كتابات أخرى للكاتب على موقع الناس

 

الجمعة 26/11/ 2010

هلاهل حامد كعيد الجبوري لك يا رحاب كل هذه العطور من شفت طولك حبيبي ... جلَب القداح بيه وصبَّحت مملي نده ومن تبسملي حبيبي ... الشمس بيديه ألزمتها ... وفاض نوره ... وسيّر البيتي النجم طارن أطيور المساجي زركه تتكالب ترافه وأنملت كل السمه والسمه ... السمه ، مطرت بلابل ترست الدنيه غنه ومن زمان .... الصيف ما نعرف أبسره نصعد أبوكت العصاري إنرش سطحنه أترابه ذراته الذهب فراش أمي ... الليل كله يحجي ويانه همس وبسطوح الفقره محلاهه السوالف سطح يتناغه أبسطح أمي كالتلي النبوءه ... وطوكتني ... يشيب راسك ... والكلب يبقه شباب إيغني لطيور المحبه أيهيم بدروب الجمال وأمي تعرف ... تقره خرزات السحر وتعرف إبسر الكلوب ومن هذاك اليوم أنطر وأمشي درويش أبدرب مليان طيبه ووصلت لآخر محطه .... وضحكت الدنيه ترافه .... وبيك يحبيب فزت ... بيك يالغالي فزت   26 ت2 / 2010