| الناس | الثقافية |  وثائق |  ذكريات | صحف | مواقع | للاتصال بنا |

موقع الناس .. ملتقى لكل العراقيين /  ديمقراطي .. تقدمي .. علماني

 

 

د. مزاحم مبارك ماالله

 

 

 

                                                                                  الأثنين 29/4/ 2013



سلسلة "سوالف الشعب"
(2)

د. مزاحم مبارك مال الله

حِلف وحلفانة على روحه، وكال رحت أنتخب ولمن دوروا أسمي لكوا توقيع كدام أسمي ،كالولي يابة أنت منتخب ،"ياجماعة والله العظيم هستوني أجيت، وهاكم أصابيعي شوفوها،
لمن شافوني حمقت، كالوا، يلله، يلله، لا تهوّس ،هاك هاي أستمارة وأنتخب،
هاذ الحجي حجالياه ولد يشتغل عدنه ،وكال: عمي أبو مظلوم وحك هو العباس شفت القوايم كلها موقعين عليها ،بس المركز الانتخابي فارغ وأنة رحت من وكت على برد الصبح ،جا عودين هاي الوادم شوكت أنتخبت؟"
ياجماعة الخير الدم صعد براسي ويمكن الضغط هم صعد من سمعت هل الحجي ،وكالمعتاد علمود أفوّخ روحي رحت لجاري المرشح أبو العدالة وحجيتله كل الحجي اللي سمعته..
• أبو مظلوم خوية أسمع مني،أولاً لا تستغرب، وثانياً الربع مقهورين من يوم قررت المحكمة عودة الحكك لأهله بعد ما سوينا حملة لاتسرق صوتي
- أي أتذكر حملة لاتبوكون أصواتنا،
• وملاعيبهم ما يجوزون منها ،هذي معركة ،معركة بين الخير والشر ،بين الظالم والمظلوم ،بين الشبعان الماخذ كلشي وبين الجوعان اللي يتفرج عليه ،معركة يبو مظلوم بين الحكك والباطل، وهمّ كلشي مستعدين يسوون، يزورون ،يوزعون هدايا وكارتات وفلوس ،خو واحد كالي عمي ،" كفيلك الرسول محمد واكفين براس الشارع مال المركز الانتخابي ويوزعون ظرف بيه أثنين أمهات الخمسة وعشرين تنتخب القايمة الفلانية بس تحلف بالقران"، وغيرها وغيرها
- بوية ! أحلف بالقرعان؟ ولكم هاي شلون أتصير؟ هاذ حرام ،وهاذ معناته ان الانتخابات موش نزيهة يبو العدالة!
• طبعاً ،مو بس هاي، ترة الناس وللأسف هم يتحملون جزء من المسؤولية ،لأن ما راحوا حدثوا المعلومات فالمفوضية ومن جوة العباية أستغلت الفرصة ولعبت بالاسماء شاطي باطي، وشوف النوب خليني أورجنك على شي، شمعنى الجيش والشرطة نسبة الانتخابات مالتهم 72% لجن الناس وأبغداد 33% ؟ هذا يعني أن الجيش والشرطة يخافون وساكوهم سوك للأنتخابات وبلغوهم ينتخبون القايمة الفلانية، والماينتخبها تراهو الخسران.
- أبو العدالة / جا أنهجم بيت أبوك ،كل هذا الحجي ضامة أبطنك ، وعدالي أنة جايبلك خبر مال الوليد راح تكلب الدنيا علمودة؟
• ابو مظلوم ترة الموضوع مو بذيج البساطة يعني الكتل الجبيرة حتى كلمة ديمقراطية ما موجودة بقواميسها ولا بلغتهم ،هسة عودين هلوكت شوية من المستحة كاموا يحجون بيها ،يعني همّ يعترفون بالتعددية نص ردن،لأن واحدهم اشترة سيكوتين وية بدلة الصورة مال الانتخابات ،حتى كلش يلزك هل اللزكة بالكرسي.
- أكلك أبو العدالة ولو أنة سويتها بلايا ملح ،زين المجلس القديم ماقدم خدمة للوادم ،بالكوة بالمروة هم رجعوا للكراسي ،شنو الحل برايك ،الناس الزينة ما جاي تكدر توصل شلون بلله؟
• ابو مظلوم الفسيلة أول ما تزرعها تطرح حملها؟
- لا
• الأكل أول ما تحطه ع الجولة يستوي وتاكله؟
- لا
• المرة اول ما تحبل أتجيب ؟
- لا له
• أي خوش جا أذا هذني تعرفهن ،عود شمعنه من توصل للسياسة تريدها بساع بساع ؟
- يعني قصدك ...
• قصدي من ننجح أني وأنت وأمثالنا بأقناع الـ67% يحدثون سجلاتهم وينتخبون الأيد النظيفة بذاك الوكت أحنا بخير وجاي نمشي تمام
- فدوة أروحلنك أبو العدالة ، سامحني عود شمعنه 67%؟
• ها يابة ، ها شكلنا ، ينراد وكت يلله تفتهم يابعد اخوك!



 

 

 

free web counter