| الناس | الثقافية |  وثائق |  ذكريات | صحف | مواقع | للاتصال بنا |

موقع الناس .. ملتقى لكل العراقيين /  ديمقراطي .. تقدمي .. علماني

 

 

د. مزاحم مبارك ماالله

 

 

 

                                                                                  الجمعة 17/5/ 2013



سلسلة "سوالف الشعب"
(4)

د. مزاحم مبارك مال الله

يتبختر أبو العدالة اليوم، معرس ،لابس قاطة الجويتي، اووردة حلوة ،معطر ،مريّح ، وجه يضحك،
• صباح الخير ابو مظلوم، صباح الكيمر، صباح الانوار ..
- آنة صفنت ،شجا هل الزلمة ، وميّة حسبة خذتني
• ابو مظلوم ، جا غير تهنيني خوية ، تعايدني ، أتكلي جلمة حلوة
- اعايدك لو أهنيك ؟عدالي تريد تتزوج النوب وجاي تاخذني وياك مشاية
• لا خوية لا، أولاً أحنة بالحزب علمونة نحترم المرة ونسعدها وما هي لايكة الواحد يتزوج فوك مرته ، أم جهالة ، اللي تعبت وياه وحتى ناضلت وياه ، ما يصير يبو مظلوم ما يصير عدنة بالحزب كلش هاي السالفة يكرهونها
- على كيفك خوية أبو العدالة، شو تريد تاكلني ، جا شحجيت، عدالي صكد تريد تتزوج النوب ، وأنة جاي اتغشمر وياك ، لاتزعل مني بروح الزاير ، ولو الشرع محللك !
• ها شكلنة ؟ رأساً كبل رحت ع الشرع ، والشرع هم كلك " أن لاتعدلوا " وصدكني ماكو رجال يعدل بين أثنين ، وأقرب مثال أنت يبو مظلوم ، دوم أشوفك هنا وعايف مرتك الأولانية عد أهلها بالعرب..
- ها ، ها شسوي ، جا غير ماحبلت ، وكلت بلكم اتزوج وتصير عندي خلفة مثل باجي خلك الله، جا ليش سميت روحي ابو مظلوم ؟مظلوم من الزواج ومن الحكومات!
• أي شو صارلك أربع سنين متزوج وهم ماكو شي ، عودينك هم أتفكر بالثالثة ؟!
- يحكلي اتزوج اربعة ! أها ..
• أي ، والمعيشة ، شو أنت فلاح مع وقف التنفيذ ، وين كاعك ، وين زرعك ، وين الحاصودة وين البذر ، وذيج الخايبة ذابها يم أهلها ، وهاي الثانية حسرة عليها هدمة العيد والنوب تكلي اربعة؟!جا وين العدالة اللي كال عليها رب العالمين، لو تريد بس تأذي بنات العالم ؟أنت بنفسك تكول الحكومة مقصرة ويانا ، لا زراعة ولا راتب رعاية ، شوف خوية أبو مظلوم،لازم تعرف أن السبب منك ، وهن نسوانك الاثنين هم خطية أنحرمن من الخلفة ، بس الفرق هن ما يفكرن مثلك ، هن يقدسن الحياة الزوجية والعائلة بالضبط مثل الحزب الشيوعي
- أبو العدالة ، وين بدينا وشلون صار حجينا ، دكلي أذا مارايح تخطبلك مرة ، جاعليمن كشختك هاي ؟
• صدك ما تعرف يبو مظلوم ليش ؟
- وحياة أبوك ما أعرف
• اليوم عيد العمال العالمي
- ها ها ها ها
• شو ضحكت بصوت عالي يبو مظلوم ، شني ،على شنو ؟
- عيد العمال العالمي اي ، وأدري بيك أنت عامل وعضو بنقابة العمال ، لجن يبو العدالة انتم موش عمال !
• شلون يابة موش عمال !، جا شنهي أحنة أشباح ؟
- أنتو موش عمال لأن مشعول الصفحة سواكم موظفين والقرار مالته بعده ماشي وحكومة المحاصصة عاجبتها الشغلة ومغلسه وانتم هم ساكتين ، والثانية والاخرة ، جا وين معاملكم ، وين مكاينكم ، وين أنتاجكم ؟؟!!
- جا موش تعيرني هذيج الساعة وتكلي فلاح مع وقف التنفيذ ؟!
• والله عندك حك ،بهاي غلبتني
- بس عندي سؤال الك خوية ، عودين ليش طلع هدام هذا القرار ؟

ضرب أبو العدالة جف بجف ، وبصوت عالي :
• والله انت يبو مظلوم راح اتخبلني! من صفحة تحاججني وحجيك معدل ، ومن صفحة ما تعرف ليش؟! اذا هيج, لعد تستاهلون يبلعون الاراضي عليكم يهل الفلح ! ومنا وغاد لازم نرجع احنة وياكم لساحة التحرير ،تراهي صارت ماصخة كلش!

 

 

 

free web counter