جواد القابجي
jwadalkabchi@yahoo.de
الخميس 4/11/ 2010
مواجع عراقية
جواد القابجي - كندا
ألَمْ ..
مرّات ما يوجع ..
يونِّس..
او ألم بيه آه .. بي وَنْ
اوجرح يم الگلب .. يرفس
يجدح بالوجه
ما يگدر ايغلِّس
والبطران ساء الظن
ميدري ابجرحك .. امّمحَّن
وعيون الغافيه
ايمر من حدرها الماي
ما يروَن
اوترد لجروح من اسنين
ما لِحْمَن
ولا يوم الحذر خاواك
ونته العاشريت الهَم
صبر چنّك .. صبر تلهم
تمعّن .. هاي دنيا
اوبيها لا تإمَن ..
تره اسيوف العِلاها الصده
هم تطعن
طگ صدرك يگلبي اوطير
كنوز ابداخل الصندوگ .. ميلِمعن
ولون تحبسهن الظلمه ..
ما يضْوَن .. ولا يسوَن ..
إصحه اوصير حر بهواك ..
برياض الوفه
ابعالي السمه
يم احبابك .. اتلملم
حط يم واحة الاحباب
وبماي الحياة اغتسل من الهَم
قَصُر من غير حب وحباب ماينفع
طگ ظلع اليصدَّك حيل
كسِّر قيدك
او من داخلك .. إطلع
*********************
أبوذية
عيوني اعله الاحبها دوم +++ ينحاي
چن ميّت صرت معرفت +++ ينحاي
اذا كِسرَتْ اعدايه ظُلم +++ ينحاي
بعد چابيش اطير اشلون بيَّه