كتابات أخرى للكاتب على موقع الناس

الأثنين 15/4/ 2013

ما تعبر هاي السوالف ! د. مزاحم مبارك مال الله قائمة تحالف العدالة والديمقراطية العراقي 422 دخت والله العظيم ،دخت من هاي الاخبار اللي جاي اسمعها ،صكد ،جذب ؟! شنهي يطون تقاعد لفدائيي المكموع !وشنهي يتفاوضون ويه ربعة اللي حتى اهل الانبار النشامه ما رادوهم ؟ تردون الصدك ،دخت ،كلشي ما جاي افتهم، شنهي الريس يوم يسبهم ويلعن سلفة سلفاهم ،لا ومو بس هَج ويحرم وجودهم أبيناتنا ،وشنهي يوم يطلعهم تقاعد ومناصب ؟! ،وعلمود اوخر هاي الدوخة من راسي ،خليني اروح أل ـ جاري المرشح ، كلشي يعَرف ومفتح باللبن .. الفجر هستوه أمبيّن ،دكيت الباب حيل حتى يسمعني، خو ما اظل ادكك هواي وافزز الوادم، هي دكة وحدة ،بس قوية • سلامُن عليكم خوية ابو العدالة ـ وعليكم السلام ابو مظلوم ،ها شجابك غباشي؟ ،خير خو ماكو شي؟ • بعد أخوك ،ترة أنة ما نايم وحياة أبوك ـ شنهي شبيك؟ دحجيلي أكو شي؟ متهورش؟ أم مظلوم جرالها شي؟ الجهال تسمموا ؟ شبيك دكول مو هديت حيلي .. • لا خوية ، لا له، بس انة كلش مقهور وضايج وما مرتاح من دكايك الحكومة "وما شوفلكم الاّ أبو العدالة ،يضحك ضحكة كلش قوية الى أن دمعت عيونة ،حتى من صوته كعدوا الجهال" • ها أبو العدالة ،أنة حجيت شي يضحك ؟!..كالي ، - جا هي الحكومة شوكت ما دكت دكايك موش زينة؟! • ابو العدالة خوية فدوة اروحنلك ،أنة مشتعل أبو أبوي وأنت جاي تمضحك ، أكلك طلعوا راتب تقاعدي لمــرائي ـ العفو فدائي ـ مشعول الصفحة ،بيوم اسحلوا تمثاله .. - شوف يبو مظلوم ،حكومتنا هاي ما ألها صاحب صديج ،هي ع الزينين وع الشينين ،هي ع الخير وع الشر ،هي ع الطيبين وع المو طيبين، وهي كلشي على كلشي .. - اي طبعاً تساوم لأن طبعها المساومة، ولزمن يسوون هاي القرارات علمود الاصوات الانتخابية ،وسبب المصايب كل هاي اللي شفناها واللي راح انشوفها هي المحاصصة الطائفية والقومية ،هاي ألك وهاي أللي ،أنطيني وأنطيك • شوف خوية ، أنة ما اعرف حجي السياسة ،بلله أنت سياسي وتعرف كل شي، بس أنة أفتهم شي واحد ،الحكومة شراح تكول للوادم اللي راحت ولدها من ورة هدّام ،وأ بيش تواجه الدستور اللي منع فكر البعث وتحركات البعثيين؟ جا ذولي الحكومة وجماعة هدام ما يستحون من الناس، مايستحون من نفسهم، لمّا يتفقون بالنهار على خمط الاول والتالي ،ولكم شوية أستحوا ،عيب عليكم حتى الحرامي اللي أهو أسمه حرامي هم يبوك بالليل ! - على كيفك ابو مظلوم لاتقهر بروحك موش زين عليك وانت عندك ضغط وسكر وقلب ومفاصل وربو وسوفان مفاصل ،على كيفك خوية ،بس لازم كل عراقي ينتفض مثل ما انت متأذي وما نايم طول الليل، الشعب ما عنده أتفاقات جانبية ،الشعب لازم يكول كلمته بالانتخابات وينتخب الناس النظيفة موش أهل السوالف الجانبية والتحالفات الجانبية والمشاورات السرية، - وحتى تتنور أكثر يخوية أبو مظلوم ،فخامة الريس أستاد بهاي السوالف من ينضنك، يدوّر على هل الحثالات ويكوم يطلع بهل القرارات اللي راح تضيّع كل رصيده ،بس هو أول واحد يعرف أن هاي السوالف ما تعبر على الشعب !والشعب راح ينتخب قايمة الشرفاء اللي بيها الشيوعيين، لأن كل الناس تكول عنهم أهل الأيد النظيفة ،جا هي سمعة وأحنة أبختهم !