كتابات أخرى للكاتب على موقع الناس

السبت 25/5/ 2013

سلسلة "سوالف الشعب" (7) د. مزاحم مبارك مال الله - ساعة 8 بالليل أندكت الباب ،وياها واحد يصيح ،أبو مظلوم ،يابو مظلوم ، فتحت الباب ،ياهو هاذ؟ ها خوية أبو فاطمة شجابك ،شنهي شبيك؟ تفضل ،هلة هلة.. • أبو مظلوم ،جا أنت جاعد هنا وداير التلفزيون على المسلسل التركي ، دَ شوف العالم شلون أنهجمت بيوتها ،أنت سمعت بالطكن هسة كبل ساعة؟ - (بحسرة كلت)، أيييي سمعت ،سمعت يبو فاطمة، الله لايوفق اللي جاي يسوي هَيج بالوادم. • هو ياهو هاذ اللي تدعي من الله لا يوفقة؟ - جا غيرعلى اللي طكهن؟! هاي شبيك أبو فاطمة؟ • وأنت لباللك رب العالمين منتظر دعواتك ودعوات غيرك علمود ما يوفق هَيج مجرم؟ - ها جا شنهي؟ شمدريني يمعود ،حجاية وتنكال! • موش هاي السالفة أبو مظلوم ،أكولن ،السيارات وطكن ،والوادم تذبحت ، سيارات الاسعاف تنكل ،سيارات الشرطة تصيح ،الناس تتراكض، والنوب الطركاعة هاذ الرمي ،على شنهي ،ما تدري؟ يعني ناس أستشهدت وبيوتهم أنهجمت ،و(بطّلْ حيلي)هل الاطفال اللي تكطعت، كون دعوتك يبو مظلوم تصير على المسؤولين الخاتلين ورة الصبّات، - أي والله لا عاب حلكك ،والله لايوفق المسعولين اللي ما يحمون شعبهم. • بس تعال جاي يبو مظلوم خليني أنشدك ،الفلم يبعد اخوك شنهي؟ السالفة تاهت علينا، شنهي تفجيرات؟ ،شنهي يذبحون باليزيدية؟ شنهي أنتخابات؟ شنهي ما يردون قانون هاي الانتخابات ،ترة والله ياجماعة صكد سالفة، - وأنت جاي تنشدني ،شلكيتني؟ هَيج فاهم بالسياسة؟ • الوادم اتكول انت كلشي تعرف بموجب الاستاد أبو العدالة اللي انت مرافجة ليل ونهار. - ابو فاطمة، دَمشينة خوية نسلم ع الزلمة وهم نفتهم منة ،ترة آنة مو بس لايصة عليّة ،لاجن كمت بعد ما اوجد الصح من القلط * جا بهلوكت أنروح ،موش عيب؟ - عيب؟ أنت موش جيتني بهلوكت؟ دَمشنة ،أمش، هو هنا بسدي حايط ع الحايط - الله يساعدك ابو العدالة ،جينا نسلم عليك وابو فطيم عدة جم سعال جاي يسعلك بيهم، آنة عن نفسي كلشي أعرف ،وحجيتله هواي(قال ذلك وهو ينظر الى أبو فاطمة نظرة توجس من عدم فضح تجنيه) ،بس هو راسة وألف سيف الاّ يسمع منك، ** أهلاً وسهلاً ،أنة حاضر ،تفضل أبو فاطمة ،كول • آنة دايخ يلأستاد ،دايخ هينوب ،شو ما جاي أفتهم ،صديم موش وللى ،يعني مو بعد ماكو واحد ينفرد بينا؟ ** تمام • جا ما ادكلي شني السالفة؟موش العسكر واحد وربع؟ ،شو طلع المنتخبين ثلثترباع ،جا النص وين راح؟ عوف هاي ،همّة لايردون قانون الانتخاب هاذ ولايقبلون بالباجي الاكبر ،يعني لايرحمون ولا يخلون رحمة الله تنزل! وهم عوف هاي ،كلي رحمة على الماتولك ،سالفة هذا الكتل والذبح شنهي ما يخلص؟ جا الشعب شوكت يرتاح؟ والثانية والاخرة ، انتم الزينين ليش ما طلعلكم أكثر من عشر كراسي؟ ** بعد عندك سؤال أبو فاطمة؟ • لا ، الباجيات سولفهن الي أبو مظلوم !!!! ** خوية ابو فاطمة ، أسـ - ابو فاطمة ،جا انة موش سولفتلك وكتلك الربع لغفوا النص مال العسكر، وموش كتلك ماراح يقبلون بهاذ الغانون ولا بالباجي الاكبر وحتى لو تعوفلهم كل البطايق مال الانتخابات هم يردون بعد ،عمي ناس فكور ماشايفة جا هية بكيفك؟ وسالفة الكتل والذبح بوية علمود يخوفون الوادم ،ناس ما تخاف من الله ،عود همّة خاصين الوادم، من الله يطيح حظهم ،بوية ذولة ياصدام ياهدام من الله لايوفقهم ولايشوفون العافية .. * ** ** خلصت، أبو مظلوم لو بعد عندك؟ - أبو العدالة ،وداعت ويلادك موش صحيح اللي حجيته؟ ** أشهد ما بلله حجيك صحيح ،بس مرة الآخرى لاتسب الوادم ولا تغلط عليهم ،بالنسبة النا الحزب علمنا شما يكون عدونا بس لزمن لا نسبه ولا نحجي عليه حجي مو لايق • لا عاب حلكك خوية أبو العدالة ،وما خسر اللي سماك بهل الاسم بعد شيبي، ** وكلام أبو مظلوم صحيح مضبوط، والكتل تراهو علامة على فلتان الامور من ايد الدولة لأن ماكو امن ولا امان والسبب أنتم تعرفونة ،الفساد ،بوية الفساد ،لجن سؤال أبو فاطمة كلش حلو، ليش حصلنا بس عشر كراسي ، العشر كراسي خوية يبو فاطمة مثل عشر قنابل وكعن اعلى بيت المحاصصة ،مثل عشر سجاجين بخاصرة الطائفية ،عشر حجارات على رووس الما يحبون الديمقراطية، وماكو حمل يبو فطوم يظل مطروح ،العشرة تصير عشرين ،والعشرين تصير ميتين وهذا كله يعني نضال من اجل السعادة والعدالة، يعني هسة من تريد تطبخلك أكله طيبة، أول ما تجيب المسواكك تحطها ع الطباخ أتصير الاكلة؟هم يرادلها وكت! وهاي العشرة ترة جبناها بزودنة موش بزود التهديد والترغيب والخوف والمشترة ،جبناها بذراعنا، يعني بروح أبوك ياهو الاحسن الطالب اللي ينجح بالدراسة والمثابرة لو بالغش؟ • أي تمام خوية بس احنة نريد نفرح بالزينين - هسة أنت شسويتها سالفة! ،الاستاد يكلك العافية بالتداريج، بس أكلك أبو فاطمة أنت هم رحت للأنتخاب؟ • لا والله جا غير زعلان ع الحكومة! - أنت زعلان ع الحكومة ،وصوتك ضاع وشكد أكو مثلك زعلانين ،خوش أنت زعلان ع الحكومة ،جا هم زعلان على جماعة أبو العدالة؟ • عفة!! أنة أزعل ع الاستاد؟!وسفة، ـ أبو فطيم ،شوف ترة راح اتخليني أشك هدومي واطلع بالشارع مثل المسودن ،من صوب ما تنطي صوتك للزينين ،ومن صوب ليش جايبين عشر كراسي؟ دكوم ،كوم خلينا أنولي تعبنا الريال، كوم وحضر روحك للأنتخابات الجاية بعد سِنة ،وهم كول ليس ما جابوا خمسين كرسي! ** أبو مظلوم ليش راح أنجيب خمسين كرسي بالبرلمان؟ • مؤكد، لأن أنتم الزينين والشعب دومة وية الزينين وراح تشوف ..