيت علمود سالفة الصومال ،أذا عندك علوم بيها أحجيلي ،شو أنت أخذتنا طول بعرض = ها أبو مظلوم شنهي تريد تروح لهَناك بعد أخوك؟! - تردون الصكد ياجماعة الخير،شو جنهة ضربت براسي ،أكول بلكت أشتغل وية الجماعة هناك بالصومال ،لأن بالعراق ماكو شغل ،الناس عطالة بطالة، وعدالي بس آنة ما عندي شغل شو طلعوا بالملايين ،كلت بلكت ياخذون عمّالة منّا. (وأذا بمجلس الربع جميعاً بما فيهم أبو العدالة ينفجرون ضحكاً على أفكار أبو مظلوم البسيط) - ها خوية شو جاي أتضحكون ،شنهي حجيت فرد شي يضحّك ؟! (سأله أحد الجالسين) ، وأنت يبو مظلوم تندل الصومال وين؟ - أدري خوية بعيدة ،وبعيدة كلش، لأن يجيبون منها الموز مسلفن وبالكراتين ** أي تمام بعيدة بس وين؟ - جا غير يم افريقيا!(فخفض الحاضرون رؤوسهم مبتسمين) = هسة لو كايل تريدلك وحدة صومالية ،بيها باب وجواب ،بس مال تشتغل ، هاي واكفة أبو مظلوم ،وحتى لو أكو ياخوية ،جا ينطوكياها ،هاي شبيك ياعيني ، غير كل واحد وربعة، صارلي ساعة الغي على شنهي الله يخليك!! - جا آنة منهو ألي ؟ شو لا شغل أهلي ولا حكومي، جا وين أنطي وجهي؟ بس هاي الزوية مالة الحواسم ،شلون أعيش فهموني؟ = شلون أتعيش؟ كول شلون يعيشون هذولة الناس بالملايين مثلك أبو مظلوم! - أي صدك بالملايين ،واريد أروحن للمنطقة الخضراء وأصيح بأعلى صوتي ، بلكت أبو أسراء يسمعني (أبتسم أخر قائلاً) ، أبو مظلوم لاتتعب حالك ترة جام سيارات ابو اسراء وجامات بيته ضد الاصوات موش ضد الرصاص ،ولعلمك ،ترة الصوت الواحد ما ينسمع ، أبو مظلوم ،لازم كل المظلومين يجون وياك (قال أبو فاطمة) ـ بوية ترة أشوفنها هم لازم ياخذون موافقات أمنية ع الصياح !!