كتابات أخرى للكاتب على موقع الناس

الأربعاء 27/3/ 2013

هاي الوجوه .. كلها ما أعرفنها !! د. مزاحم مبارك مال الله وقف ، يتفحص صور الوجوه التي حملتها الفليكسات والبوسترات صرت بمحاذاته، رأيت الحيرة على محياه وهو ينفث دخان سيكارته متأفأفاً ... سألته مستفزاً : "شبيك حجي شو محتار؟" نظر اليّ نظرة المتسائل قائلاً : "بروح أبوك، بلله شمعرفني الزين من الشين بهاي الغابة مال الصور" قلت .. "حجي، هاي دعاية انتخابية ومن حق كل مرشح يعلكك صورته حتى يعرفك بنفسه واللي يعجبك تنتخبه". واذا به يطلق ضحكة عالية ، معقباً .."بشرفك أنت مقتنع بهذا الكلام ، يعني تريدني أنطي صوتي على الصور، اذا هيج ، خو أنطي صوتي لصورة مرية حلوة ، يعني على الوجه ، تطلع خوش مرشحة أو مو خوش هاي الله اللي يعلم بيها، بس أني صوتي موش على الصور يبعد اخوك ، صوتي على العقل والفكر، على اللي اله موقف ويه الشعب، يعني صاحب مبادئ ، مو ينساني لمن يكعد على الكرسي" ثم اضاف :"يعني هذولة مصدكين .. مجذبين؟ صارفين هل الملايين على الصور والدعاية ، شنو أشايفين ! الشعب ما يفتهم ،لو ما يعرف ،لو غشيم ؟ عمي، الله وكيلك شعب العراق مو مثل كبل ، صدام هدام والامريكان غلطوا لمن عبالهم شعب العراق يتقشمر. عقبت : وهسة حجي ما صفه رايك على مرشح ،على قائمة ؟ فأجابني منفعلاً : "جا صارلي ساعة أحجي ويامن ، شني أنت من يا جنس بشر ، أكلك ، الصور ما تعني شي ، بوية .. أني هسة اقتنعت باللي راح انطيه صوتي، للناس النظيفة اللي ما اتوصخت ايدهم ،الناس العدلة اللي ما يرضون بالأعوج ، ناس يحبون كل الطوايف والاديان والملل، ناس بيبانهم مفتوحة للرايح والجاي، يريدون الخير للشعب وللوطن. هذا الحَجي مال جوارينا ، وأشهد ما بالله طلع صدك، وأستمر بحديثه : شوف خليني اخدمك .. هذولة يسمونهم تحالف العدالة والديمقراطية العراقي ورقمهم أربعة ، أثنين ، أثنين" مثل ما كالي جاري الطيب.. فقلت له ، "كول يعني قائمة الشيوعيين" فأجاب :"والنِعم منهم خوش ناس ، مثل جاري ، بس ترة همّ مو بس شوعية ، بيهم هواي احزاب وحياة ابوك .." سلمت عليه وأستأذنته بالأنصراف ، أبتعدت خطوات ، ولكن أستدركت لأراه ، يعيد تعليق فليكس تأثر بالريح العالية، فليكس ، كتب فيه :"العراق تبنية أيادي بيضاء، أيادي العدالة والديمقراطية " د. مزاحم مبارك مال الله / مرشح قائمة العدالة والديمقراطية العراقي 422