كتابات أخرى للكاتب على موقع الناس

 

الأربعاء  25 / 6 / 2014

خوف مشروع حميد الموسوي يا أحلى وطن بالكون فدوه رحت لعيونك . يا أحلى وطن يا ريحة أهلي البيك خايف.....! لا يبوگونك. افك گلبی وقفله أعليك.. بيش أفديك.. خايف أنه خايف .... يضيعونك . أفز باليل وادعيلك.. عسه المعبود يحميك بتلاونيك . من الرادو يشوهونك . أمس ضيعك دكتاتور.....! وبدمنه خبط لونك . فرحنه وگوه رديناك . وکلنه أرواحنه تفداك . عليش إتخلبصت الخيوط...! ويا خيط النفكه ينعگد دونك .. يا أحلى وطن خوفي عليك إيزود .. من الگالوا أمس.. يردون يحمونك.؟ عجيب إتغيرت الألوان..! وغريبه الوطن للحبوه يريدونه يصير أوطان ..! أنه خايف . من الگالولنه حبوك. إجه اليوم اليكرهونك.....! يا أحلى وطن. جرحك بعد ما طاب .. واللي واعدك يشفيك . نسه إوعوده وصبح چذاب ! وصار ويه اليبغضونك. غريبه إعله اليحبونك يعادونك. وعجيبه البشروا يوحدوك.. دعوتهم گبل باچر يقسمونك .! أنه خايف عليك هواي. وخافن تستمر بلواي . وخاف الغير يطمع بيك.... وبسم الغير ينسونك..... وهواي الواگفه إعله الباب.. تتنطر يبيعونك......! يا أجمل وطن بالكون . طول الليل أنه أدعيلك . شد حيلك.. شد حيلك.. وأهلنه الواجهت الإرهاب. بالأرواح يفدونك. دورنه عليك هواي.. ما نرضه يضيعونك. ولا نرضه يغيبونك . فدوه رحت لعيونك. فدوه رحت لعيونك ... نموت ولا يهينونك........   ملاحظة نشرت هذه القصيدة في عراق الغد في الشهر 27-1- 2006 .