كتابات أخرى للكاتب على موقع الناس

الجمعة 17/5/ 2013

سلسلة "سوالف الشعب" (5) د. مزاحم مبارك مال الله اليوم من الصبح ضايج، أحسّن جني مختنكك، روحي تريد تطفر من خشمي، وجاري الطيب أبو العدالة لزمن يدك الباب ويطمأن عليّة يلله يروح لشغله، ومن الباب، يصيح: ·       صباح الخير خوية أبو مظلوم -         ها، ابو العدالة ،تفضل ،دش، تعال، تعال أشرب وياي أستكانجاي ،ترة آنة اليوم مال خلكك، ·       ها خوية سلامتك ،شنهي شبيك ،شجاك ،صار ألف مرة أكلك عوف هاي السموم ،الجكاير ،شني ،هسة لو بيها فايدة ما كول شي، -         لا ،لا موش سالفة صحة وسعَلّة ومرض، السالفة جبيرة ،آنة مهضوم ومالوم من الاوضاع اللي جاي تصير بسوريا ،خطية هل الشعب المسكين ،شنهي ذنب الوادم تتكتل يومية، ·       ابو مظلوم هاذ اللي جاي يجري بسوريا تراهو جره عدنا وعد غيرنا، -         أي ،أهنا يبو العدالة ،أهنا أريدنك تحجيلي شنهي الفلم ،لزمن تفهمني ،ترة وحياة أبوك أنلاصت عليّة وما جاي أعَرف الصح من القلط ،وكلت محد يفهّمني غيرك ،لأن أنتَم بالحزب تخلون الواحد يعَرف الصح، ·       شوف خوية أبو مظلوم ،هاي الانظمة ،اللي جانت بالعراق ومصر واليمن وتونس وليبيا ،هي أنظمة دكتاتورية ،وهي السبب اللي خلت شعوبها تثور عليها، -         أبو العدالة ،أنت مو تريد تفهمني؟ ·       أي طبعاً! -         جا خوية ،لا يصير حجيك مثل الختيلان ،فدوة أروحنلك ،شنهي معناة الحكومة تخلي الشعب يثور ،بلله هذا الحجي ينعقل؟ ·       طبعاً يبو مظلوم ،طبعاً من ظلمها ،من جورها، حكمت الشعب بالحديد والنار ،أوومنعت التظاهر،ومنعت الراي الثاني ،أنتخابات ديمقراطية ماكو ،لجن سجون ومعتقلات أكو ،برلمان يمثل الشعب ماكو ،لجن الحكم للحزب الواحد والفرد الواحد أكو ،و.. -         ها هسة أفتهمت ،يعني هم الشعب ضاج خلكة مثلي أني ،بس هو ثار ع الحكومة ·       أي عفية عليك يبو مظلوم ،والمشكلة مو بس الحكومات ضد شعوبها ،أكو قوى أخرى ضد الشعوب بس مو بالحكومة ،اللي هم الارهابيين ،والدين السياسي اللي يتعاون وية الدول الغربية الجبيرة وأسرائيل اللي جاي تتصيد بالماي العكر   -         زين جا خوية أبو العدالة ،ليش كل هاي الحكومات طاحت وحدة ورة الاخرة ·       أبو مظلوم، هاي قصة طويلة وخاف تمل من حجيي، - لا، خوية سولف ،أخذ راحتك ،أريدك أتفهمني يلله تطلع يبعد أخوك ·       سابقاً  جان أكو زواج أمريكي وية الانظمة الدكتاتورية العلمانية -         العلمانية آنة فاهمها ،ذيج النوبة سولفتلي عليها ·       أي تمام ،واللي صار بالجديد ،طلاكك أمريكي من هاي الانظمة ،والسبب يبو مظلوم أن الانظمة العلمانية خطرة على أمريكا وجماعتها ،حتى لو جانت دكتاتورية لأن الشعب يظل يفكر ويناضل من أجل الديمقراطية ،والدول الاستعمارية خوفها من الصراع الطبقي وبنفس الوكت صار زواج أمريكي وية الاسلام السياسي -         الاسلام السياسي والصراع الطبقي هم فاهمها ·       والانظمة الجديدة جاي أتنفذ مهمات وسياسة محددة ،وتخلي الشعوب دايخة بالصراع الطائفي ،بدلاً من شنو يبو مظلوم؟ - ها!ها! ،بدلاً من دوخة الراس هاي! ،شنهي يبو العدالة ،فريت راسي ،آنة ردتك عون، شو فريتها علي،وتريد الصدكك ،جنت مقهور ع السوريين ،هسة صرت مقهور علروحي ،كلشي ما جاي أفتهم وحياة جدك ·        أبوت مظلوم ،يبعد أخوك ،أنت تفتهم ،بس وجّد وياي ،يعني أنت أحسنلك تعرف مصالحك وتناضل من اجلها علمود تبني الوطن ونتقدم ونطور،لو تلتهي هاذ سني وذاك شيعي، هاذ مسلم وذاك مسيحي ،هاذ كردي وذاك تركماني؟ - ها ،والله يبو العدالة ،شو حجايتك جنها معكولة، بلله خليني أصفنلها ·       ما تستوجب صفنات يبو مظلوم ،ينرادلها أنفكر زين ونشيل الغشاوة من على عيونة ، اريد اسألك، المذاهب والطوايف هسة صارت بالجديد ،لو صارلها آلاف ومئات السنين؟ -         بس يبو العدالة من راحت ذيج الحكومات ،راح الامان والاستقرار ·       لا تعوف سؤالي ، جاوبني أول -         ها ،موجودة من بان وبني ·       أي خوش جا أسأل روحك! وبعدين يبو مظلوم مو من راحت ذيج الانظمة راح وياها الامان والاستقرار ،الامان ما جان موجود والدليل بس حزب واحد ،واللي يصير بغير حزب يسجنونه ويعدمونه ،وأستقرار هم ماكو لأن بالشعب الواحد، أكو الفقير أوأكو الزنكين والثالث ضايع بالرجلين ،بس اللي صار أن أعداء الشعب اللي حجينا عنهم وبمساعدة الغرب أستغلوا الفرصة علمود ينفذون مخططاتهم الشيطانية   -         أبو العدالة ،فدوة أروحنلك يعني هذولة اللي يحاربون حكومة سوريا ما يطبكون وية سنة العراق على الشيعة؟ ·       وانت أتظن هذولة اللي جاي يحاربون حكومة سوريا هم ّ سنة؟ -         ها جا شنهي؟ ·       ولك عمي، هذولة لاسنة ولاشيعة ولا أسلام أصلاً ،ولا الهم دين ،وهاي لعبة وية المخطط اللي كلنا عليه ،ولزمن يتحد كل الشعب حتى يخرب هذا المخطط، وشعب سوريا هم شعب عظيم ولزمن يكول حجايته من هل الضيم اللي جاي يمر بيه -         يعني يبو العدالة الحزب شيكول شنهي الحل؟ ·       الحزب كال ويكول الحجي اللي سمعته مني، وعلمود تخلص كل هل المشاكل لزمن نكعد كلحنا حتى نتفق شلون نوصل لمصلحة الوطن موش مصلحة طايفة لو قومية -         أي خوش جا ما تكعدون شمانعكم؟ ·       هذا السؤال مو ألنا أبو مظلوم ،هذا السؤال للازكين بالكراسي.