كتابات أخرى للكاتب على موقع الناس

الخميس 21/3/ 2013

لا تنطيني صوتك د. مزاحم مبارك مال الله أعوذ بالله من كلمة "أني" إذا أني أنتقدهم .. وأني أحجي عليهم .. وأني أسولف على دكايكهم السودة وأني فاضحهم وأني كاشف أسرارهم وأني ... يبَعد أخوك ، راح أنافسهم وعندي كل القوة ،القوة اللي ما يمتلكونها قوة الشعب، شعب النخوة، شعب ثورة العشرين ووثبة كانون وأنتفاضة 52 ونضالات 56 وثورة 14 تموز 58، شعب الشهداء ،وكل هذني اللي عددتهن أني وقائمتي إنّا بيها حصّة، مو محاصصة ،لا تتوهم ،حصة بالعمل والنضال والأمل، وطلعنا ونبقة بوجه أبيض وأيدينا الأبيض.. ماعندي (فلوس) أسوي بيها فلكسات وعزايم وأوزع... !! بلله همّ ما عدهم جذر وية تاريخ الشعب ويسوون هيج ، لكن أني بجيت ويه شعبي ، وضحكت وياه وفرحت وياه وهوست وياه، دخلت السجون علموده ،وحبايبي أستشهدوا علموده، ما أحتاج أوزع ولا أعزم، ما أملك الاّ أفكاري اللي عرفتوني بيها.. جا أنت ما تعرف أفكاري اللي أريد أشتغل بيها؟ خليني أسولفلك، أريد أطرد الفاسدين، وأشغل العاطلين، ابني مدارس ومستشفيات، أحدد أجور الكشفيات وأسعار الأدوية ،أبلط الشوارع ,ارفع الحواجز، أسوي الكهرباء الوطنية تشتغل طول اليوم ، الماي النظيف ورواتب المتقاعدين لازم يصير بيها إنصاف، نعاون النسوان، ونوزع الاراضي على الفِلح وياها البذور والسماد ،عيب علينا حجاية الحواسم لازم نبني بيوت للوادم وغيرها وغيرها... لا تحتار.. بالاختيار ،أختار الصح لأن أنت صح أنت مو تكول، هذولة مو خوش مجلس ،أي كلش زين، هنا أنت صح ،بس لازم يتغيرون، شلون؟ بأنتخاب غيرهم زين ،شنو رأيك أذا أطالب مجلس النواب ،أن يشرّع قانون ،اللي يخنث بوعده ،يطلعوه بعد سنة ؟! شتكول؟ لعد ..أذا محتار وما تعرف شتختار ،أسمع مني: هي الانتخابات مو تصير كل فترة؟ ،خوش، وأني خو مو بس هاي الانتخابات وأبطّل ،هم راح أشارك أني وحبايبي كلما أتصير الانتخابات أذا ما طلعت أني مثل ما حجيتلك ،لا تنطيني صوتك ولا تنطيه لحبايبي .. خوش لو مو خوش... د. مزاحم مبارك ... مرشح قائمة 422